Provébiu 20:1-30
20 Niꞌwa â waꞌre te te ꞌre hâsi zaꞌẽtẽ mono wamhã, te za daꞌãma ꞌre waꞌẽ. Duré â siwamnarĩ te te ꞌre ihâsi mono zarina, te za dasiꞌahâri hã te te ꞌre azani. Â siwamnarĩ ma isibꞌuwa norĩ hã isimizaꞌrese wẽ tãma ꞌre hâimana zaꞌra mono õ di.
2 Apito ꞌre isahi mono zé hã aiwa huꞌu zérépa wairõ ne te ꞌre hâimana. Duré apito niꞌwa te te sina sitiꞌrui wazere wamhã, te za ꞌrâwi romnhimimnha hã sisada waze, tihâimanazéb da.
3 Uburé isimizaꞌreseꞌõ norĩ te waptu na tisiꞌwapé na hã dame ꞌre hâimana zaꞌra. Niꞌwa dasiꞌwapé nhiti ꞌre ihâimana mono si dama wazéb uꞌâsi di.
4 Robꞌreꞌwa iwaꞌa hã, robꞌrezé uwaibaba te te itiꞌai hâipoꞌo mono õ hã, te te dame ꞌre iroptehâri mono da hã mare di.
5 Dapẽꞌẽ ꞌre, ꞌre idanhimirosaꞌrata zaꞌra mono zé hã aiwa abꞌre ꞌrehâ ꞌre, â ihâimana ne hã. Tane nherẽ, niꞌwa iꞌrãi waihuꞌu wẽ ma hã tãma waihuꞌu pese di, te te dawi ꞌre iꞌahâiꞌré mono da hã.
6 Daꞌahâ na te dasiwaihu iꞌumnhasi na ꞌre dasiwasuꞌu zaꞌra. Tane nherẽ, e ꞌwa dasiwaihu umnhasi uptabi na ꞌre ihâimana mono, da te isõpẽtẽ da bâ. Waihuꞌu õ di.
7 Aibâ sena na ꞌre ihâimana mono hã te iꞌuwaibaba na si ꞌre hâimana. Tahawa te iꞌra norĩ hã robze sina ꞌre hâimana zaꞌra.
8 Apito te te dama ꞌre arowairébé mono da, tinhamrazém na ꞌre simasisi mono wamhã, te za awaꞌawi marĩ na da te ꞌre iꞌupai mono zé hã te te ꞌre abꞌmadâꞌâ.
9 E ꞌwa ãne hã te te nharĩ waihuꞌu pese di: “Wa tô ĩsipese, ĩpẽꞌẽ ꞌremhã; tahawa ĩwasété ãna wa oto ꞌre ĩhâimana.”
10 Uburé Danhibꞌapito ma, senai õ na marĩ pire pibuzé hã tãma ꞌru ti.
11 Aiꞌuté marĩ te te ꞌre iꞌmanharĩ zaꞌra mono zéb zarina ꞌre ihâimana zaꞌra mono zé hã te za da te ꞌre waihuꞌu zaꞌra, isadawa nhipese õ na duré iwẽ na zama.
12 Uburé Danhibꞌapito ma tô wato hã te te wama ꞌre abꞌmanharĩ, wa te ãma ꞌre irobꞌmadâꞌâ zaꞌra mono zéb da hã. Duré wapoꞌre, ãma ꞌre iwanhimipari zaꞌra mono zéb da hã ma tô te te wama ꞌre abꞌmanharĩ.
13 Aptâꞌâ si hã asima ꞌre sawi mono tõ. Ãnei õ wamhã, asimarĩ ãna te za ꞌre aihâimana mo. ꞌRe atopoꞌo suꞌu mono, asa ꞌre romnhimiꞌwara mono da, asazéb da hã.
14 Robꞌuipraꞌwa hã te za tinha ãne: “Waꞌâbâ zaꞌẽtẽ di ã hã”. Tane nherẽ, oto watobro parimhã, ꞌrâwi isiꞌmadâꞌâ ze zarina te za dama siwasuꞌu, te te irobꞌuipra wẽ na hã.
