Provébiu 8:1-36
8 Asiwi wapari aba! Rowaihu iwẽ hã te hârâ ꞌrãihâ na te te ꞌre daꞌaꞌmahârâ, duré iꞌrãi waihuꞌu pese zama hã.
2 Rowaihu iwẽ hã te ẽtẽ nhisiwi ꞌre hâimana, bâdâdi zadaꞌré ãma, duré bâdâdi norĩ hã isiꞌrahâri zaꞌra ãma.
3 ꞌRi nhoꞌõmo tẽme bâdâdi wa, ꞌridawa nhoꞌu ihâimana ꞌrata te hârâ ꞌrãihâ na te te daꞌaꞌmahârâ, ãne:
4 “Uburé wa aiꞌmahârâ zaꞌra waꞌwa, ropâ ꞌre iꞌaihâimana zaꞌra waꞌaba mono norĩ hã.
5 Asimirowaihuꞌu wẽ prã na ꞌre iꞌaihâimana zaꞌra waꞌaba mono norĩ, maꞌãpé rowaihu iwẽ hã ꞌre waihuꞌu zaꞌra waꞌaba mono. Duré asimizaꞌrese ãna ꞌre iꞌaihâimana zaꞌra waꞌaba mono norĩ, asimizaꞌrese wẽ zé hã te za oto ꞌre iwaihuꞌu zaꞌra waꞌaba mo.
6 Asiwi ĩwapari aba, marĩ ipire na te aima inharĩ zaꞌra waꞌaba zém na hã. Uburé marĩ na te inharĩ mono zé hã iꞌuwaibaba si.
7 Sena na wa ĩzaihâ na te ꞌre nharĩ uꞌâsi. E marĩ wa. Dazadawa nhipese da, ꞌre ĩnhitiꞌrui mono wa.
8 Uburé wa marĩ na sena na ãma rowasuꞌu.Ĩzadawa nhipese na hã, duré senai õ na hã te ãma nharĩ mono õ di.
9 Niꞌwam norĩ ma, iꞌrãi waihuꞌu wẽ, tãma ꞌre hâimana zaꞌra mono wamhã, ĩmreme hã tãma pibu pese zaꞌra di.Duré rowaihuꞌu wẽ ꞌwa norĩ ma hã, tãma wapu zaꞌra di, te te ꞌre iwaihuꞌu zaꞌra mono da hã.
10 Maꞌãpé aima ĩnhimirotizé, ẽtẽ waipo prã prata nhibrobꞌre, asima ꞌre wẽ zaꞌra waꞌaba mono.Duré ĩnhimirowaihu, ẽtẽ waipo pré oru uptabi nhibrobꞌre, asima ꞌre pisutu zaꞌra waꞌaba mono.
11 “E marĩ wa. Rowaihu iwẽ hã ẽtẽꞌubuzi waipo nhipai u hã wẽ uptabi di.Uburé marĩ ꞌre iꞌruiwapari zaꞌra waꞌaba mono hã tarére õhõ ma hã.
12 Wa hã, Rowaihu iwẽ, wa tô ꞌre ĩhâimana, ĩꞌrãi waihuꞌu wẽ siré, duré ĩnhimizaꞌrese wẽ siré.
13 Uburé Danhibꞌapito, da te ꞌre wazéb zaꞌra mono wamhã, uburé marĩ iwasété da, ꞌre idanhitiꞌru zaꞌra mono zé, te wasuꞌu.ꞌRâwi ꞌre idasiꞌmadâꞌâ ze zaꞌra mono zé hã ĩma ꞌru ti, dasina ꞌre idawata zaꞌra mono zéb zama, dahâimana wasété zama, duré damreme wasété zama.
14 Ĩnhimiroti iwẽ zarina, wa tô te ꞌre daꞌapawapto, marĩ iwẽ hã da te ãma ꞌre ꞌmanharĩ wẽ zaꞌra mono da.Ĩnhimizaꞌre hã te ĩma ꞌre hâimana. Ĩnhiptete di, duré wa hã.
15 Ĩnhimiwaihuꞌu pese zarina danhibꞌihâꞌa norĩ nhimiꞌmadâꞌâzé hã. Wa duré dama iꞌrãnhoꞌõmo norĩ hã te ꞌre apawapto, roti iwẽ te te dama ꞌre ꞌmanharĩ zaꞌra mono da ãma.
16 Dama iꞌrãnhoꞌõmo na ꞌre ihâimana zaꞌra mono norĩ, duré uburé tiꞌai mono bâ dama ipire na ꞌre ihâimana zaꞌra mono norĩ zama, te ĩnhimipawaptobzéb zarina te te ꞌre daꞌmadâꞌâ zaꞌra.
17 “Ĩzawi pese ꞌwa norĩ hã ĩma sawi pese di.Niꞌwa ĩzô rĩtĩ wamhã, te za ĩnhopẽtẽ.
