Le ka anchaj Jesús way Luʼumeʼ tu béeykuntaj le profecíaʼob ku tʼaanoʼob yoʼolal le ‹Mesíasoʼ›, le máax kun «salvartik le yóokʼol kaaboʼ» (Daniel 9:25; 1 Juan 4:14). Tak le tsʼoʼok u kíimiloʼ seguernaj u béeykuntik le profecíaʼob ku tʼaanoʼob yoʼolal le Mesíasoʼ (Salmo 110:1; Hechos 2:34-36).

•  ¿Baʼax u kʼáat u yaʼal le tʼaan Mesíasoʼ?

•  ¿Chéen wa tiʼ juntúul máak unaj u béeytal le profecíaʼob ku tʼaanoʼob yoʼolal le Mesíasoʼ?

•  ¿Tak wa bejlaʼa maʼ chíikpajak le Mesíasoʼ?

•  ¿Jaypʼéel profecíaʼob ku tʼanoʼob yoʼolal le Mesíasoʼ?

•  Jujunpʼéel profecíaʼob ku tʼaanoʼob yoʼolal le Mesías béeychajoʼob tiʼ Jesúsoʼ

 Le tʼaan ich hebreo Maschíaj wa Mesías yéetel le tʼaan ich griego Kjristós wa Cristooʼ u kʼáat u yaʼal «Yéeyaʼan». Leloʼ ku yeʼesikeʼ le tʼaan «Jesucristooʼ» u kʼáat u yaʼaleʼ «Jesús le Máax Yéeyaʼanoʼ» wa «Jesús le Mesíasoʼ».

 Úuchjeakileʼ le kéen yéeyaʼak wa máax utiaʼal u tsʼaʼabal autoridad tiʼeʼ ku yalaʼal aceite tu pool (Levítico 8:12; 1 Samuel 16:13). Dioseʼ tu yéeyaj Jesús utiaʼal u beetik u Mesíasil, leloʼ tu yeʼeseʼ tu tsʼáaj yaʼab autoridad tiʼ (Hechos 2:36). Chéen baʼaleʼ tu lugar u yalik aceite tu pooleʼ tu tsʼáaj u espíritu santo tiʼ (Mateo 3:16).

 Beyoʼ, tumen jeʼex u huella juntúul máakeʼ chéen tiʼ letiʼ yaan, maʼ tu páajtal u yantal tiʼ uláakʼ máak. Le profecíaʼob yaan teʼ Biblia xanoʼ chéen ku tʼaanoʼob tiʼ juntúul Mesías wa Cristo. Chéen baʼaleʼ le Bibliaoʼ ku yaʼalikeʼ «yaan u yantal máakoʼob ken u yaʼalubaʼob Cristoʼob bey xan máakoʼob ken u yaʼalubaʼob profetaʼob. Letiʼobeʼ yaan u beetkoʼob milagroʼob bey xan nukuch baʼaloʼob utiaʼal u tuskoʼob máak, wa ku páajtaleʼ tak le máaxoʼob yéeyaʼanoʼob tumen Diosoʼ» (Mateo 24:24).

 Maʼatech, le Bibliaoʼ tu yaʼaleʼ le Mesíasoʼ yaan u taal tiʼ u paalaloʼob David, juntúul tiʼ le reyoʼob yaan kaʼach Israeloʼ (Salmo 89:3, 4). Chéen baʼaleʼ láaj saʼat le juʼunoʼob tuʼux ku yaʼalik máax u paalaloʼob Davidoʼ. Ku yaʼalaʼaleʼ kʼaskúuntaʼab le juʼunoʼob le ka xuʼulsaʼab Jerusalén teʼ año 70 tumen le romanoʼoboʼ a. Le oʼolal teʼ kʼiinoʼobaʼ mix máak ku páajtal u yaʼalik wa tiʼ u paalal David u taal. Chéen baʼaleʼ tu kʼiiniloʼob Jesúseʼ láayliʼ tsʼakaʼan le juʼunoʼoboʼ, le oʼolal mix u enemigoʼob ku páajtal u yaʼalikoʼob wa maʼ tiʼ u paalal David u taaliʼ (Mateo 22:41-46).

 U jaajileʼ maʼ tu páajtal u yaʼalaʼal jach jaypʼéel profecíaʼob ku tʼaanoʼob yoʼolal le Mesíasoʼ tumen jejeláas bix u xoʼokol le profecíaʼobaʼ. Por ejemploeʼ tiʼ Isaías 53:2-7, ku yúuchul tʼaan tiʼ jejeláas baʼaloʼob yoʼolal le Mesíasoʼ. Yaan máakoʼobeʼ ku yaʼalikoʼobeʼ le versículoʼobaʼ chéen junpʼéeliliʼ profecía. Pero yaan máakoʼob xaneʼ ku yaʼalikoʼobeʼ cada junpʼéel tiʼ le baʼaxoʼob ku yaʼalik le versículoʼobaʼ junpʼéel profecía.