Miñañ minlam mi nlôl ni Djob li masé le Yéhôva. A ngwés le mahaa ma ba masé. (1 Timôtéô 1:11) Nyen a bi teg libii. Ngéda babiina ba gwé kaat libii, hala a nlona masé ikété ndap yap lihaa, inyule hala a nti bo ñem nwee, a nkôôba ki bo i néñés bon bap ikété nsañ. Bikristen bi nlama biiba inoñnaga ni mbén i loñ yap.​—Añ Lukas 2:1, 4, 5.

Lelaa Djob a nyoñ libii? A ngwés le libii ipôla munlôm ni muda li nom niñ yap yosô. Yéhôva a ngwés ki le ndéñg i ba bañ ipôla babiina. (Lôk Héber 13:4) A ñoo maboha. (Malaki 2:16) Ndi a nwas le bikristen bi bos ibale wada wap a nke ndéñg. Mbus, nu a yé ngi nsohi a yé kunde i tiimba biiba ni mut numpe.​—Añ Matéô 19:3-6, 9.

Yéhôva a bi heg nwaa bo nlôm le ba hôlna i nya i kôli. (Bibôdle 2:18) Kiki Isañ mbai, nlôm nyen a nlama ba nu bisu i yéñ bigwel moo. A nlama ki ba nu bisu i niiga lihaa jé mambén ma Djob. A nlama ti nyemede nkikip inyu unda le a ngwés toi nwaa wé. Nwaa bo nlôm ba nlama gwéhna, ba tinag wada ni nuu lipém. Kiki bôlôm ni bôda bobasô ba ta bé peles, ba nlama nwéhlana; hala a yé hiliba hiada inyu boñ le libii li ba masé.​—Añ Efésô 4:31, 32; 5:22-25, 33; 1 Pétrô 3:7.

Ibale libii linan gwé mindañ, bé bo iba ni nlama sal ni ngui le ni kônde unda gwéha i yé ipôla nan. (1 Korintô 13:4, 5)  Kaat Djob i nti bé babiina kunde le ba bagla inyu sangal mindañ mi mbéna ba ikété ndap libii.​—Añ 1 Korintô 7:10-13.

Yéhôva a ngwés le ni ba masé. A nti bé biloñge bi biniigana inyu boñ le ñem nan u kon masé ikété binéñél binan. A ngwés le ni kôs bisai ni njel pék ni yi i bagwal banan. (Kôlôsé 3:20) Yéhôva, nu a yé Nheg woñ, a ngwés ki le u nôgda line li yé i boñ mam ma nlémél nye ni Man wé.​—Añ Ñañal 11:9–12:1; Matéô 19:13-15; 21:15, 16.

Ni nlama sal ni ngui inyu ti bon banan bijek, liyééne ni mambot. (1 Timôtéô 5:8) Ndi inyu boñ le bon banan ba kon masé, ni nlama ki niiga bo i gwés Djob, inyu boñ le ba la nôgôl nye. (Efésô 6:4) Ndémbél ni ti inyu unda le ni gwés Djob i ga tihba miñem mi bon banan ngandak. Ibale biniigana binan bi nlôl ikété Bibel, bi nla héñha mahoñol map le ba boñ loñge.​—Añ Ndiimba Mbén 6:4-7; Bingéngén 22:6.

Boñge ba nkon masé ngéda bagwal ba mbégés bo. Ndi ba gwé ki ngôñ le ba kodol bo, ba ti ki bo maéba. Bini biniigana, bi nsôñ bo le ba bana bañ bihiumul bibe, bi bi nlona bo njiiha. (Bingéngén 22:15) Ndi bagwal ba nlama bé kodol bon ikété lihiun to ni ñem mbe.​—Añ Kôlôsé 3:21.

Mbôgi Yéhôva ba mpémés ngandak bikaat, ntilbaga tôbôtôbô inyu hôla bagwal ni bon. Biniigana bi bikaat bi, bi nyôñna ikété Bibel.​—Añ Tjémbi 19:8, 12.