Tô tsena te atsima ĩwẽ aimrodzé duré ate família norĩ te te tsima rowẽ dzaꞌra da. Tadzahã, ãté nimahã na hã marĩ ĩpipa te dza watobro, taha wa ãté robdzei õ di dza. (Marcos 6:31) Tadzahã Höimanaꞌuꞌö te natsi waꞌãma aime dzaꞌra wa te tãma hö dzaꞌra da marĩ ĩpire wadzô watobro dzaꞌra wamhã. Ta norĩ hã Bíblia nhimiroti wapari wamhã a hã duré ate família ropire wi te dza atsiwatsutu dzaꞌra.

BÍBLIA DZARINA: Höimanaꞌuꞌö ‘te te ꞌre aiꞌmadöꞌö wẽ dzaꞌra waꞌwa. Tahawa, marĩ na ꞌre aihötöꞌö dzaꞌra waꞌaba mono wamhã, te dza tãma ꞌre atsiwatsuꞌu dzaꞌra waꞌaba mo.’ (1 Pedro 5:7) Atsipoꞌre puꞌu marĩ watsété atsô watobro wamhã, Höimanaꞌuꞌö te ĩꞌupai õ na hã. (Tiago 1:13) Jeová u ĩtẽme aiwitsi wamhã, õhõ te dza ãma udzutsi te te aipawaptob petse da. (Hebreus 13:6) ‘Uburé Danhibꞌapito nhoꞌremhã, wa tô tãma watsuꞌu, te ĩrobdzépatadzé hã.’ — 1 Samuel 1:15.

Bötö bö tsõré wamhã, duré romnhoré wamhã Bíblia na, aima rowẽ uꞌötsi di dza aipẽꞌẽ ꞌremhã. Ãne te dza ĩwaihu Jeová dza te te ĩꞌmanharĩ na hã, uburé marĩ ĩpire te wawi ꞌre roꞌwaꞌré dzaꞌra mono wamhã, ‘te te ꞌre waꞌapawaptob uꞌötsi, wapẽ hã ĩꞌre wama ꞌre tsimiꞌwara uꞌötsi mono da.’ (2 Coríntios 1:3, 4; Romanos 15:4) Õhõ ma tô ropitsutu dza te te aima ĩtsõmri na hã ‘rowẽ hã, dama ꞌre ĩwaihuꞌu dzaꞌra mono õ hã.’ — Filipenses 4:6, 7, 13.

TAHA DA ATSIPTETE:

• Rowaptẽrẽ Jeová wi atãma na ꞌre aihöimana mono da, duré rotsaꞌrata wẽ da.

• Taha parimhã rotsaꞌrata petse uburé marĩ norĩ ãma hã, duré atsima pitsutu marĩ aima danhipai u ĩwẽ.

BÍBLIA DZARINA: ‘Ĩꞌrãiwaihuꞌu wẽ ꞌre ĩhöimana mono hã te õne uꞌö tipẽꞌẽ na marĩ te te ꞌre ĩwaihuꞌu mono da hã tsô ꞌre tsiꞌwapé.’ (Provérbios 18:15) Atsõrõwa ꞌremhã ꞌre ꞌmadöꞌö petse. Tsina waihuꞌu dahöiba mono bö atsõrõwa ꞌre duré marĩ dzô tiwi ꞌre ĩꞌrowaptöꞌö dzaꞌra mono na hã. Tãma robdzanhamri dzaꞌra na. Wapari ĩmreme dzaꞌra hã. — Provérbios 20:5.

Niꞌwa bété aima ĩtsawi pe döꞌö wamhã, höiꞌré na aipẽꞌẽdzé hã. Ãma aipoꞌre puꞌu, pẽꞌẽdzé tsaꞌẽtẽ wa ‘te aiwaꞌõ, Jesus hã.’ (João 11:35; Gênesis 23:2) Ĩpire dawaꞌudu duré aptö hã wa te ãma höpãrĩ da hã. (Marcos 6:31) Tahã te dza aipawapto tsadzöri tõ da marĩ ropire atsô watobro wamhã.

TAHA DA ATSIPTETE:

• Oto tsiptete ate família norĩ me atsima robdzanhamri dzaꞌra waꞌaba da. Awaꞌawi hã ãma tsãnaꞌrata taha da. Ãne wamhã, ate família norĩ te dza tsima wẽ dzaꞌra te te tsima robdzanhamri dzaꞌra da marĩ ropire watobro wamhã.

• Robdzanhamri niꞌwam norĩ ma hã atsine te te ĩrobdzépata dzaꞌra na hã.

BÍBLIA DZARINA: ‘Niꞌwa hã te dza titsiwaihu te te ꞌre tsawi uꞌötsi. Ropipa hã tsô watobro wamhã, te dza ĩtsitsãnawã ne hã tãma ꞌre höimana.’ (Provérbios 17:17) Atsiwaihuꞌu norĩ te tsima wẽ dzaꞌra te te aipawaptob dzaꞌra da, tadzahã ãté te te waihuꞌu dzaꞌra õ di marĩ te aiwi tsô ĩrowaptöꞌö na hã. Taha wa, tãma watsuꞌu dzaꞌra na. (Provérbios 12:25) Taha nhipai u tsô ĩꞌairĩti da tsi niꞌwam norĩ Bíblia na te te ĩwaihuꞌu dzaꞌra na hã. Õ norĩ hã te dza aima höiꞌré dzaꞌra Höimanaꞌuꞌö nhimiroti ĩwẽ aima hã. — Tiago 5:14.

Pitsutu atsiré ꞌre ĩhöimana dzaꞌra da hã niꞌwam norĩ Höimanaꞌuꞌö na te te ĩꞌumnhatsi dzaꞌra duré ãma ĩtsimidzadze dzaꞌra, ãne hã ĩtsada hã te te aipawaptob dzaꞌra da apö. Duré aima rowẽ di aipẽꞌẽ ꞌremhã, te dza aipẽꞌẽ hiri ni pawapto wamhã niꞌwam norĩ te te ĩrobdzépata dzaꞌra na hã. Tãma watsuꞌu dzaꞌra na atsimidzadzedzé Jeová ãma ĩtsimiropitsutu dzama. Taré ꞌre aihöimana mono õ di dza, taha waꞌrãmimhã tsada ꞌre atsiptete uꞌötsi mono ꞌre daꞌapawapto mono da, duré niꞌwam norĩ hã te te aiꞌãma ĩrotsaꞌrata dzaꞌra na hã duré tãma ĩꞌatsawi dzaꞌra na hã tsiré ꞌre aihöimana mono da. — Provérbios 18:1; 1 Coríntios 15:58.

TAHA DA ATSIPTETE:

• Robdzanhamri atsiwaihuꞌu umnhatsi tsina hã duré tsaꞌré na te te aipawaptob da.

• Marĩ te te aiwi roꞌwaꞌré tsõꞌawi tãma watsuꞌu na ꞌröwi aipẽꞌẽ na.