Tjémbi 37:1-40
-
I bôt ba mbôdôl Yéhôva ñem, mam map m’a ke loñge
Hiémbi hi David.
א [Aleph]
37 Liyot li gwel bañ we* inyule u ntehe bibéba bi bôt,u tam bañ to i mam baboñbéba+ ba mboñ.
2 Ba ga pala wo kiki bikai,+ba ga yuyi kiki bikai bi bi yé yômi.
ב [Beth]
3 Bôdôl Yéhôva ñem, u boñ ki loñge;+yén mu ’isi,* u ba ki maliga.+
4 Yéhôva a bane we lingoñoo,*ha nyen a ga ti we i mam ma nkon we* ngôñ.
ג [Gimel]
5 Nwas le Yéhôva a éga we;*+bôdôl nye ñem, ha nyen a’ hôla we.+
6 A ga boñ le telepsép yoñ i bai kiki mapubi ma maye ma kel,yak libak joñ li maliga li bai kiki hiañgaa hi kosi.
ד [Daleth]
7 Mom nwee i bisu bi Yéhôva,+u waa bañ to bem* nye.
Liyot li gwel bañ wei ngéda u ntehe mut a mboñ mam mabe+ a gwé ngôñ i boñ.
ה [He]
8 Nwas hiun, u tjôô ki kundul;+liyot li gwel bañ we, tiga le hala a tinde we i boñ béba.*
9 Inyule baboñ mam mabe ba ga tjiba,+ndi ba ba mbôdôl Yéhôva ñem ba ga kôdôl hisi.+
ו [Waw]
10 Ndék ngéda ndigi, bibéba bi bôt bi ga ba ha bé;+ñ, u ga béñge i homa ba bé,ndi u ga tehe ha bé bo.+
11 Ndi bôt ba suhulnyuu ba ga kôdôl hisi,+ba nok ki lingoñoo inyu ngandak nsañ.+
ז [Zayin]
12 Béba mut i ñuune mut a téé sép jimb;+i njél nye masoñ.
13 Ndi Yéhôva a ga nol béba mut hiol,inyule a nyi le ndék ngéda wee a ntjiba.+
ח [Heth]
14 Bibéba bi bôt bi nsodol paminsoñ yap, bi nimbil* ki mimpihlôñgô nwap,inyu tjé bôt, bôt bape ba ntét, ni diyeyeba,inyu nol ba ba téé sép.
15 Ndi miñem nwap nwomede nwon paminsoñ yap i ga tôp;+mimpihlôñgô nwap mi ga bugi.
ט [Teth]
16 I ndék yom mut a téé sép a gwéi yé nseñ iloo lingwañ li ngandak bibéba bi bôt.+
17 Inyule ngui i bibéba bi bôt i ga tjiba,*ndi Yéhôva a ga lédés bôt ba téé sép.
י [Yod]
18 Yéhôva a nyi i mam bôt ba ngi nsohi ba mboma,*yak ngababum yap i ga nom i boga ni boga.+
19 Ba ga wo bé nyuu i ngéda bikuu;ba ga bana ngandak bijek i ngéda njal.
כ [Kaph]
20 Ndi bibéba bi bôt bi ga tjiba;+kiki bikai bilam bi nwo, hala nyen baoo ba Yéhôva ba ga wo;ba ga nyoi kiki hiida.
ל [Lamed]
21 Béba mut i mpoo, ndi i ntimbis bé,ki le mut a téé sép a nkap,* a ban-ga ñem ngôô.+
22 I bôt Nyambe a nsayap ba ga kôdôl hisi,ndi i bôt a ntiihe ba ga tjiba.+
מ [Mem]
23 I ngéda maboñok ma mut+ ma* nlémél Yéhôva,a ñéga* mabal mé.+
24 To ibale a mbaage, a ga kwo bé ’isi,+inyule Yéhôva a gwé nye i woo.*+
נ [Nun]
25 Me bé mañge, nano me ñun,ndi me maa bé tehe Nyambe a ntjôô mut a téé sép,+to tehe bon bé ba nyagal bijek.*+
26 Mut a téé sép a yé maséé i pôôs bôt bape+ to imbe ngéda,yak bon bé b’a kôhna bisai.
ס [Samekh]
27 Kôm béba mbus, u boñ ki loñge,+ha nyen u ga niñ i mba ni mba.
28 Inyule Yéhôva a ngwés telepsép,a ga tjôô bé ba ba tiñi ni nye.+
ע [Ayin]
A ga tééda+ bo ngéda yosôna;ndi mbôda i bibéba bi bôt i ga tjiba.+
29 Bôt ba téé sép ba ga kôdôl hisi,+ba niñ ki mu i boga ni boga.+
פ [Pe]
30 Nyo u mut a téé sép u mpémés bibañga bi pék,*yak hilémb hié hi mpot mam ma téé sép.+
31 Mbén Nyambe i yé mu ñem+ wé;a ga piñgla bé.*+
צ [Tsade]
32 Béba mut i nhes mut a téé sép,a yéñék nol nye.
33 Ndi Yéhôva a ga tjôô bé mut a téé sép+ i moo ma béba mut,to pémhene nye mbagi nôgôs i ngéda a ga kéés nye.+
ק [Qoph]
34 Bôdôl Yéhôva ñem, u kil ki mu njel yé,ha nyen a ga ti we nsima* le u kôdôl hisi.
I ngéda bibéba bi bôt bi ga tjiba,+ u ga tehe hala.+
ר [Resh]
35 Me bi tehe béba mut, ni béba yé ñema yôgi kiki e yômi ikété hisi hilam.+
36 Ndi kunda yada, a bi tagbe, a bé ha bé ha;+me bi yéñ nye letee, ndi me bi tehe bé nye.+
ש [Shin]
37 Yimbe mut nu a yé ngi nsohi,u waa bañ béñge mut nu a téé sép,+inyule nsañ won u mbem i nya mut i.+
38 Ndi babôkmbén bobasôna ba ga tjiba;+bibéba bi bôt bi ga ba ha bé.
ת [Taw]
39 Tohi i bôt ba téé sép i nlôl yak Yéhôva;+a yé lisolbene jap li ngui i ngéda bikuu.+
40 Yéhôva a ga hôla bo, a sôñ ki bo.+
a ga sôñ bo i moo ma bibéba bi bôt, a tohol ki boinyule ba nsolbene i nyeni.+
Ndoñi
^ Tole “U unup bañ.”
^ Tole “loñ.”
^ Tole “a bane we maséé ma ma mbuma ñañ.”
^ Ni hop Lôk Héber, “ñem.”
^ Tole “Bii njel yoñ yak Yéhôva.”
^ Tole “hônba.”
^ I nla ki ba, “u unup bañ, inyule hala a nkena ndik we i béba.”
^ Tole “bi nhôt.”
^ Ni hop Lôk Héber, “moo ma bibéba bi bôt ma ga tjiba.”
^ Ni hop Lôk Héber, “a nyi dilo di bôt ba ngi nsohi.”
^ Tole “a mboñ loñge.”
^ Ni hop Lôk Héber, “I ngéda njel i mut i.”
^ Tole “a ntéé.”
^ Tole “a nit nye ni woo wé.”
^ Ni hop Lôk Héber, “bret.”
^ Tole “u mpémés pék ni kiñ si.”
^ Ni hop Lôk Héber, “makôô mé ma ga sendi bé.”
^ Ni hop Lôk Héber, “a ga bédés we.”
