1, 2. (a) Mea nafea to te hoê ratere aroharaa ˈtu ia Maria? (b) Ua titauhia ia rave Maria i teihea faaotiraa?

 HIˈO aˈera Maria ma te maere i te ratere e tomo mai ra. Aita tera taata i ani mai i to ˈna papa aore ra to ˈna mama. O Maria ta ˈna i haere mai e farerei! E ere o ˈna no Nazareta, mea papu te reira. I roto i te hoê oire nainai mai ia Nazareta, e taa-oioi-hia e e taata ěê tera, mai taua ratere ra. Mea ê roa ta ˈna huru paraparau ia Maria: “Ia ora na, e tei here-hua-hia mai e! tei ia oe te Fatu [ra o Iehova].”—A taio i te Luka 1:26-28.

² Mai tera ïa ta te Bibilia faaiteraa mai ia Maria, tamahine a Heli, o te oire o Nazareta i Galilea. E haamata to ˈna aamu i te hoê taime e titauhia ˈi ia rave o ˈna i te hoê faaotiraa faufaa roa. Ua momoˈahia o ˈna i te tamuta ra o Iosepha. E ere Iosepha i te hoê taata taoˈa rahi, e faaroo rahi râ to ˈna i te Atua. Ua manaˈo paha ïa Maria e e ora o ˈna i te hoê oraraa haihai, a haapao ai i ta ˈna tane e ta raua mau tamarii. Teie râ, tia taue maira i mua ia ˈna taua ratere ra, o tei faaite mai i te hoê ohipa ta to ˈna Atua e horoa na ˈna, te hoê hopoia o te taui roa i to ˈna oraraa.

3, 4. Ia taa maitai ia tatou o vai Maria, eiaha tatou e haapao i te aha, e nahea râ tatou?

³ Te maere ra e rave rahi i ore ai te Bibilia i faahiti rahi ia Maria. Maa vahi iti noa no nia i to ˈna oraraa na mua ˈˈe, mea iti roa ˈtu â no nia i to ˈna huru, e aita hoê aˈe no nia i to ˈna haviti. Mea rahi râ te haapiiraa e huti mai i ta te Parau a te Atua e faaite ra no nia ia Maria.

⁴ Ia taa maitai ia tatou o vai Maria, eiaha tatou e haapao i te manaˈo e rave rahi ta te mau haapaoraa i haapii i to ratou mau taata no nia ia ˈna. Eiaha atoa tatou e tâuˈa i te huru “faahohoˈaraa” a te taata e rave rahi ia ˈna, e te mau haapiiraa fifi mau o tei faateitei ia ˈna i te tiaraa “Metua vahine o te Atua” e “Arii vahine o te raˈi.” E hiˈopoa noa râ tatou i ta te Bibilia e faaite mau ra. Te  horoa mai ra te Bibilia i te mau haamaramaramaraa faufaa no nia i to ˈna faaroo, e e nafea ia pee i te reira.

5. (a) Eaha ta tatou e haapii i to Maria horuhoru no te huru aroha a Gaberiela? (b) Eaha te haapiiraa faufaa roa ta Maria i taa?

⁵ E ere te ratere tei haere i ǒ Maria i te hoê taata. O te melahi Gaberiela. I to ˈna piiraa ia Maria “tei here-hua-hia mai,” ua “horiri” Maria e ua uiui eaha râ te auraa o teie huru aroha. (Luka 1:29) Mea here-hua-hia mai o ˈna e vai? E ere iho â ïa e to ˈna mau taata-tupu. Aita o ˈna i manaˈo i te reira. Mea herehia râ o ˈna e te Atua ra o Iehova, ta te melahi ïa i hinaaro e parau. Tera te mea faufaa no Maria. Aita o ˈna i manaˈo ma te teoteo e ua here-ê-na-hia o ˈna e te Atua. E haa atoa anaˈe ia here mai te Atua ia tatou ma te ore e manaˈo ma te teoteo e ua fanaˈo ê na tatou i te reira. E huti mai tatou i te haapiiraa faufaa roa ta Maria i taa maitai: e patoi te Atua i te feia teoteo, mea here râ na ˈna i te feia haehaa e e turu oia ia ratou.—Iak. 4:6.

