Galata 5:1-26
5 Zezu Cristu hã ma tô waꞌanhoꞌreptui pa, rowẽ na ãma ꞌre wahâimana zaꞌra mono da. Tahawa, ꞌRe ihâimana uꞌâsi mono nhimiroti ꞌrata na robꞌuiꞌéré zarina, wa te ꞌre irobꞌmanharĩ zaꞌra mono zém na, ꞌre wanhopré mono õ di za oto, taha zarina te te õ hã ꞌre waꞌanhoꞌreptui mono õ wa oto. Ãne wa, tô senaiꞌõ na rowasuꞌuꞌwa norĩ wi ꞌre asiptete zaꞌra waꞌaba mono za oto, isimiroti na ꞌre aihâimana zaꞌra waꞌaba mono wa, apâ robzeiꞌõ na ꞌre anomro aba mono tõ da.
2 Maꞌãpé asina ĩwapari pese zaꞌra waꞌaba za. Wa hã Paulu, marĩ hã wa za aima waihuꞌu zaꞌra waꞌwa. Da te ꞌre asihâiwata nhihâri zaꞌra waꞌaba mono da, asizudeu zaꞌra waꞌaba da, asina ꞌre dazaze zaꞌra waꞌaba mono wa, taha zarina ꞌRe ihâimana uꞌâsi mono te te ꞌre asõꞌreptu zaꞌra waꞌaba mono da newa, e niha za tawamhã, ãne wamhã. Cristu hã wazada dâꞌâ zaꞌra nherẽ, te te ꞌre waꞌanhoꞌreptui mono da, e taré te za ã hã bété ꞌre hâimana, asada zaꞌra waꞌaba idâꞌâzé hã.
3 Wa za duré aima ãma sahu zaꞌra waꞌwa, te aima iwaihuꞌu zaꞌra waꞌaba zém na hã. Niꞌwam norĩ hã da te sihâiwata nhihâri zaꞌra da, te te sina ꞌre dazaze zaꞌra mono wamhã, taha zarina ꞌRe ihâimana uꞌâsi mono hã te te ꞌre sõꞌreptu zaꞌra mono da newa, e niha te za tawamhã ꞌre hâimana zaꞌra, ta norĩ hã. Danhihâiwata nhihâri siré, te za õne haré ꞌRe ihâimana uꞌâsi mono nhimiroti mono bâ te te sina tãma ãma ꞌre uwaimrami zaꞌra, ꞌRe ihâimana uꞌâsi mono te te siwi ꞌre awẽꞌõ tõ mono da.
4 Zudeu norĩ ne, ma tô ꞌrâwimhã ꞌre asiꞌmaiꞌmadâꞌâ aba mo, ꞌRe ihâimana uꞌâsi mono nhimiroti ꞌrata na robꞌuiꞌéré zarina ꞌre robꞌmanharĩ zaꞌra waꞌaba mono da hã, taha zarina, ꞌRe ihâimana uꞌâsi mono, aiwasété zaꞌra waꞌwa hã te te u aiꞌãma ꞌre abꞌmadâꞌâ aba mono õ wa, te te u duré ãma ꞌre aiwẽsãmri zaꞌra waꞌaba mono da hã, taha zarina aiwasété zaꞌra waꞌaba ꞌru te, te te u duré ꞌre aihâ zaꞌra waꞌaba mono tõ da, za irobꞌrãsutuzéb ãma hã. Ãne taré ꞌmairosaꞌrata aba wamhã, ma tô Zezu Cristuhu wi asina aiꞌmaipahâ waꞌwa, asimirosaꞌrata na. Ãhã wa, ma tô ꞌrâwi asiwi iꞌmaiwẽꞌõ waꞌwa, ꞌRe ihâimana uꞌâsi mono nhoprubzé hã Cristu tidâꞌâzém na, te te ꞌre idaꞌanhoꞌreptui mono zéb da hã.
5 Ãnei õ di, wa norĩ hã. Cristu Danhoꞌreptuiꞌwa na, wa tô wasina wa te ꞌre saze zaꞌra. Taha zarina, wa wasina sô ꞌre wanhimipari zaꞌra, robꞌrãsutuzéb ãma, ꞌRe ihâimana uꞌâsi mono te te wama iwaihuꞌu zaꞌra zéb zô, wawasédé te te oto waꞌãma ꞌre iꞌabꞌmadâꞌâ mono õ zéb zarina, te te ꞌre iwaꞌawẽsãmri mono zém na. Ãne ꞌRe ihâimana uꞌâsi mono pẽꞌẽzani te te wama ꞌre iꞌawaihuꞌu mono zéb zarina, wa wasina sô ꞌre wanhimipari zaꞌra oto.
