Мәтта 28:1—20
28 Шәнбидин кейин, һәптиниң дәсләпки күниниң таң атқинида Мәрийәм Мәҗдала вә башқа Мәрийәм қәбирни көрүшкә кәлди.
2 Бир дәмдила күчлүк йәр тәврәш йүз бәрди, чүнки Йәһваниң пәриштиси асмандин чүшүп, қәбиргә келип, униң тешини нери домилитип, шуниң үстидә олтиратти.
3 Қияпитидин у чақмаққа охшатти, униң кийими болса қардәк ақ еди.
4 Қорққинидин униң алдида күзәтчиләр титирәп, өлүкләрдәкла болуп қалди.
5 Пәриштә аялларға: «Қорқмаңлар. Мән билимән, силәр түврүктә өлтүрүлгән Әйсани издәватисиләр.
6 У бу йәрдә йоқ. Ейтқинидәк, у тирилди. Келип, у ятқан җайға қарап беқиңлар.
7 Һәм чапсанирақ берип, униң өлүмдин тирилгинини шагиртлириға ейтиңлар, шундақла уларға: “У силәрдин авал Җәлилийәгә кәтмәктә. Шу йәрдә уни көрисиләр”, дәңлар. Мошуни мән силәргә ейтишим керәк еди»,— деди.
8 Улар алдириған һалда хатирә қәбирдин чиқип һәм қорқуш, һәм зор хошаллиқ илкидә буниң һәммиси тоғрилиқ униң шагиртлириға ейтип беришкә жүгриди.
9 Йолда уларни Әйса учритип: «Саламәтмусиләр?»— деди. Улар йеқинлишип, тизланғач униң аяқлирини тутувалди.
10 Әйса шу чағда уларға: «Қорқмаңлар! Берип, қериндашлиримға Җәлилийәгә беришини ейтиңлар. Шу йәрдә улар мени көриду»,— деди.
11 Улар йолда болғанда, күзәтчиләрниң бәзилири шәһәргә келип, чоң роһанийларға йүз бәргән барлиқ нәрсә тоғрилиқ ейтип бәрди.
12 Улар болса ақсақаллар билән биллә җәм болуп мәслиһәтлишип, әскәрләргә нурғун күмүч тәңгиләрни бәрди
13 һәм мундақ җекилиди: «Мундақ дәңлар: “Униң шагиртлири кечиси келип, биз ухлаватқан мәзгилдә уни оғрилап кетипту”.
14 Әгәр мошу һәққидә һакимға мәлум болуп қалса, биз уни ишәндүрүп, силәрни җазадин қутулдуримиз».
15 Әскәрләр күмүч тәңгиләрни елип, шулар үгәткәндәк қилди. Шуниң билән, мошу сөзләр йәһудийлар арисида пүткүл җайларда мошу кәмгичә тарқилип кәлмәктә.
16 Он бир шагирт болса Әйса әвәткән Җәлилийәдики шу таққа барди.
17 Уни көрүп, гәрчә бирмунчилири гуманланған болсиму, униңға тазим қилди.
18 Әйса уларға йеқинлишип: «Маңа асман һәм йәрдики пүткүл һакимийәт берилди.
19 Шу сәвәптин, берип барлиқ хәлиқләрдин Атам, Униң Оғли һәм муқәддәс роһниң намиға чөмдүрүп, шагиртларни тәйярлаңлар,
20 һәм мән силәргә буйриған барлиқ нәрсиләргә әмәл қилишни уларға үгитиңлар. Шуниң билән мошу дуния қурулуми аяқлашқичә, барлиқ күнләрдә мән силәр билән болумән»,— деди.