6. Eaha te fanaˈoraa taa ê roa ta te melahi i pûpû ia Maria?

⁶ Ia faahotu iho â Maria i te haehaa, no te mea e fanaˈoraa taa ê roa ta te melahi i pûpû atu: te fanauraa mai ïa i te hoê tamarii o te riro mai ei taata faufaa roa ˈˈe o te huitaata taatoa. Ua parau Gaberiela: “Na te Fatu ra na te Atua e horoa mai i te terono o to ˈna ra metua o Davida no ˈna: ei ia ˈna te hau i te fetii o Iakoba e a muri noa ˈtu; e e ore roa to ˈna basileia e mure.” (Luka 1:32, 33) Ua ite Maria i ta te Atua i fafau ia Davida hau atu i te 1 000 matahiti na mua ˈtu, oia hoi e faatere hoê o to ˈna huaai e a muri noa ˈtu. (Sam. 2, 7:12, 13) O ta Maria ïa tamaiti te riro mai ei Mesia ta te nunaa o te Atua i tiai noa na ahia ˈtura hanere matahiti!

7. (a) Eaha ta te uiraa a Maria e faaite ra no nia ia ˈna? (b) Eaha te haapiiraa ta te feia apî e nehenehe e huti mai i te hiˈoraa o Maria?

⁷ Ua na ô atoa ˈtu te melahi e ‘e parauhia ta ˈna tamarii te Tamaiti na te Teitei.’ Mea nafea te hoê vahine i nehenehe ai e fanau mai i te Tamaiti a te Atua? Mea nafea hoi Maria i nehenehe ai e fanau mai i te hoê tamarii? Mea momoˈa-noa-hia raua Iosepha, aita â raua i faaipoipo atura. No reira ïa Maria i ui roa ˈtu ai: “Eaha ïa e tia ˈi aore hoi au i ite i te taata [aore ra i taoto aˈenei i te hoê tane]?” (Luka 1:34) Ua tapao oe? Aita Maria i haama i te parau e aita o ˈna i taoto i te hoê tane. Ua haapeu râ oia i te reira.  I teie mahana, mea rahi te taata apî e ru nei i te taoto i te hoê apiti e o te faaooo nei i te feia aita e na reira ra. Ua taui roa teie nei ao. O Iehova râ, aita ïa. (Mal. 3:6) Mai i te tau o Maria, mea here na ˈna te feia e faatura ra i ta ˈna mau ture aveia morare.—A taio i te Hebera 13:4 i roto i te nota i raro i te api. a

8. Mea nafea Maria, taata hara hoi, i nehenehe ai e fanau mai i te hoê tamarii tia roa?

⁸ Noa ˈtu e e tavini haapao maitai Maria na te Atua, e taata hara o ˈna. Mea nafea ïa oia i nehenehe ai e fanau mai i te hoê tamarii tia roa, te Tamaiti a te Atua? Faataa ˈtura Gaberiela: “E pou mai te Varua Maitai i nia iho ia oe, e na te mana o te Teitei e tamǎrǔ i nia iho ia oe, e parauhia ˈi hoi tena na tamaiti moˈa, o te Tamaiti na te Atua.” (Luka 1:35) “Viivii ore” te auraa o te taˈo “moˈa.” Te tanoraa, e tutuu atu te mau metua i to ratou tiaraa taata hara e te viivii na ta ratou mau tamarii. I roto râ i teie tupuraa, e rave Iehova i te hoê semeio otahi. Mai te raˈi mai, e tuu oia i te ora o ta ˈna Tamaiti i roto i te opu o Maria, e maoti to ˈna puai ohipa, aore ra to ˈna varua moˈa, e “tamǎrǔ” oia ia Maria, a paruru atu ai i ta ˈna Tamaiti i te hara. Eaha to Maria huru? Ua tiaturi anei o ˈna i te parau fafau a te melahi?

9. (a) Ua hape te feia aita e tiaturi ra i te aamu o Maria, no te aha? (b) Mea nafea to Gaberiela haapuairaa i te faaroo o Maria?