6 Simisutu Cristu Zezusihi nhibꞌaꞌuwẽ oto ꞌre wanomro mono wamhã, ꞌRe ihâimana uꞌâsi mono hã te te ꞌre waꞌabaꞌa mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeuꞌõ na ꞌre iwahâimana zaꞌra mono zém na hã, te te oto ꞌre waꞌawaihuꞌu mono õ di za. Zezu Cristu Danhoꞌreptuiꞌwa na, wa te wasina ꞌre umnhasi zaꞌra mono wa, wanhimizawi pese na ꞌre iwahâimana zaꞌra mono zém na si, te za oto te te ꞌre waꞌawaihuꞌu, ꞌRe ihâimana uꞌâsi mono hã.
7 A norĩ waꞌwa hã ma tô aré tô sena rowasuꞌu na ꞌre anomro aba mo. E ꞌwa simirowasuꞌu hawi, ma tô sena rowasuꞌu na asima ãma apa zaꞌra waꞌwa.
8 E asima ãma apa zaꞌra waꞌaba da, ma tô ꞌRe ihâimana uꞌâsi mono hã aima waihuꞌu zaꞌra waꞌwa, sima asô ihârâ zaꞌra waꞌwa hã. Mare di.
9 Iꞌrada hã wa za aima sadawa wahutu zaꞌra waꞌwa, ãne: “Iꞌuꞌẽtẽ wapuzé hã surure na da te ahiri nherẽ, te za ãma timapu, iꞌuꞌẽtẽ wapu hã.” Tane duré aimawi na, da te dama ꞌre rowasuꞌu zaꞌra mono wamhã, te za da te ãma ꞌre ropé, rowasuꞌu senaiꞌõ na hã.
10 Tane nherẽ, simisutu Wanhibꞌapito nhibꞌaꞌuwẽ ꞌre wanomro mono wa, wa za te ꞌre aiꞌumnhasi zaꞌra waꞌwa, te aima iwaihuꞌu zaꞌra waꞌaba zéb zarina si, za apâ ꞌre aihâimana zaꞌra waꞌaba mono na. Aibâ hã dama pire na ꞌre hâimana mono nherẽ, aimawi tinhimirowasuꞌu na te te aiwi ꞌre roꞌwaꞌrutu zaꞌra waꞌaba mono wa, tãma ꞌre rowẽ mono õ di za, ta hã ꞌRe ihâimana uꞌâsi mono si za te te azâri wa.
11 Ĩsisãnawã norĩ, wedepoꞌo nhonhiꞌrãmi na Zezu Cristu dazada idâꞌâzé hã wa tô te dama ꞌre wasuꞌu uꞌâsi, da te ãma ꞌre saze zaꞌra mono da. Tahawa, ma tô zudeu norĩ hã te te siwi ꞌre ĩwẽꞌõ zaꞌra, imreme zarina te dama ꞌre rowasuꞌu mono õ wa, u, tãma zaꞌra hã. Ta norĩ hã te duré taré te te dama ꞌre ĩwasuꞌu zaꞌra, danhihâiwata nhihâri wapsi, ꞌre dasizudeu zaꞌra mono da, te dama ꞌre awaihuꞌu mono newa. Ãne zahadu zudeuꞌõ norĩ ma, te ꞌre arowaihuꞌu mono ꞌwaꞌâhã, e te aré zudeu norĩ hã te te siwi ꞌre ĩwẽꞌõ zaꞌra, te dama ꞌre irowasuꞌu mono zém na hã. Mare di. Te te siwi ꞌre ĩwẽꞌõ zaꞌra mono õ di aré ãma hã.
12 Aimawi tinhimirowasuꞌu na te te aiwi ꞌre iroꞌwaꞌrutu zaꞌra waꞌaba mono norĩ hã, tinhihâiwata nhihâri siré, te za pé tane wamhã ta norĩ hã ꞌre siꞌre zani zaꞌra, wẽ te bâ.
