Duréihã Jeová * ma tô poto datsina damro ĩmorĩꞌrada. Bíblia te tinha õhõ te te ĩpoto na hã piꞌõ ĩmorĩꞌrada duré ma tô tsaprõ aibö ma. Adão robdze uptabi na te tihöiba, taha wa te tinha: ‘Ãhãta tô, piꞌõ nhi hã, ĩ̱nhi uptabi ꞌmanharĩ, duré ĩhi hã, tô ĩ̱hi uptabi ꞌmanharĩ.’ (Gênesis 2:22, 23) Tô tsena Jeová te tsima wẽ ĩmro ré norĩ robdze na ꞌre höimana dzaꞌra mono da.

Aimro wamhã ãté ma tô ĩrotsaꞌra marĩ ĩwẽ norĩ na tsi ꞌre ĩꞌaihöimana aba mono dzéb da hã. Tadzahã ĩmro ré norĩ hã tsitsawi petse dzahuré nherẽ marĩ roꞌwaꞌrutu te dza watobro. (1 Coríntios 7:28) Ãhã ĩtsorédzém na hã Bíblia nhimirowahudu ahö na te tihöiba, õ norĩ hã te dza aipawapto robdzei uꞌötsi na ꞌre aihöimana mono da aimrodzéb ꞌremhã duré ate família * ꞌremhã. — Salmo 19:8-11.

BÍBLIA DZARINA: Aibö damro família ꞌmadöꞌöꞌwa. — Efésios 5:22, 23.

Aibö, Jeová te tsima wẽ ãma pibui wẽ da aimro ma hã ĩhöimanadzém na. (1 Pedro 3:7) Piꞌõ ma poto ni te te waptob da aibö hã, taha wa aimro ma tãma ꞌre aihöimana wẽ mono na duré atsima tsawi na. (Gênesis 2:18) Tsawi petse wa, ãma ꞌre rotsaꞌrata mono piꞌõ aimro ĩmorĩꞌrata na. — Efésios 5:25-29.

Piꞌõ, Jeová te tsima wẽ aimro hã ꞌre ĩwadzé mono da hã, duré ꞌre ĩpawapto mono da na hã ate família ꞌmadöꞌöꞌwa da hã. (1 Coríntios 11:3; Efésios 5:33) Upari aimro nhimipitsudu hã duré ãma aime na ꞌröwi aipẽꞌẽ na. (Colossenses 3:18) Ãne aihöimana wamhã, Jeová duré aimro hã te dza aiwẽtsãmri dzahuré. — 1 Pedro 3:1-6.

TAHA DA ATSIPTETE:

• Tsadanharĩ aimro hã e niha damro ĩwẽ na te dza ꞌre aihöimana mo. Wapari petse duré tsiptete ãma adzaprĩ da aihöimanadzé.

• Höiꞌré na atsimipari nhimiꞌẽ. Ãté te dza ronomro waihuꞌu aba da aimro ma hã tãma ꞌre rowẽ mono da hã.

BÍBLIA DZARINA: ꞌRe atsipoꞌre puꞌu mono aimro hã te te tsima ĩwẽdzém na. (Filipenses 2:3, 4) Höiꞌré na aimro hã aima hã ĩpire uptabi na hã, duré atsipoꞌre puꞌu Jeová te te tsima ĩwẽ na hã tãma ĩromhuriꞌwa norĩ ‘tsimidzawi petse na te dza dama ꞌre höimana dzaꞌra, aihĩni ma.’ (2 Timóteo 2:24) ‘Datsiꞌabaꞌré na damreme dzani hã aiwa, tsibꞌédzé ꞌwa pa ꞌwa ꞌrãtsutu ne hã te ꞌre höimana dzaꞌra. Tane nherẽ, ĩꞌrãi waihuꞌu wẽ norĩ mreme hã te te ꞌre daꞌaꞌrãdzéptöꞌö waihuꞌu petse mono di.’ Taha wa, pitsutu wẽ na aimreme hã. (Provérbios 12:18) Jeová nhiptetedzé te dza aipawapto ꞌre aimreme wẽ mono da damreme ĩwapari dze na duré dadzawi dzarina. — Gálatas 5:22, 23; Colossenses 4:6.

TAHA DA ATSIPTETE:

• Marĩ ĩpire uptabi na aimro me robdzanhamri aba wana ré rowaptẽrẽ Höimanaꞌuꞌö wi, tiwi waptẽrẽ te te aipawaptob da atsimipari nhimiꞌẽ da, duré atsimipari petse da.

• Rotsaꞌrata petse aimremedzém na hã, duré e niha dza aimro ma hã tãma ĩꞌaimreme da hã.

BÍBLIA DZARINA: Damro wamhã, ma tô tsiꞌmanharĩ dzahuré “mitsi ĩnhi na hã höimana dzahuré”. (Mateus 19:5 Rowatsuꞌu Tém Nhihödö) Tane nherẽ a norĩ waꞌwa hã aiwam õ di, duré ãté atsimirotsaꞌrata waꞌwa aimawi hã. Taha wa atsiré ꞌre aihöimana waihuꞌu petse aba mono da. (Filipenses 2:2) Tsimitsutu rotsaꞌrata wẽ dzé hã ĩpire uptabi marĩ hã pitsutu aba wamhã. Bíblia te ãma rowatsuꞌu: ‘Dama roti pire ꞌmanharĩdzé hã wẽ di, danhimirowaꞌõtõ ꞌmanharĩdzéb da hã.’ (Provérbios 20:18) Marĩ ĩpire uptabi pitsutu aba wamhã, wapari aba Bíblia nhimirowahutu nhimidzaprõni. — Provérbios 8:32, 33.

TAHA DA ATSIPTETE:

• Atsiri ꞌridawa duré tãma watsuꞌu na atsimirotsaꞌrada aimro ma hã, taré ĩwatsuꞌudzém na tsi mare di.

• Marĩ ĩpire pitsutu wana ré robdzanhamri aimro ma hã.