⁹ Mea rahi te taata, tae noa ˈtu vetahi feia maimi i te pae faaroo, aita e tiaturi ra e e nehenehe te hoê vahine, aita i taoto aˈenei i te hoê tane, e fanau mai i te tamarii. Noa ˈtu to ratou maramarama, ua moe ia ratou te hoê parau mau ohie ia taa. Ta Gaberiela ïa i faahiti: “Aore roa hoi e mea e ore te tia i te Atua.” (Luka 1:37) O Maria râ, ua tiaturi ïa i te melahi, no te mea e faaroo rahi to ˈna. E ere taua faaroo ra i te vare-hanoa-raa, ua niuhia râ i nia i te haapapuraa. Ua horoa ˈtu Gaberiela i te mau haapapuraa hau, ma te parau atu no Elisabeta to ˈna fetii ruhiruhia. Mea maoro to ˈna matauraahia ei vahine eita e noaa ta ˈna tamarii. Ua faatia râ te Atua ia hapû o ˈna maoti te hoê semeio!

10. E fanaˈoraa taa ê iho â ia fanau mai i te Tamaiti a te Atua, e ere râ mea ohie no Maria, no te aha?

¹⁰ Ua nahea ˈtura Maria? E ohipa te tiai mai ra ia ˈna, e haapapuraa atoa ta ˈna e e faatupu te Atua pauroa ta Gaberiela i parau. E fanaˈoraa taa ê iho â ia fanau mai i te Tamaiti a te Atua,  e ere râ mea ohie no Maria. A tahi, ua momoˈahia o ˈna ia Iosepha. E hinaaro noa anei Iosepha e faaipoipo ia ˈna ia ite o ˈna e ua hapû Maria? A piti, e hopoia rahi atoa taua fanaˈoraa taa ê ra. E hapû mai oia i te tamarii faufaa roa ˈˈe a te Atua, ta ˈna iho Tamaiti here! Ia aupuru ïa oia i taua tamarii ra e ia paruru atoa ia ˈna i roto i te hoê ao ino. E ere i te hopoia nainai!

11, 12. (a) Ua nahea ˈtu te tahi mau tane, mea itoito rahi hoi e te haapao maitai, i to te Atua horoaraa ˈtu i te tahi mau ohipa? (b) Eaha ta te pahonoraa a Maria ia Gaberiela e faaite ra?

¹¹ Te faaite ra te Bibilia e ua taiâ te tahi mau tane, mea itoito rahi hoi e te haapao maitai, i to te Atua horoaraa ˈtu i te tahi mau ohipa fifi. Ua parau Mose e eita e tae ia ˈna ia auvaha no te Atua, no te mea e reo maumau to ˈna. (Exo. 4:10) Ta Ieremia otoheraa, “e tamaiti iti hoi” o ˈna, mea apî roa ïa o ˈna no te ohipa ta te Atua i faaue ia ˈna e rave. (Ier. 1:6) Area Iona, ua taie ïa! (Iona 1:3) E o Maria?

¹² Ma te haehaa e te auraro, pahono atura Maria ia Gaberiela ma teie mau parau putapû mau: “Inaha ei tavini au no te Fatu [ra o Iehova], ia na reirahia mai au mai ta oe i parau na.” (Luka 1:38) E tiaraa riirii roa to te hoê tavini e tei to ˈna ra fatu te parau o to ˈna oraraa. Tera ïa to Maria manaˈo: e tavini o ˈna no to ˈna Fatu ra o Iehova. Ua ite o ˈna e e paruruhia oia e ana, e haapao maitai oia i te feia e tapea ra i to ratou haapao maitai ia ˈna, e haamaitai atoa oia ia ˈna ia faaitoito oia i te amo i tera hopoia fifi.—Sal. 18:25.

13. I roto i teihea tupuraa e tauturu mai ai to Maria hiˈoraa?

¹³ I te tahi taime, e manaˈo tatou e mea fifi ta te Atua e ani mai ra, eita atoa e maraa ia tatou. I roto râ i ta ˈna Parau, e rave rahi taime to ˈna haapapuraa mai e e nehenehe tatou mai ia Maria e turui i nia ia ˈna, e tiaturi roa ia ˈna. (Mas. 3:5, 6) E na reira anei tatou? Mai te peu e e, e haamaitai mai o ˈna, a puai atu â ˈi to tatou faaroo ia ˈna.

