Provébiu 12:1-28
12 Niꞌwa hã tihâimanazém na te te upai wa, da te tãma roti wamhã, te za sima wẽ upta, te te iwaihuꞌu wẽ da si. Simizaꞌrese ãna ꞌre ihâimana mono si tihâimana pese zé te te sina ꞌre iꞌuzei mono da hã mare di za. Te za te te sina ꞌre wẽꞌõ.
2 Iwẽ norĩ hã te Uburé Danhibꞌapito hã te te ꞌre awẽsãmri. Tane nherẽ, wasété na te te sima ꞌre irowaꞌõtõ zaꞌra mono norĩ si te te siwi ꞌre awẽꞌõ pese, niha hã te te tãma ꞌre apisutu mono da hã.
3 Niꞌwa iwasété si te te ꞌre iꞌmanharĩ mono hã te za sima romnhimimnhasi na si hã ꞌre hâimana. Tane nherẽ, niꞌwa sena na ꞌre hâimana mono wamhã, da te irési da hã mare di, wede isari tede, rowaꞌu te te ꞌre isaꞌoꞌo waihuꞌu mono õ ne.
4 Piꞌõ damro hã iwẽ na si ꞌre hâimana mono wamhã, te za imro tãma ꞌre ipẽꞌẽ toi mono zarina ãma ꞌre wata. Tane nherẽ, imro rowazé te te sina tãma ꞌre isani mono hã, aiwa ihi na ihâzé pire te te ꞌre ihi ware mono wam ne hã, te te ꞌre hi uprosi mono wa.
5 Sena na ꞌre ihâimana zaꞌra mono norĩ nhimirowaꞌõno hã iꞌuwaibaba na si te ꞌre hâimana. Tane nherẽ, iwasété norĩ nhimiroti hã daꞌrãiwamnarĩ da si te ꞌre hâimana.
6 Iwasété norĩ mreme hã simimnhasi uptabi di, dapãrĩꞌwa norĩ hã rosaꞌrese õ ré, dazô ꞌre iwairébé mono ne. Tane nherẽ, iꞌuwaibaba na si ꞌre ihâimana zaꞌra mono norĩ mreme hã te za marĩ isimimnhasi hawimhã te te ꞌre daꞌanhoꞌreptu.
7 Iwasété norĩ ꞌre siꞌutõrĩ mono wa, te za oto sô ꞌre robaba zaꞌra. Tane nherẽ, sena na iꞌuwaibaba na si ꞌre ihâimana zaꞌra mono nhorõwa si te za uburé marĩ da hã siptete na ꞌre simasab uꞌâsi.
8 Iꞌrãi waihuꞌu wẽ norĩ hã te da te dasima ꞌre wasuꞌu wẽ zaꞌra. Tane nherẽ, ipẽꞌẽ ꞌremhã wasété na ꞌre ihâimana zaꞌra mono norĩ hã te za dama wazéb ãna ꞌre hâimana zaꞌra.
9 Wẽ di, niꞌwa wapu na ꞌre hâimana mono nherẽ, tihâimanazéb da, te te ꞌre iromhuri mono hã, dama pire na ꞌre hâimana mono ne, rési ãna ꞌre isãmra mono, ta hã mra te te ꞌre isépata mono nhipai u hã.
10 Sena na ꞌre ihâimana zaꞌra mono norĩ hã tinhimizama hã te te ꞌre ꞌmadâꞌâ wẽ zaꞌra mono di. Tane nherẽ, iwasété norĩ nhimirobꞌmanharĩzé hã wasété uptabi di.
11 Niꞌwa hã tiburu na te te ꞌre romhuri pese mono wamhã, te za sa ꞌre romnhimiꞌwara, saꞌẽtẽ na isazéb da hã. Tane nherẽ, niꞌwa marĩ iwapure zô si ꞌre irĩtĩ mono na taré bâdâ te te sina ꞌre uprosi mono wamhã, ta hã isimizaꞌreseꞌõ.
12 Iwasété norĩ hã tô iwasété hâiba amo, marĩ hâimana nhipese na te te dawi ꞌre iwaibui mono na hã te te ꞌre ꞌruiwapari zaꞌra, te te tiwi sima ꞌre waibui mono da hã. Tane nherẽ, wẽ na ꞌre ihâimana zaꞌra mono norĩ hã te siptete na si marĩ te te ꞌre ꞌmanharĩ wẽ uꞌâsi zaꞌra, dawaprã.
13 Wasété na ꞌre ihâimana zaꞌra mono norĩ hã te ꞌrâwi timreme wasété na ꞌre sisitob zaꞌra. Tane nherẽ, wẽ na iꞌuwaibaba na si ꞌre ihâimana zaꞌra mono norĩ si te ropire hawi ꞌre iwairébé mono zém na hã te te ꞌre ꞌrãiwaꞌõmo zaꞌra.
