1 Pedru 3:1-22
3 3:1-2 Tane duré piꞌõ imro ré norĩ, asimiꞌẽ na aimro hã ꞌre ꞌwapé ze zaꞌra waꞌaba mono, ꞌRe ihâimana uꞌâsi mono nhimiroti hã te te ꞌre ꞌmadâꞌâ pese zaꞌra mono õ wamhã, aihâimanazém na ꞌre ãwisi zaꞌra waꞌaba mono da iwẽ u, tãma ꞌre nharĩ zaꞌra waꞌaba mono ãna. Te za ꞌre iꞌãwisi zaꞌra waꞌaba mo, aihâimanazé, iꞌuwaibaba na ꞌre iꞌaihâimana zaꞌra waꞌaba mono zé, te te ꞌre iꞌmadâꞌâ zaꞌra mono zéb zarina, duré asimiwazé pese na ꞌre iꞌaihâimana zaꞌra waꞌaba mono zém na.
2 ꞌMadâꞌâ 3:1
3 Aiwẽ na ꞌre iꞌaihâimana zaꞌra waꞌaba mono zé hã, aima ꞌre hâimana zaꞌra waꞌaba mono tõ, aihâiba mana wawi ꞌre iꞌasibꞌmanharĩ wẽ zaꞌra waꞌaba mono zéb zarina, aséré tété aba na, duré oru na asõꞌrebzu na, aipoꞌre zaꞌru na, asipsisi na niwamhã duré aiꞌuza iwaꞌâbâ zaꞌẽtẽ na.
4 Tazahã, aiwẽ na ꞌre iꞌaihâimana zaꞌra waꞌaba mono zé hã, aipẽꞌẽ ꞌre aima ꞌre hâimana zaꞌra waꞌaba mono. Ta hã siꞌutõrĩ waihuꞌu õ di, dawẽ uptabi na ꞌre idahâimana zaꞌra mono zé hã, dawahâzé na duré dawaimri na dahâimanazé hã. Ta hã ꞌRe ihâimana uꞌâsi mono ma hã wẽ uptabi di, marĩ iwaꞌâbâ zaꞌẽtẽ uptabi ne.
5 E marĩ wa. Ãne ma tô piꞌõ norĩ hã ꞌre siꞌmanharĩ zaꞌra duréihã. ꞌRe ihâimana uꞌâsi mono si ma tô te te ꞌre umnhasi zaꞌra. Timro hã ma tô te te ꞌre wapari pese zaꞌra.
6 Sara hã ãne ma tô ꞌre hâimana. Abraꞌã hã ma tô te te ꞌre wapari pese. Ma tô duré te te ꞌre ꞌmahârâ, ãne: “Ĩnhibꞌapito.” Taha nhihudu na te za tawamhã ꞌre aihâimana zaꞌra waꞌaba mo, iwẽ si ꞌre ꞌmanharĩ zaꞌra waꞌaba mono wamhã, duré marĩ ma ꞌre aipahi zaꞌra waꞌaba mono õ wamhã.
7 Tane duré aibâ imro ré norĩ, aimro siré ꞌre iꞌaihâimana zaꞌra waꞌaba zém na, ꞌre waihuꞌu zaꞌra waꞌaba mono, piꞌõ isibꞌuware na hã. Tahawa te za ꞌre iwazé pese zaꞌra waꞌaba mo. E marĩ wa. Piꞌõ zama te za asu waꞌaba te te ꞌre waibu, dahâimanazé ꞌRe ihâimana uꞌâsi mono nhoprubzé iwẽ uptabi hã. Ãne ꞌre aihâimana zaꞌra waꞌaba mono, ꞌRe ihâimana uꞌâsi mono wi ꞌre irowaptẽrẽ zaꞌra waꞌaba mono zém na marĩ hã te te aiwi ꞌre roꞌwaꞌrutu zaꞌra waꞌaba mono tõ da.