14, 15. (a) Eaha ta Iehova i rave i to Maria tomoraa ˈtu i ǒ Elisabeta raua Zekaria? (b) Eaha ta te Luka 1:46-55 e faaite ra no nia ia Maria?

¹⁴ Ua itoito-roa-hia Maria i to Gaberiela parauraa ˈtu no Elisabeta. Ua ite oia e e taa ia Elisabeta to ˈna mau huru aau, to roto atoa hoi oia i te hoê tupuraa taa ê. Haere ru atura Maria i te fenua mouˈa o Iuda, i ǒ Elisabeta raua Zekaria te tahuˈa. E toru aore  ra e maha paha mahana teie tere. I to ˈna tomoraa ˈtu i roto i te fare, horoa maira Iehova i te tahi atu haapapuraa o tei haapuai i to ˈna faaroo. I to Maria iho â aroharaa ˈtu ia Elisabeta, hauti ihora te pêpe ma te oaoa rahi i roto i te opu o Elisabeta. Î aˈera Elisabeta i te varua moˈa e pii atura ia Maria “te metua vahine [o] tau Fatu.” I faaite na te Atua ia Elisabeta e e riro mai te tamaiti a Maria, oia hoi te Mesia, ei Fatu no ˈna. Ua aratai-atoa-hia Elisabeta e te Atua ia haapopou ia Maria no to ˈna faaroo e to ˈna auraro, a na ô ai: “E ao hoi to ˈna to tei faaroo.” (Luka 1:39-45) Oia mau, e tupu ta Iehova i fafau na ia Maria!

¹⁵ Paraparau atura Maria. Ua faaherehere-maitai-hia ta ˈna i  parau i roto i te Bibilia. (A taio i te Luka 1:46-55.) Te paraparauraa roa ˈˈe teie a Maria i roto i te Bibilia, e mea rahi ta tatou e haapii mai no nia ia ˈna. E mauruuru rahi to ˈna ia Iehova, a arue ai o ˈna ia ˈna no to ˈna horoaraa mai i te fanaˈoraa taa ê e riro ei metua vahine no te Mesia. E faaroo rahi atoa to ˈna i to ˈna parauraa e e faahaehaa Iehova i te feia teoteo e te mana, e tauturu râ oia i te feia riirii e te veve e hinaaro ra e tavini ia ˈna. Mea ite maitai atoa o ˈna i te mau Papai Hebera. Te manaˈohia ra e hau atu i te 20 taime i faahiti ai oia i te reira! b

16, 17. (a) Ia pee tatou i te hiˈoraa o Maria e ta ˈna tamaiti i roto i teihea tupuraa? (b) Te haamanaˈo mai ra to Maria haereraa ˈtu i ǒ Elisabeta i te aha?

¹⁶ Papu roa, ua feruri hohonu Maria i te Parau a te Atua. Ua haehaa noa râ o ˈna, ma te ore e faahiti i to ˈna iho manaˈo, i te mau Papai râ. Ua na reira atoa te tamaiti e rahi mai i roto i to ˈna opu i muri aˈe. Ua na ô oia: “[E] ere i ta ˈu ta ˈu e haapii nei, na ˈna râ, na tei tono mai ia ˈu.” (Ioa. 7:16) E uiui anaˈe ïa: ‘Mea faatura atoa anei au i te Parau a te Atua? Aore ra mea au aˈe na ˈu e haapii i to ˈu iho mau manaˈo ia vetahi ê?’ Ua vaiiho mai Maria i te hiˈoraa maitai.

¹⁷ Ua faaea Maria i ǒ Elisabeta e toru avaˈe. Eita e ore e ua faaitoito rahi te tahi i te tahi. (Luka 1:56) Te haamanaˈo mai ra teie aamu mahanahana i te faufaaraa o te hoa. Ia faahoa tatou i te feia e here mau ra i to tatou Atua ra o Iehova, papu maitai e e piri roa ˈtu â to tatou taairaa e o Iehova. (Mas. 13:20) Ua tae râ i te taime e hoˈi ai Maria i ǒ ˈna. Eaha râ ta Iosepha e parau mai ia ite o ˈna e ua hapû Maria?