13 Ĩsisãnawã norĩ, ꞌRe ihâimana uꞌâsi mono hã ma tô aima pisutu zaꞌra waꞌwa, rowẽ na ãma ꞌre aihâimana zaꞌra waꞌaba mono da, isimiroti na robꞌuiꞌéré ꞌrata zarina, ꞌre irobꞌmanharĩ zaꞌra waꞌaba mono zém na ꞌre asõpré waꞌaba mono tõ da, taha zarina, ꞌRe ihâimana uꞌâsi mono te te ꞌre asõꞌreptu zaꞌra waꞌaba mono dai õ wa. Tane nherẽ, rowẽ na ꞌRe ihâimana uꞌâsi mono ãma ꞌre aihâimana zaꞌra waꞌaba mono wẽ te, marĩ iwẽꞌõ na aipẽꞌẽ ꞌre, asima ꞌre rosaꞌrata zaꞌra waꞌaba mono wamhã, asina hã ãma ꞌre robꞌmanharĩ zaꞌra waꞌaba mono õ di za. Ãne te za oto ꞌre anomro aba mo. Asimizawi pese zaꞌra waꞌaba zéb zarina si, te za ꞌre asipawaptob zaꞌra waꞌaba mo niha wamhã asibꞌrata na, duré asimarĩ na zama, duré asimiroti na zama hã.
14 ꞌRe ihâimana uꞌâsi mono nhimiroti ꞌrada hã ahâ uptabi nherẽ, simisutu haré te wasuꞌu, isimiroti hã ãne: “Maꞌãpé, ꞌre dazawi pese zaꞌra waꞌaba mono za. Marĩ iwẽ na asima ꞌre irosaꞌrata zaꞌra waꞌaba mono ne, te za duré dama zama sô ꞌre asõpré waꞌaba mo.” Ãne si isimiroti hã.
15 Tane nherẽ, abaze zahi ꞌre isisimroi mono ne, asisada ꞌre asitiꞌrui uꞌâsi zaꞌra waꞌaba mono wamhã, asina asapaꞌa zaꞌra waꞌaba õ di za.
Wamama pẽꞌẽzani nhimiwadaꞌuri zarina si, rowẽ na ꞌre idanomro mono zém na rowasuꞌu
16 5:16-17 Wa norĩ hã marĩ iwẽꞌõ na ãté ꞌrâwi wapẽꞌẽ ꞌre, wa za wasima wa te ꞌre rosaꞌrata zaꞌra. Ãne na te te sima ꞌre waꞌawẽ mono õ di, ꞌRe ihâimana uꞌâsi mono pẽꞌẽzani hã. Marĩ iwẽ na si ꞌrâwi wapẽꞌẽ ꞌre, wa te wasima ꞌre rosaꞌrata zaꞌra mono da, te za te te sima ꞌre waꞌawẽ. Tawamhã marĩ iwẽꞌõ na ꞌrâwi wapẽꞌẽ ꞌre, wa te wasima ꞌre rosaꞌrata zaꞌra mono wamhã, te za te te ꞌre waꞌaꞌuwati, ꞌRe ihâimana uꞌâsi mono pẽꞌẽzani hã, wa te wasima ãma ꞌre robꞌmanharĩ zaꞌra mono tõ da. Tahawa, wa za ãne aima waihuꞌu zaꞌra waꞌwa. Maꞌãpé, ꞌRe ihâimana uꞌâsi mono pẽꞌẽzani nhimiwadaꞌuri zarina si, ꞌre anomro aba mono za oto. Tawamhã siwaꞌru marĩ iwẽꞌõ na aipẽꞌẽ ꞌre asima ꞌre rosaꞌrata zaꞌra waꞌaba mono nherẽ, asina hã ꞌre robꞌmanharĩ zaꞌra waꞌaba mono õ di za.
17 ꞌMadâꞌâ 5:16
18 Ãne ꞌRe ihâimana uꞌâsi mono pẽꞌẽzani nhimiwadaꞌuri zarina si, ꞌre aihâimana zaꞌra waꞌaba mono wamhã, isimiroti na robꞌuiꞌéré ꞌrata zarina ꞌre irobꞌmanharĩ ꞌrata zaꞌra waꞌaba mono zém na, ꞌre asõpré waꞌaba mono õ di za oto, taha zarina ꞌRe ihâimana uꞌâsi mono te te ꞌre asõꞌreptu zaꞌra waꞌaba mono dai õ wa.
19 Dasiꞌuihâ na danhimirosaꞌrata wasété zarina ꞌre idanomro mono zé wasuꞌu hã, wa tô waihuꞌu zaꞌra ni. Ãne te ꞌre danomro wasété. Siwaꞌru te tiwasédé hã piꞌõ na, duré aibâ na zama te te ꞌre ꞌmanharĩ uꞌâsi zaꞌra. Siwaꞌru te dasina ꞌre dahâimana zaꞌra. Danhiséb ãna, te marĩ iwasédé hã da te ꞌre ꞌmanharĩ zaꞌra.
