2 Timotiu 2:1-26
2 Ĩꞌra, maꞌãpé ĩwapari pese, asina. Cristu Zezusihi ãma wa wa norĩ hã ꞌre wanomro. Ãhã wa, te za a hã isimipawaptobzéb zarina, asiptete sina ãma ꞌre aihâimana mo.
2 Ĩnhimirowasuꞌu hã ma tô aipoꞌre na ꞌre iwapari mo, isazeiꞌwa norĩ nhoꞌa te dama ꞌre irowasuꞌu mono zé hã. Ta norĩ hã ahâ di. Tawamhã ꞌre iꞌawapari mono zé hã te za aibâ norĩ ma ꞌre iꞌawaihuꞌu mo, aima iꞌumnhasi zaꞌra norĩ ma hã, tãma iwaihuꞌu pese zaꞌra zéb zarina, ĩnhimirowasuꞌuzém na te te duré ãma ꞌre uzusi zaꞌra mono da hã, dapawaptom na.
3 Daꞌwapéiꞌwa dama iꞌumnha dasiꞌwapéi ꞌre, dame ꞌre hâimana mono wamhã, te te ꞌre robzépata tõ mono da hã, ꞌre sisawi mono õ di za. Tane a hã, Cristu Zezusihi nhibꞌaꞌuwẽ na ꞌre aihâimana mono wa, te za asina ꞌre isazei uꞌâsi mo, asisawi ãna ĩsine ꞌre robzépata mono da.
4 Daꞌwapéiꞌwa norĩ hã tinhibꞌapito ma, te te ꞌre romhuri zaꞌra mono ré hã tãma wẽ zaꞌra di, isibꞌapito isimiromhuri na te te ꞌre awẽsãmri mono da. Ãne wa, tinhimiromhuri upana, marĩ mono bâ te te sima ꞌre rosaꞌrata zaꞌra mono õ di, te te aré sima ꞌre iwẽ zaꞌra mono na hã.
5 Duré, niꞌwa hã dawara na hâimana wamhã, dawi watobro nherẽ, marĩ iwẽ hã te te sima âri õ di za, dawara na rotizé hã te te sina ꞌmadâꞌâ õ wamhã. Dawara na roti hã te te sina iꞌmadâꞌâzéb zarina si, te za marĩ iwẽ hã sima tiꞌâ, dawi watobro wamhã.
6 Tane duré, buru na romhuri pese ꞌwa hã, amnho hã uburé da te ubumroi pari, imorĩꞌrata na te za tite da hã âri ꞌrata.
7 Maꞌãpé, ãma ꞌre rosaꞌrata uꞌâsi mono, te aima irowasuꞌuzém na hã. Ãne wamhã, Wanhibꞌapito hã te za te te ꞌre aipawapto, ãhã wasuꞌu na hã ãma ꞌre awaihuꞌu mono da.
8 Maꞌãpé, Zezu Cristuhu ãma ꞌre rosaꞌrata pese mono. Ta hã dâꞌâ nherẽ, ma tô abꞌre hawi hâiwaꞌudu, Dawihi nhihudu hã. Wanhibꞌapito wasuꞌuwẽ na te ꞌre daꞌapoꞌre puꞌu mono wamhã, taha wasuꞌu na wa tô te dama ꞌre rowasuꞌu uꞌâsi.
9 Tawamhã Wanhibꞌapito wasuꞌuwẽ na te dama ꞌre rowasuꞌu mono ꞌru te, wa oto te ꞌre robzépata. Ĩwasédé hã te ꞌre ꞌmanharĩ mono newa, wa oto ꞌre ĩza, dazazéb ꞌre, isiꞌuwazi nhorõ rutu na ĩpawasisi ré. Tane nherẽ, ꞌRe ihâimana uꞌâsi mono zadawa wasuꞌu hã pawasisi ãna ne, te ꞌre hâimana uꞌâsi. Te za da te dama ãma ꞌre rowasuꞌu uꞌâsi zaꞌra.
10 Te irobzépata da hã ĩma pire nherẽ, ĩsisawi õ di, te robzépata tõ da hã. Te ꞌre robzépata mono nherẽ, ꞌRe ihâimana uꞌâsi mono hã tinhibꞌaꞌuwẽ da, te te sima ipisutu zaꞌra norĩ hã wa za te ꞌre apawaptob uꞌâsi, Cristu Zezusi hã te te ꞌre saze zaꞌra mono da, taha zarina tinhoꞌreptuzé hã te te sina ꞌre uwaimrami zaꞌra mono da, rowẽ na iꞌrata ꞌre hâimana uꞌâsi zaꞌra mono da.