14 Niꞌwa hã timreme wẽ zarina, te za iwẽ hã te te sima ꞌre azani. Tinhibꞌrata na te te ꞌre iromhuri wẽ mono zéb zarina, te za duré iwẽ hã te te sima ãma ꞌre azani.
15 Isimizaꞌreseꞌõ, te marĩ iꞌuwaibaba na te te ꞌre iꞌmanharĩ zaꞌra mono ne hã te te sina ꞌre rosaꞌrata uꞌâsi zaꞌra. Tane nherẽ, iꞌrãi waihuꞌu wẽ norĩ hã te roti iwẽ te te ꞌre iwapari zaꞌra mono zé hã te te sina ꞌre uze zaꞌra.
16 Isimizaꞌreseꞌõ hã niha dazada ihâimanazém na hã te za awaꞌawi te te dama ãma ꞌre ropé. Tane nherẽ, iꞌrãi waihuꞌu wẽ ãma, da te ꞌre iwasété mono zé hã te te sina ꞌre mrami waihuꞌu mono õ di.
17 Sena na ꞌre ihâimana zaꞌra mono norĩ hã te za tô sadawa nhipese ãna te te dama ꞌre dawasuꞌu zaꞌra, dasisõꞌa. Tane nherẽ, senai õ na te te ꞌre idawasuꞌu zaꞌra mono norĩ hã, te za sadawa nhipese na hã te te ꞌre rowasuꞌu zaꞌra.
18 Dasiꞌabaꞌré na damreme zani hã aiwa, sibꞌézé ꞌwa pa ꞌwa ꞌrãsutu ne hã te ꞌre hâimana zaꞌra. Tane nherẽ, iꞌrãi waihuꞌu wẽ norĩ mreme hã te te ꞌre daꞌaꞌrãzéptâꞌâ waihuꞌu pese mono di.
19 Dazadawa nhipe hã hâimana hâ õ di. Õne haré te za aiꞌutõ. Sena na damreme si te za ꞌre hâimana hâ uꞌâsi.
20 Wasété na te te ꞌre irowaꞌõtõ zaꞌra mono norĩ pẽꞌẽ ꞌremhã te isadawa nhipese na isimirosaꞌratazép si tãma ꞌre hâimana zaꞌra. Tane nherẽ, rowẽ na ꞌre dahâimana zaꞌra mono da, te te dama ꞌre iromhuri zaꞌra mono norĩ hã te za robze na ꞌre ihâimana zaꞌra mono zép si te te ꞌre sõpẽtẽ zaꞌra.
21 Ropire hã iꞌuwaibaba na si ꞌre ihâimana zaꞌra mono norĩ zô, ꞌre iwairébé mono da hã, mare di. Tane nherẽ, wasété na ꞌre ihâimana zaꞌra mono norĩ si te ropire hã te te ꞌre sõpẽtẽ uꞌâsi zaꞌra.
22 Uburé Danhibꞌapito ma, isadawa nhipese norĩ hã tãma ꞌru ti. Tane nherẽ, sena na te te ꞌre inharĩ zaꞌra mono norĩ si, tãma isawi pe hã.
23 Isimizaꞌrese wẽ norĩ hã mreme wadi õ di, tinhimirowaihuꞌu na hã. Tane nherẽ, simizaꞌrese ãna ꞌre ihâimana zaꞌra mono norĩ hã te za simizaꞌrese ãna niha na tihâimanazé hã te te dama ꞌre hâiꞌré zaꞌra.
24 Niꞌwa hã tinhiptede te te sima ꞌre ꞌmanharĩ mono wamhã, te za dama iꞌrãnhoꞌõmo na ꞌre hâimana. Tane nherẽ, iwaꞌa norĩ hã te za danhibꞌaꞌuwẽ na hã te te dama ꞌre romhuri zaꞌẽtẽ uꞌâsi zaꞌra.
25 Marĩ na dapẽꞌẽ ꞌre, ꞌre idahâtâꞌâ zaꞌra mono zé hã te za te te ꞌre dahâiba pire zaꞌra. Tane nherẽ, te za damreme iwẽ hã te te dama ꞌre robze zani zaꞌra.
26 Sena na ꞌre ihâimana mono hã te za tisiré zaprõni wẽ ꞌwa na ꞌre hâimana. Tane nherẽ, iwasété norĩ hã te tihâimanazém na ꞌre sisimini zaꞌra.
27 Abaꞌwa iwaꞌa hã tinhisõpãrĩ nhi hã te te sima ꞌre isebre zaꞌra mono da hã mare di. Romhuri pese ꞌwa norĩ si te za sibro pese na ꞌre hâimana zaꞌra.
28 Sena na iwẽ na si ꞌre idahâimana zaꞌra mono zé hã, rowẽ na ꞌre idahâimana uꞌâsi zaꞌra mono zé, te wasuꞌu. Taha si te za ꞌre idadâꞌâ zaꞌra mono zé wi, te te ꞌre daꞌanhimro.