20 Duré ꞌRe ihâimana uꞌâsi mono upana, te romhâiba ꞌmanharĩ ãma ꞌre dawata zaꞌra. Te duré tãma ꞌre damreme zusi. Duré abzé ꞌmanharĩꞌwa, te ꞌre danomro. Duré te ꞌre dasiꞌruiwapari zaꞌra. Te duré ꞌre dasisadaꞌâbâ zaꞌra. Duré marĩ na te ꞌre dasiꞌruiwapari zaꞌra. Dasiꞌabaꞌré na te duré ꞌre dazahi zaꞌra. Duré marĩ iwẽ zô, te dasima si ꞌre danhopré. Te duré ꞌre dasirẽme zaꞌra, ꞌrâwi dasiꞌrata ꞌre dahâimana zaꞌra mono tõ da.
21 Marĩ na te duré ꞌre dasisõꞌru zaꞌra. Duré daꞌrã siwamnarĩ na te ꞌre dahâimana zaꞌra, âzézeiꞌwa ꞌre dahâimana zaꞌra mono wa. Duré datoi wasétére u, te ꞌre dasiꞌrãꞌõtõ, siwaꞌru da te ꞌre âhuri mono da, âzé hã. Tane te duré ꞌre hâimana, da te ꞌre iꞌmanharĩ wasété zaꞌra mono zé hã. Tahawa, wa za ãma sahu, te aima iwaihuꞌu zaꞌra waꞌaba zém na hã. Ãne ꞌre danomro wasété mono wamhã, hâiwa u, ꞌRe ihâimana uꞌâsi mono u ꞌre idanhisisi mono da hã mare di, Danhibꞌapito uptabi u, iwẽ uptabi si, tinhibꞌaꞌuwẽ norĩ ma, te te tãma ꞌre iꞌanhomri mono da u.
22 Ãne ꞌre danomro wasété mono õ di za, ꞌRe ihâimana uꞌâsi mono pẽꞌẽzani nhimiwadaꞌuri zarina ꞌre danomro mono wamhã. Te za da te ꞌre dazawi pese zaꞌra. Duré dapẽꞌẽ ꞌre datoi uꞌâsi, te za ꞌre dahâimana zaꞌra. Duré dapẽꞌẽ toi uꞌâsi, te za ꞌre dahâimana zaꞌra. Duré dawara sina dasisada ꞌre dazahi zaꞌra mono õ di za. Duré danhimizawi pese na te za ꞌre dahâimana zaꞌra. Duré marĩ iwẽ na te za dama ꞌre danhoprub zaꞌra. Duré tô sena wa, ropisutu wẽ na, te za da te dama ãma ꞌre robꞌmanharĩ wẽ zaꞌra.
23 Duré dawaimri te za dama ꞌre dahâimana zaꞌra. Duré dawasété wi, dasina ꞌre danhiptete zaꞌra mono sina, te za ꞌre dahâimana zaꞌra. Ãne ꞌre dahâimana zaꞌra mono tõ da, ꞌRe ihâimana uꞌâsi mono nhimiroti hã baba uptabi di.
24 Cristu Zezusihi nhibꞌaꞌuwẽ ꞌre idahâimana zaꞌra mono norĩ hã, tiwasédé hã aré te te ꞌre ꞌmanharĩ ze zaꞌra mono nherẽ, duré tiwasété zô aré te te ꞌre rowasutu zaꞌra mono nherẽ, ꞌrâwi te za tô oto te te siwi ꞌre wẽꞌõ pese zaꞌra, te te ꞌre ꞌmanharĩ zaꞌra mono tõ da hã oto.
25 ꞌRe ihâimana uꞌâsi mono pẽꞌẽzani hã ma tô wama tisõ, wahâimanazép té hã iwẽ hã. Tahawa, maꞌãpé isimiwadaꞌuri zarina si, ꞌre wanomro wẽ waꞌaba mono oto.
26 Danhipai u, wapire na ꞌre wahâimana zaꞌra mono newa, ꞌrâwi wapẽꞌẽ na wasina ꞌre wawata zaꞌra mono õ di za, da te wama ꞌre nharĩ zaꞌra mono tõ da. Duré wanhipai u, dapire na ꞌre idahâimana zaꞌra mono na, wa te ꞌre daꞌruiwapari zaꞌra mono õ di za.