15 Ẽtẽ waipo pré oru hã ahâ na te ꞌre hâimana zaꞌra, duré ẽtẽ waipo iwaꞌâbâ zaꞌẽne hã. Tane nherẽ, daꞌrãi waihuꞌu wẽ zarina damremezé hã iwaꞌâbâ zaꞌẽtẽ uptabi, ta hã.
16 Niꞌwa dasiré aꞌuwẽꞌõ hâiba waptoꞌwa na marĩ waꞌâbâꞌwa da, dama ꞌre hâimana mono da, te te sima wẽ wamhã, te za tiꞌuza hã sena na te te ãma ꞌre idapawaꞌâbâ mono zé te te roptété da hã aima tisõ.
17 Sena na dahâimana õ zarina dasa da te dasima ꞌre iwaibui mono hã, isei uptabi. Tane nherẽ, da te ꞌre huri mono parimhã, te za oto dazadawa na supara ne hã ꞌre simiꞌwara.
18 Dama roti pire ꞌmanharĩzé hã wẽ di, danhimirowaꞌõtõ ꞌmanharĩzéb da hã. Duré niꞌwa dasiꞌwapéi u watobro da wamhã, te za aꞌâ marĩ na tãma rowasuꞌuzé hã dawi waptẽ, iwẽ hã.
19 Dabâsi zeiꞌwa norĩ hã te za dasiꞌrep si marĩ dama ꞌre ihâimana zaꞌra mono na hã te te ãma dawi ꞌre aropé. Tahawa imreme hâ norĩ nhiti romhâ na ꞌre aihâimana mono.
20 Niꞌwa timama ãma, duré tina ãma te te dama ãma wasété zahuré wamhã, te za ihâimanazé hã tiwi aiꞌutõ, robꞌuiwẽzé hã da te ꞌre simroi mono wa, robra uptabi si oto ihâimana mono ne.
21 Waptu na ꞌre idasisimarĩ pese zaꞌra mono hã niwamhã te te ãma dama ꞌre irowẽ zani zaꞌra mono da hã mare di.
22 Ãne hã nharĩ tõ: “Ĩma robꞌmanharĩ wasété ꞌwai ma, wa za ãma tãma waꞌrã, ĩsiꞌruiwaꞌâbâ da!” Uburé Danhibꞌapito si ꞌmadâꞌâ, niha hã taha si te te aima hiri wẽ da, aihâimanazé hã.
23 Uburé Danhibꞌapito ma, senai õ na marĩ pire pibuzé hã tãma ꞌru ti.
24 Uburé Danhibꞌapito si te tô te te ꞌre daꞌanhimro. Ãne wa, e niha te za bété niꞌwa ꞌre imorĩzé hã sina waihuꞌu.
25 ꞌRe ihâimana uꞌâsi mono ma, marĩ na ropisutu wana ré, aꞌâ ãma rosaꞌrata pese. E marĩ wa. Taha parimhã za asiwẽꞌõ dâꞌâsina.
26 Apito iꞌrãi waihuꞌu pe, te za tiwasédé te te ꞌre iꞌmanharĩ zaꞌra mono norĩ wi hã te te tiwi ꞌre aꞌupsibi nhamra. Ãne wamhã, te za ãma siwamri zaꞌra ãna, te te tãma ꞌre arobꞌmanharĩ.
27 Uburé Danhibꞌapito ma tô dapẽꞌẽ ꞌre danhimirosaꞌrada hã dama tisõ, ãma ꞌre idasiwaihuꞌu zaꞌra mono zéb da hã. Tahawa, niꞌwa ꞌrâwi tihâimanazém na hã siwi simani waihuꞌu õ di.
28 Dama iꞌrãnhoꞌõmo nhimizawizém na ꞌre ihâimana mono zé hã duré dama iꞌumnhasizém na ꞌre ihâimana mono zé hã te za te te ꞌre siptete, tinhimiꞌmadâꞌâzém na te te ãma uzusi da hã.
29 Ipréduptém norĩ nhiptetezém na ãma datobꞌuzu zaꞌẽtẽ zaꞌra di. Duré ihi norĩ nhiꞌa zéré rã na zama hã ãma datobꞌuzu zaꞌẽtẽ zaꞌra di.
30 Daꞌahârizé te za danhimiꞌmanharĩ wasétézé hã te te dama ꞌre apari, iwẽ na si we ꞌre dahâimana zaꞌra mono da oto.
