Коринфликларга йўлланган иккинчи мактуб 9:1–15
9 Муқаддас кишиларга хизмат қилишга келсак+, бу ҳақда ёзишимга аслида ҳожат йўқ.
2 Боиси, ёрдам беришга тайёр эканингизни билганим учун, македонияликларга Ахаядагилар бир йилдан буён тайёр туришибди деб, сизлар билан мақтаниб юрибман. Сизларнинг ғайратингиз уларнинг аксариятини ҳаракатга солди.
3 Бироқ сизлар билан мақтанганимиз қуруқ сўз бўлиб чиқмаслиги учун ва худди айтганимдай, тайёр туринглар деб, олдингизга биродарларни жўнатяпман.
4 Акс ҳолда македониялик биродарлар мен билан бирга бориб, тайёр эмаслигингизни кўришса, тағин сизлар ҳам, сизларга шунчалик ишонган биз ҳам уятга қолмайлик.
5 Шу сабабли биродарларни биздан аввал боришга ундадим. Улар ўзларингиз сахийлик билан беришни ваъда қилган эҳсонингизни зўрлаб олинган нарса каби эмас, сахийлик билан берилган нарса сингари олдиндан тайёрлаб қўйишади.
6 Бунга нисбатан шуни айтмоқчиман: қизғаниб эккан, оз ўриб олади, сахийлик билан эккан эса мўл ўриб олади+.
7 Ҳар бир инсон норози бўлиб ёки мажбурият юзасидан эмас, балки кўнглида ният қилганини берсин+. Чунки Аллоҳ қувонч билан берганни севади+.
8 Бундан ташқари, Худо Ўзининг мўл-кўл иноятини устингизга ёғдиришга қодир. Шу йўсин сизлар доим барча зарурий нарсаларга эга ва хайрли ишларга бой бўласизлар+.
9 (Муқаддас Ёзувларда айтилганидек: «У сахийлик билан тарқатади, ночорлар билан бўлишади. Унинг одиллиги тоабад бор бўлади»+.
10 Деҳқонга уруғни, ейдиганга нонни берган Аллоҳ, сизларга экиш учун уруғни мўл-кўл қилиб беради ҳамда одиллигингизнинг самарасини орттиради.)
11 Ҳар жиҳатдан сахийликни намоён этишингиз учун, Тангри сизларга ҳар томондан барака ато этяпти. Бизнинг саъй-ҳаракатимиз орқали бундай сахийлик инсонларни Худога шукроналар айтишга ундамоқда.
12 Негаки бу хизматингиз нафақат муқаддас кишиларнинг эҳтиёжларини ошиғи билан қондириши+, балки Аллоҳга кўпдан-кўп миннатдорчиликлар келтириши лозим.
13 Улар ушбу хизматнинг самарасини кўриб, сизлар очиқдан-очиқ эълон қилаётган Масиҳ ҳақидаги хушхабарга итоаткорлигингиз учун ҳамда уларга ва бошқаларга сахийлик билан берган хайр-эҳсонингиз учун Худони улуғлашмоқда+.
14 Тангрининг сизларга кўрсатган чексиз иноятидан хабардор бўлган ҳолда, улар сизларни севишини билдириб, сизлар учун Худога илтижо қилишяпти.
15 Сўз билан таърифлаб бўлмайдиган ҳадяси учун Аллоҳга шукрлар бўлсин!