11 Tô sena da te dasima ꞌre irowasuꞌu zaꞌra mono zé hã ãne:
“Cristuhu siré ꞌre wadâꞌâ zaꞌra mono wa, duré ta hã dâꞌâ uptabi nherẽ, abꞌre hawi hâiwaꞌutu wa, wa za isiré ꞌre wahâimana uꞌâsi zaꞌra.
12 Robzépada hã wa te wasina ꞌre waihuꞌu zaꞌra mono nherẽ, wanhiptete sina ãma ꞌre wahâimana uꞌâsi zaꞌra mono wamhã, wa za Cristuhu siré wapire na wa te ꞌre daꞌmadâꞌâ uꞌâsi zaꞌra. Cristuhu zazeiꞌõꞌwa na dama ꞌre wasiwasuꞌu zaꞌra mono wamhã, tizazeiꞌwa na te te sina ꞌre waꞌawaihuꞌu mono õ di za. Te za te te siwi ꞌre waꞌawẽꞌõ oto.
13 Wa norĩ hã Cristu hã wa te ꞌre saze zaꞌra mono nherẽ, tiwi ꞌre wasipizari zaꞌra mono nherẽ, te tô wama umnhasi uꞌâsi na ꞌre hâimana, marĩ na te te taré dama ãma ꞌre aropisutu mono õ wa.”
14 Ãhã wasuꞌu na te za asimiꞌmadâꞌâ norĩ hã ãma ꞌre ipoꞌre puꞌu zaꞌra mo. Te za duré aihâimana prédup sina tãma ꞌre iꞌaroti mo, ꞌRe ihâimana uꞌâsi mono nhoꞌa ꞌre wahâimana zaꞌra mono nherẽ, taré marĩ wasuꞌu na ꞌre sisadaꞌâbâ zaꞌra mono tõ da. Dasisadaꞌâbâzé hã wẽ õ wa, taha zarina ꞌre dahâimana zaꞌra mono wamhã, te za dawi ꞌre siꞌutõrĩ zaꞌra, dahâimana wẽ zé hã.
15 Romhuriꞌwa nhimiromhuri hã wẽ wamhã, tinhimiromhuri ma, ꞌre sisé mono õ di za. Tane te za sada ꞌre asiptete uꞌâsi mo, iꞌuwaibaba si roti tô sena na si ꞌre daꞌapawapto mono da, asimiromhuri na te te ꞌre aiwẽsãmri mono da, ꞌRe ihâimana uꞌâsi mono hã.
16 ꞌRe ihâimana uꞌâsi mono nhimiroti zarinai õ na rowasuꞌuꞌwa norĩ nhiti, te za ꞌre aihâimana mo. Ta norĩ nhimirowasuꞌu zarina, ꞌre dahâimana zaꞌra mono wamhã, te za danhimirosaꞌrata na dasina ꞌre dapahâ zaꞌra, Wamama nhimiroti nhiti hã.
17 Ta norĩ nhimirowasuꞌu hã daꞌwaꞌre ne, te ꞌre hâimana. Daꞌwaꞌre hã saꞌẽtẽ wamhã, te za uprosi, danhi hã. Tane, duré ta norĩ nhimirowasuꞌu hã isazeiꞌwa norĩ ãma te te ropéi mono wamhã, te za tiwi uprosi zaꞌra, ihâimana wẽ zéb zaꞌra hã. Tane, Imeneusi norĩ nhimirowasuꞌu hã Pirétuhu nhimirowasuꞌu me te aiwa ꞌre hâimana.
18 Ta norĩ hã senaiꞌõ na rowasuꞌu na te te dama ꞌre rowasuꞌu zahuré, ãne: “Tâibâ, bâdâ ma tô iwa waptãꞌã pa, ꞌRe ihâimana uꞌâsi mono abꞌre hawi te te idaꞌahâiwaꞌutuzéb da hã. Niwab da hã te te ãma sahu õ di za, te te idaꞌahâiwaꞌutuzém na hã.” Ãne te ta norĩ nhimirowasuꞌu hã ꞌre hâimana. Taha zarina ma tô dawi uprosi zahuré, Wanhibꞌapito wasuꞌuwẽ na da te ꞌre isaze zaꞌra mono zé hã.
