Tiagu 3:1-18
3 Ĩsisãnawã norĩ, asiré ꞌre iꞌaihâimana zaꞌra waꞌaba mono hã, aiꞌahâ na dama rowahutuꞌwa na ꞌre aihâimana zaꞌra waꞌaba mono õ di za, aima waihuꞌu pese zaꞌra waꞌaba wa, wa te dama ꞌre irowahutu zaꞌra mono hã, Wanhibꞌapito hã danhipai u pire na za te te waꞌãma iꞌarowairébé na hã.
2 Uburé wa norĩ hã wa wahâimanazém na wa te ãma ꞌre upa zaꞌra. Niꞌwa hã timreme na te te ãma ꞌre upai mono õ wamhã, ta hã te iꞌuwaibaba na si ꞌre mo. Duré siwi ꞌre isimiꞌrãmi mono zé hã, tãma waihuꞌu pese di.
3 Awaru zadaiꞌré ꞌre, ipozé hã te te ꞌre wawapari zaꞌra mono da, wa te tãma ꞌre séme mono wamhã, tawapsi wa za wa te ꞌre simro, wa te wasima ꞌre iwẽ zaꞌra mono zéb uwaibaba.
4 Duré ãma rosaꞌrata zaꞌra waꞌaba, ubaꞌre isaꞌẽtẽ na ãma isimiré hã: Saꞌẽtẽ uptabi nherẽ, duré rowaꞌuꞌu zaꞌẽne hã za te te sari nherẽ, isuru pesere na isarizé hã, lemi na isisi na, taha na te za iꞌmaprabaꞌwa hã ꞌmapra nimomo, te te sima irowẽzéb uwaibaba.
5 Tane duré danhoto hã, dahâiba na hã surure nherẽ, te za taha na ꞌrâwi sina tiwata, marĩ saꞌẽtẽ na te te iꞌmanharĩzém na hã.
Tane duré maꞌãpé ãma rosaꞌrata zaꞌra waꞌaba, marã na hã. Saꞌẽtẽ uptabi nherẽ, te za pré siꞌubuzi surure nherẽ, ãma sazu, sihõmo mono da.
6 Tane duré, danhoto hã unhama ne. Ta hã siptete uptabi di, uburé marĩ iwasédé te te ꞌre iꞌabꞌmanharĩ mono da hã. Dahâiba na te ꞌre hâimana. Tawamhã te za uburé dahâiba hã wamna. Duré tiꞌai ãma dahâimana ꞌrãsutu u te za ãma sazu, unhama na marĩ, da te ãma ꞌre isazu zaꞌra mono ne, tô õ hã danhoto hã ropipa hawi unhama na ꞌre hâimana mono wa.
7 Aꞌuwẽ norĩ hã, uburé abaze ipoto mono bâ ꞌre ihâimana zaꞌra mono norĩ ma hã, siptete na ꞌre hâimana waihuꞌu pese zaꞌra mono di, si norĩ ma, diꞌi na ꞌre inomro mono norĩ ma, duré â ꞌrowi ꞌre inomro mono norĩ ma zama.
8 Tane nherẽ, danhoto ma hã, niꞌwa siptete na hâimana waihuꞌu õ di. Ta hã iwasédé, tiwi idasitété waihuꞌu õ. Duré wahi ꞌwa waꞌu ne hã isé uptabi, isipãrĩ pe.
9 Wanhoto na hã wa ꞌre wawata zaꞌra, Uburé Danhibꞌapito Wamama ãma hã. Duré taha na, wa marĩ iwasédé wa te dama ꞌre pisutu zaꞌra, ꞌRe ihâimana uꞌâsi mono, tisine te te idaꞌapoto norĩ ma hã.
10 Tô dazadawa hawip si misi hawim nherẽ, te ꞌre wairébé, damreme ꞌRe ihâimana uꞌâsi mono ãma ꞌre idawata zaꞌra mono zé hã, duré marĩ iwasédé da te dama ꞌre ipisutu zaꞌra mono zé hã. Ĩsisãnawã norĩ, ãne hã ꞌre romhâimana mono tõ.