18 Ĩhawip si danhimarĩ pe, dawazébzé hã, duré ꞌre idasisimarĩ ahâ pese zaꞌra mono zé hã.
19 Uburé te dama ꞌre iꞌanhomri mono hã wẽ uptabi di, ẽtẽ waipo pré oru nhipai u hã, duré ẽtẽ waipo prã prata nhipai u hã.
20 Wa hã bâdâdi sena na ꞌre ĩhâimana mono na wa ꞌre mo. Duré iꞌuwaibaba zarina si wa ꞌre mo.
21 Ĩzawi pese ꞌwa norĩ hã wa te te ꞌre pisutu uꞌâsi zaꞌra, ꞌre simarĩ ahâ pese zaꞌra mono da hã. Wa duré isimirob zaꞌra zé isõrõwa ꞌremhã te tãma ãma ꞌre aꞌrinhito.
22 “Uburé Danhibꞌapito, uburé marĩ te te apoto mono wana ré, duré marĩ poto na duréi uptabi te te ãma sãnaꞌrata wana ré, ma tô wa hã ĩꞌmanha.
23 Duréi uptabi ma tô, tô ĩꞌmanha, zahadu ropodo hã sãnaꞌrata mono õ ré.
24 Zahadu â poré mono hã duré â naꞌrata mono hã hâimana zaꞌra õ ré, wa tô podo.
25 Ẽtẽ ꞌrãihâ norĩ hã duré ẽtẽ ꞌrãihâ prã norĩ hã zahadu ꞌre isimasa mono zéb da hã te te tãma pisutu zaꞌra wana ré, wa tô podo,
26 ꞌRe ihâimana uꞌâsi mono, zahadu tiꞌa hã, tiꞌai haré hã duré tiꞌa zapru hã te te ꞌmanharĩ zaꞌra wana ré.
27 Wa hã hâiwa ꞌre saꞌwari mono da, te te ipisutuzéb ãma, duré â poré norĩ nhisiwi ꞌre saꞌwari mono da, te te iparapo ãma wa tô ĩhâiba.
28 Hâiwaꞌa hã romnhisiwi ꞌre saꞌwari mono da, te te tãma ipisutuzéb ãma, duré â naꞌrada te te tãma iꞌridawazéb ãma, wa tô ĩhâiba.
29 Isadaꞌré zaꞌra nhipai u â hã ꞌre puꞌu zaꞌra mono tõ da, te te tãma iwaihuꞌu zaꞌra zéb ãma, duré tiꞌa nhanaꞌrata da, te te iꞌanhorézéb ãma zama wa tô ĩhâiba.
30 Robꞌmanharĩ nhipese ꞌwa na hã wa tô isababamhã ꞌre ĩhâimana. Bâtâ sidâpâsi wa tô duré tãma rowẽ zaniꞌwa na hã ꞌre ĩhâimana. Duré wa hã isõꞌremhã wa tô ĩtoi uꞌâsi na ꞌre ĩhâimana.
31 Te te iꞌaropoto mono zém na hã ma tô ãma ĩma te te ꞌre arowẽ zani, aꞌuwẽ norĩ na zama, uburé hã.
32 “Tahawa, ipréduptém norĩ, asiwi ĩwapari pese aba! Te aima irowasuꞌu zaꞌra waꞌaba zé ꞌre ꞌmanharĩ zaꞌra waꞌaba mono wamhã, te za rowẽ uptabi na hã ꞌre aihâimana zaꞌra waꞌaba mo.
33 Maꞌãpé aima ĩnhimiroti zaꞌra waꞌaba zé hã wapari pese zaꞌra waꞌaba. Aiꞌrãi waihuꞌu wẽ na ꞌre aihâimana zaꞌra waꞌaba mono. Te aima irowaihuꞌu zaꞌra waꞌaba zé hã asiwi rẽme aba tõ.
34 Niꞌwa hã te te ꞌre ĩwapari pese mono hã te za tãma robze sina ꞌre hâimana, ĩnhorõwa ꞌridawa ãma tame ĩzô bâtâ sidâpâsi ꞌre isimipari mono hã.
35 E marĩ wa. Niꞌwa hã te te ĩnhopẽtẽ wamhã, te za rowẽ na ꞌre ihâimana uꞌâsi mono zé hã sõpẽtẽ. Ãne wamhã, Uburé Danhibꞌapito tãma ipẽꞌẽto zarina, te za wẽsã.
36 Tane nherẽ, niꞌwam norĩ hã ĩwi sina ꞌre ipahâ zaꞌra mono hã te za ꞌrâwi ꞌre siwamnarĩ zaꞌra. Uburé ĩzada ꞌre isitiꞌrui wairébé mono hã te tidâꞌâzép si hã te te sima ꞌre sawi zaꞌra.”