19 Tane nherẽ, ẽtẽ ꞌmanharĩ na ꞌri naꞌrada hã, siptete na ꞌre ihâimana mono ne, te za ꞌRe ihâimana uꞌâsi mono nhimiroti hã pire na ꞌre hâimana uꞌâsi. Ãne isimiroti na robꞌuiꞌéré hã: “Wanhibꞌapito hã te za tinhibꞌaꞌuwẽ norĩ hã tite na te te ꞌre awaihuꞌu.” Ãne duré ãma irobꞌuiꞌéré hâiba amo hã: “Niꞌwam norĩ hã Wanhibꞌapito nhibꞌaꞌuwẽ na dama ꞌre siwasuꞌu zaꞌra mono wamhã, te za tiwasédé hã rẽme pese zaꞌra, ꞌre nomro wẽ mono da oto.” Ãne isimiroti na robꞌuiꞌéré hã.
20 ꞌRi wawẽ ãma hã piza hã ahâ na te ꞌre hâimana zaꞌra, ẽtẽ waipo pré oru ꞌmanharĩ hã, duré ẽtẽ waipo prã prata ꞌmanharĩ hã, duré wede ꞌmanharĩ hã, duré zéꞌa ꞌmanharĩ hã. Nima norĩ hã, marĩ da hã wẽ uptabi di, marĩ hã da te ãma ꞌre iꞌmanharĩ zaꞌra mono zéb da hã. Duré nima norĩ hã marĩ da hã wẽ uptabi õ di, marĩ hã da te ãma ꞌre iꞌmanharĩ zaꞌra mono zéb da hã.
21 Tane niꞌwam norĩ hã te aima iwaihuꞌu mono zéb zarina, tô senaiꞌõ na rowasuꞌuꞌwa nhimiroti hã te te siwi ꞌre wẽꞌõ pese zaꞌra mono wamhã, Wanhibꞌapito ma, wẽ uptabi di za, romhuri hã za te te tãma ꞌre iꞌapisutu mono da hã. Ãne wa, Wanhibꞌapito ma, sisõmri zaꞌra wa, te za tãma pisutu zaꞌra, iwẽ na te te tãma ꞌre dapawaptob zaꞌra mono da.
22 Ãne wa, dahâiba téb ré, dawasété zô ꞌre idasiwasutu zaꞌra mono norĩ ne, ꞌre aihâimana mono õ di za. Te za asina ꞌre irosaꞌrata uꞌâsi mo, aihâimana wẽ na ꞌre aihâimana mono da, duré Wanhibꞌapito umnhasi sina ꞌre aihâimana mono da zama, duré asimizawi pese na ꞌre aihâimana mono da zama, duré rowẽ na si dasiré ꞌre aihâimana mono da zama. Taha da, te za asina ꞌre irosaꞌrata uꞌâsi mo, uburé Wanhibꞌapito zazeiꞌwa norĩ me, hâimana wẽ sina, isimipawaptobzéb zô te te tiwi ꞌre irowaptẽrẽ zaꞌra mono norĩ me.
23 Siwaꞌru marĩ na ꞌre dasisadaꞌâbâ zaꞌra mono wamhã, ꞌre dawapari mono õ di za. Ãne na, ꞌre dasisadaꞌâbâ zaꞌra mono wamhã, te za oto damreme na ꞌre dasiꞌwapé zaꞌra. Ãne na hã aima waihuꞌu pese di.
24 Niꞌwa hã Wanhibꞌapito ma romhuriꞌwa na ꞌre hâimana mono wamhã, timreme na te te ꞌre daꞌaꞌwapéi mono õ di za. Simizawi pese na te za dama ꞌre hâimana, aihĩni ma. Waimri na te za duré te te dama ꞌre arowaihuꞌu, waptu na dazada ꞌre sahi mono ãna.
25 2:25-26 Niꞌwam norĩ hã isimiroti na sada ꞌre hâimana zaꞌra mono wamhã, atãma te za tinhimiroti wẽ na te te ꞌre pawaptob zaꞌra, tinhimirosaꞌrata na te te ãma saprĩ zaꞌra da, Wamama nhimiroti hã tô sena na te te sina waihuꞌu zaꞌra da oto, isimipawaptobzéb zarina. Waꞌuburé norĩ nhibꞌapito hã ma tô aré tãma ꞌre sadawa nhipese zaꞌra, te te sima ꞌre idaꞌawẽ mono zéb uwaibaba, isimiroti na ꞌre hâimana zaꞌra mono da. Tane nherẽ, aꞌuwẽ norĩ hã tinhimirosaꞌrata na te te ãma saprĩ zaꞌra wamhã, te za oto Waꞌuburé nhimiroti hawi ꞌre wairébé. Taha da, te za Wanhibꞌapito ma romhuriꞌwa hã atãma te te ꞌre apawapto, tinhimiroti wẽ na hã.
26 ꞌMadâꞌâ 2:25