11 Maꞌãpé ãma rosaꞌrata pese zaꞌra waꞌaba! E ubꞌre hawimhã siré puꞌu waihuꞌu pese zahuré di, â ise hã duré â iwarĩrĩ zé me hã.
12 Ĩsisãnawã norĩ, e robꞌrã figu wede hã ꞌrãi waihuꞌu pese bâ, azeitona na hã. Duré niwamhã, e uva ꞌru hã ꞌrãi waihuꞌu pese bâ, robꞌrã figu na hã. Tane duré, ubꞌre hawimhã siré puꞌu waihuꞌu zahuré õ di, â warĩrĩ hã, â isei me hã.
ꞌRe ihâimana uꞌâsi mono hawi rowaihu tô sena hã
13 E ꞌwa hã dahâimanazém na rowaihu iwẽ waihuꞌu pese ꞌwa, duré iꞌrã nhimizaꞌre, asiré zaꞌra waꞌaba hã. Ta hã te te hâiꞌré pé, tihâimanazé iwẽ na hã, marĩ te te ꞌre iꞌabꞌmanharĩ mono zém na, tipire na ꞌre siꞌmadâꞌâ mono ãna, rowaihu iwẽ tãma ihâimanazéb zarina hã.
14 Tane nherẽ, aipẽꞌẽ ꞌremhã marĩ na asiminhoꞌru zaꞌra waꞌwa, duré aipẽꞌẽ ꞌre, marĩ ꞌre isépata zaꞌra waꞌaba mono zé hã, duré aihâiba pisutu asima si marĩ ꞌre iwẽ zaꞌra waꞌaba mono zé hã aima ꞌre hâimana zaꞌra waꞌaba mono wamhã, taha na ꞌrâwi asina ꞌre aiwata zaꞌra waꞌaba mono tõ, ãne hã rowaihu iwẽ hã aima ꞌre ihâimana zaꞌra waꞌaba mono na hã. Duré tô sena hã ꞌRe ihâimana uꞌâsi mono nhimiroti, ꞌre udâ zaꞌra waꞌaba mono tõ.
15 Ãne na “rowaihu hã” hâiwa hawib õ di. Ta hã tiꞌai ꞌre, danhimirowaihu, dasihawimhã. ꞌRe ihâimana uꞌâsi mono Pẽꞌẽzani hawib õ di. Tazahã Waꞌuburé hawimhã.
16 E marĩ wa. Marĩ na danhiminhoꞌru, duré dahâiba pisutu dasima si marĩ wẽ hã dama ꞌre hâimana zaꞌra mono wamhã, siwaꞌru te za tawamhã ꞌre dahâimana zaꞌra, siwaꞌru uburé marĩ iwasédé, da te ꞌre iꞌmanharĩ zaꞌra mono na si.
17 Tazahã, hâiwa hawi rowaihu iwẽ na hã, uburé marĩ nhipai u ãma ꞌre ihâimana mono hã, ã hã: Marĩ iwasédé, ãma ꞌre ihâimana mono õ. Duré isãnaꞌremhã romhâriꞌwa sena na dama ihâimana, isimizawi pe, daꞌãma isiwãrĩ pe, daꞌãma isiba pe, duré dama marĩ ꞌmanharĩ wẽ ꞌwa, isimibaꞌa õ, duré sena na dama ihâimana.
18 Amnho iwẽ hã da te ꞌre itehâri zaꞌra mono ne, te za rowẽ hã tãma ꞌre hâimana zaꞌra, romhâriꞌwa sena na dama ꞌre ihâimana zaꞌra mono norĩ ma hã, iꞌuwaibaba na si marĩ te te ꞌre iꞌmanharĩ zaꞌra mono waꞌrãmimhã.