18. Eaha ta Maria i faaite ia Iosepha, e eaha te huru o Iosepha?

¹⁸ Aita Maria i tiai ia itehia e ua hapû o ˈna no te faaite ia Iosepha. Hou râ oia a paraparau ai ia Iosepha, ua uiui paha o ˈna e nahea mai râ tera taata tura e mǎtaˈu ra i te Atua. Ua faaite pauroa râ o ˈna i te ohipa i tupu. Ua horuhoru roa Iosepha, eaha e ore ai! Hinaaro iho â o ˈna e tiaturi i teie potii here, e au ra râ e ua faaturi oia. Aita te Bibilia e parau ra eaha tei puta mai i roto i to ˈna feruriraa i tera taime. Teie noa râ, ua faaoti o ˈna e faataa ia raua. I tera tau, e hiˈohia te feia momoˈahia ei feia faaipoipo. Teie râ, aita Iosepha i hinaaro e faahaama ia Maria, maiti ihora ïa oia ia faataa huna noa ia raua. (Mat. 1:18, 19) Eaha râ paha  Maria i te mauiui i to ˈna iteraa e ua horuhoru roa Iosepha! Aita râ o ˈna i inoino.

19. Mea nafea to Iehova tautururaa ia Iosepha ia rave i te faaotiraa maitai?

¹⁹ Ma te hamani maitai, tauturu maira Iehova ia Iosepha ia rave i te faaotiraa maitai. Na roto i te moemoeâ, ua haapapu atu te hoê melahi e maoti te hoê semeio i hapû ai Maria. Topa aˈenei te hau o Iosepha, e rave atura i ta Maria i rave ê na mai te omuaraa mai â: ua haa oia mai ta Iehova i hinaaro. Faaipoipo ihora o ˈna ia Maria e faaineine atura ia ˈna no te amo i te hopoia faahiahia roa e aupuru i te Tamaiti a Iehova.—Mat. 1:20-24.

20, 21. Eaha ta te feia faaipoipo, te feia atoa e opua ra e faaipoipo, e haapii mai ia Maria raua Iosepha?

²⁰ Ia huti mai ïa te feia faaipoipo, te feia atoa e opua ra e faaipoipo, i te haapiiraa i te hiˈoraa o Maria raua Iosepha tei ora na a 2 000 matahiti aˈenei. A ite ai Iosepha i ta ˈna vahine ia rave maitai i ta ˈna hopoia metua vahine, papu roa e ua oaoa oia i to te melahi a Iehova aratairaa ia ˈna. Eita e ore e ua taa ˈtura ia ˈna te faufaaraa ia turui i nia ia Iehova. (Sal. 37:5; Mas. 18:13) Ua haapao maitai iho â ïa taua upoo utuafare ra i to ˈna raveraa i te mau faaotiraa rahi.

²¹ Area Maria, ua farii ïa i te faaipoipo ia Iosepha noa ˈtu e aita Iosepha i tiaturi oioi ia ˈna. Eaha ïa ta tatou e haapii mai? Ua tiai Maria e ua tamau noa i te tiaturi ia Iosepha, o ˈna hoi te tane o te riro mai ei upoo o te utuafare. Ua taa ïa ia ˈna te faufaaraa o te faaoromai. E haapiiraa maitai teie no te mau tuahine Kerisetiano i teie tau. Ua haapii teie mau tupuraa ia Iosepha raua Maria e mea faufaa roa ia paraparau noa ˈtu te tahi i te tahi ma te faaite roa ˈtu i to raua manaˈo.—A taio i te Maseli 15:22.

22. Ua haamau Iosepha raua Maria i to raua oraraa utuafare i nia i te aha, e eaha te tiai mai ra ia raua?

²² Ua haamau iho â Iosepha raua Maria i to raua oraraa utuafare i nia i te niu papu roa ˈˈe. Mea here roa na raua toopiti ia Iehova e ua hinaaro iho â raua e faaoaoa ia ˈna ma te amo maitai i ta raua mau hopoia metua ma te here. Parau mau, e haamaitairaa rahi atu â te tiai mai ra ia raua, e fifi rahi atoa râ. Ia aupuru hoi raua ia Iesu, o te riro mai ei taata rahi roa ˈˈe i ora aˈenei.