Isazeiꞌwa norĩ hã, marĩ iwẽ te te ꞌre iꞌmanharĩ zaꞌra mono uꞌâbâ te te ꞌre irobzépata zaꞌra mono zé
8 Tawamhã iꞌrãsutu ãma hã oto, maꞌãpé uburé a norĩ waꞌwa hã aiwapsi ꞌre rosaꞌrata zaꞌra waꞌaba mono. Duré dapẽꞌẽzé zarina da te ꞌre robzépata zaꞌra mono wamhã, te za dasiré aipẽ hã ꞌre isépata zaꞌra waꞌaba mo, aipẽꞌẽzé sina. ꞌRe asisawi pese zaꞌra waꞌaba mono. Asiꞌãma ꞌre aiba zaꞌra waꞌaba mono. Duré aiwapu na asima ꞌre aihâimana zaꞌra waꞌaba mono.
9 Marĩ iwasédé hã da te aima ꞌre ꞌmanharĩ zaꞌra waꞌaba mono wamhã, asa dama ãma ꞌre waꞌrãmi zaꞌra waꞌaba mono tõ, marĩ iwasété na hã. Duré da te aiꞌãma ꞌre wasété zaꞌra waꞌaba mono wamhã, asa dama ãma ꞌre waꞌrãmi zaꞌra waꞌaba mono tõ, aimreme wasété na. Tazahã, da te aiꞌãma ꞌre wasété zaꞌra waꞌaba mono wamhã, iwaꞌrãmi daꞌãma ꞌre rowaptẽrẽ zaꞌra waꞌaba mono, ꞌRe ihâimana uꞌâsi mono wi, iwẽ hã te te dama ꞌre apisutu mono da. E marĩ wa. Ãne da, ma tô ꞌRe ihâimana uꞌâsi mono hã asô tihârâ zaꞌra waꞌwa, iwẽ hã te te dama ꞌre iꞌapisutu mono zé hã ꞌre waibui waꞌaba mono da.
10 Ãne na, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré, te nomro, ãne:“Aihâimanazé aima sawi wamhã, duré robzei uꞌâsi ꞌre aihâimana mono da wamhã, ãma ꞌre pibui pese mono, marĩ iwasété na hã ꞌre nharĩ mono tõ da, duré asada wanhipese tõ da.
11 Marĩ iwasété wi aiꞌré na. Marĩ iwẽ si ꞌre abꞌmanharĩ mono. Rowẽ zô si ꞌre airĩtĩ mono. Rosazâri tõ, sõpẽtẽ õ ré hã.
12 E marĩ wa. Uburé Danhibꞌapito hã te iꞌuwaibaba na ꞌre ihâimana zaꞌra mono norĩ hã te te ꞌre abꞌmadâꞌâ pese. Duré isimirowaptẽrẽ zaꞌra hã te te ꞌre awapari mono da hã, te sô ꞌre simirei uꞌâsi. Tazahã, marĩ iwasédé te te ꞌre iꞌmanharĩ zaꞌra mono norĩ da hã, te ꞌre hâimana.”
13 A norĩ waꞌwa hã marĩ ꞌre ꞌmanharĩ wẽ uꞌâsi zaꞌra waꞌaba mono wamhã, e ꞌwa hã te te bété marĩ aima ꞌre ꞌmanharĩ wasété zaꞌra waꞌaba mono da bâ.
14 Tane nherẽ, marĩ iwẽ ꞌre ꞌmanharĩ zaꞌra waꞌaba mono wa, ꞌre robzépata zaꞌra waꞌaba mono nherẽ, te za ꞌRe ihâimana uꞌâsi mono iwẽ hã te te aima ꞌre apisutu ꞌwa. Tahawa, dama hã ꞌre aipahi zaꞌra waꞌaba mono tõ. Duré asimirosaꞌrata na ꞌre aihâtâꞌâ zaꞌra waꞌaba mono tõ.
15 Cristu hã ꞌre iwazé pese zaꞌra waꞌaba mono zé hã, aipẽꞌẽ ꞌremhã aima ꞌre hâimana zaꞌra waꞌaba mono. Duré Asibꞌapito na aima ꞌre hâimana zaꞌra waꞌaba mono. ꞌRe asisaꞌra pese uꞌâsi zaꞌra waꞌaba mono, ꞌre dazadaꞌâbâ zaꞌra waꞌaba mono da, niꞌwa hã robꞌumnhasi sina ꞌre iꞌaihâimana zaꞌra waꞌaba mono zém na te te asadanharĩ aba wa, ãma tãma rowasuꞌu da, rowẽ u za iꞌaihutu aba zém na hã.
16 Tane nherẽ, ãne hã asimiwazép sina ꞌre ꞌmanharĩ zaꞌra waꞌaba mono, duré dawazép sina. Duré asimirosaꞌrata ꞌremhã marĩ iwasédé hã aima ꞌre hâimana zaꞌra waꞌaba mono ãna ꞌre aihâimana uꞌâsi zaꞌra waꞌaba mono. Ãne wamhã, da te ꞌre aiwasuꞌu wasété zaꞌra waꞌaba mono wamhã, niꞌwam norĩ hã Cristuhu nhirã zarina ꞌre anomro aba mono wa, aihâimanazém na te te ꞌre iꞌaiwasuꞌu zaꞌra waꞌaba mono norĩ hã te za ta norĩ hã ꞌre siséb zaꞌra za.
17 ꞌRe ihâimana uꞌâsi mono te te sima iwẽzéb zarina wamhã, marĩ iwẽ ꞌre ꞌmanharĩ zaꞌra waꞌaba mono wa, iwẽ hã, ꞌre irobzépata zaꞌra waꞌaba mono da hã, marĩ iwasédé ꞌre ꞌmanharĩ zaꞌra waꞌaba mono wa, ꞌre irobzépata zaꞌra waꞌaba mono zém nhipai u.
18 Cristu hã misi haré ma tô uburé dazada dârâ dawasété wa, ꞌre imorĩ wẽ uptabi hã ꞌre inomro wasété mono norĩ da, te te ꞌre aiꞌãwisi zaꞌra waꞌaba mono da, ꞌRe ihâimana uꞌâsi mono u. Ihâiba hã ma tô wĩrĩ ni. Tane nherẽ, ma tô Imama hã hâiwaꞌutu, Ihâiba uptabi na apâ.
19 Taha na, tihâiba uptabi na ma tô mo, waꞌuburé norĩ u. Ta norĩ ma, ma tô rowahutu, dazazéb ꞌre, ꞌre idasimasa mono ne, wairébé waihuꞌu ãna ꞌre isimasa mono norĩ ma hã.
20 Idâꞌâ norĩ, ꞌRe ihâimana uꞌâsi mono te te iwapari zaꞌra õ norĩ, simiꞌẽ na sô simipari zaꞌra nherẽ, Noé hã ubaꞌre isaꞌẽne Arca na isisi te te ꞌmanharĩ ré hã. Daꞌumro na ma tô ꞌRe ihâimana uꞌâsi mono hã daꞌanhoꞌreptu, simisutu hã 8 na dahâiba, ubaꞌre wa ihâimana zaꞌra hã, â te te daꞌuprosi tõ da, te te idaꞌanhoꞌreptu hã.
21 Ta hã â, te aré tãma tihâimana zaꞌra, â dawabzuri ne, ãhã na te te ꞌre iꞌasõꞌreptu zaꞌra waꞌaba mono ne hã. Â dawabzuri wa te ꞌre ꞌmanharĩ zaꞌra mono wamhã, wahâiba rã na hã wa te ãma ꞌre sani waihuꞌu zaꞌra mono õ di. Tane nherẽ, ꞌRe ihâimana uꞌâsi mono wi, wa wa te ꞌre waptẽrẽ zaꞌra, rosaꞌrata wasété ãna, Zezu Cristu hã apâ ihâiwaꞌutuzém na.
22 Ta hã hâiwa u ma tô mo. Ãhã na hã ꞌRe ihâimana uꞌâsi mono nhimire niwĩ te oto ꞌre sãmra. Tawamhã uburé hâiwa hawi romhuriꞌwa norĩ hã duré hâiwa ãma dama ipire norĩ hã duré hâiwa ãma waihuꞌu pese ꞌre ihâimana zaꞌra mono norĩ hã te isimiꞌmadâꞌâ ꞌre, ꞌre hâimana zaꞌra oto.
