Zintharika 25:1-28
25 Izi nazo ni ntharika za Solomoni,+ izo ŵanthu ŵa Hezekiya+ themba la Yuda ŵakalemba:*
2 Mbuchindami wa Chiuta kubisa nkhani,+Ndipo mbuchindami wa mathemba kupenjerezga nkhani yakubisika.
3 Nga umo mtambo uliri kuchanya nkhanira kweniso umo charu chiliri pasi nkhanira,Ntheura mtima wa mathemba nawo ngwambura mapenjeko.
4 Wuskako makhalang’anjo* ku siliva,Ndipo lifumenge lakwengeka makora.+
5 Wuskapo muheni pamaso pa themba,Ndipo chitengo chake chikhozgekenge mu urunji.+
6 Ungajichindikanga pamaso pa themba yayi,+Ndipo ungimiliranga chara pakati pa ŵanthu ŵakuchindikika,+
7 Pakuti ntchiwemi kuti iyo wakuphalire kuti: “Zakuno,”
Kuluska kuti wakuyuyure pamaso pa wakuchindikika.+
8 Ungachimbiliranga chara kumangara ku mphara,Kasi uchitengechi paumaliro usange mzengezgani wako wakukhozga soni?+
9 Mudumbirane mulandu wako na mzengezgani wako,+Kweni ungavumburanga yayi ivyo waphalirika kuudesi,*+
10 Mwakuti uyo wakukupulika waleke kukulengeskaNdipo nkhani yiheni iyo ukathandazga yingawezgekaso chara.
11 Lizgu lakuyowoyeka pa nyengo yakweneleraLili nga ni maapulo ghagolide mu mbale zasiliva.+
12 Nga ni ndeŵeleŵe yagolide na chitoweskero cha golide liwemi,Ndimo waliri wakuchenya wavinjeru ku khutu lakupulika.+
13 Nga nkhuzizima kwa chiwuvi mu nyengo ya vuna,Ndimo liliri thenga lakugomezgeka kwa awo ŵakalituma,Pakuti likusamphuska fumu yake.*+
14 Munthu uyo wakujithumbwa na chawanangwa icho wandapeleke*Wali nga ni mabingu na mphepo ivyo vilije vula.+
15 Na kuzikira, mulongozgi wa ŵasilikari wakuwojeka,Ndipo lulimi lwakuzika lungaphyora chiwangwa.+
16 Usange wasanga uchi, uryepo uwo ungakukwana,Pakuti para warya unandi, ungawukura.+
17 Lundi lako lingalutanga swililiri yayi ku nyumba ya mzengezgani wako,Mwakuti waleke kuvuka nawe na kwamba kukutinkha.
18 Munthu uyo wakupeleka ukaboni wautesi kwimikana na mzengezgani wakeWali nga ni nthonga, lupanga, na muvi wakuthwa.+
19 Kuthemba munthu wambura kugomezgeka* mu nyengo ya suzgoVikuyana waka na kuthemba jino lakubanthuka panji lundi lawaghawagha.
20 Nga ni munthu uyo wakuvura chakuvwara mu nyengo yakuzizimaNga ni vinyo lakusasa ilo lasazgikana na soda*Ndimo waliri uyo wakwimbira sumu mtima wachitima.+
21 Usange mulwani* wako wali na njara, umupe chakurya warye.Usange wali na nyota, umupe maji wamwe,+
22 Pakuti ulundikenge makara gha moto pa mutu wake,*+Ndipo Yehova wakupenge njombe.
23 Mphepo yakumpoto yikulokweska vula,Ndipo lulimi lwa mwendanato lukwiza na chisko chakukwiya.+
24 Ntchiwemi kukhala pakona pa mtenjeKuluska kukhala nyumba yimoza na mwanakazi wambembe.*+
25 Nga ni maji ghakuzizima ku umoyo wakuvuka,Ndimo yiliri nkhani yiwemi iyo yafuma ku charu chakutali.+
26 Nga ni mbwiwi ya maji ghakubinkha na chisimi chakuvundukaNdimo waliri munthu murunji uyo wakuthera kwa* muheni.
27 Ntchiwemi yayi kurya uchi unandi,+Ndipo mbuchindami yayi kujipenjera uchindami.+
28 Munthu uyo wakutondeka kujiwezga ku ukali,*Wali nga ni msumba uwo wagumulika, wambura linga.+
Mazgu Ghamusi
^ Panji kuti, “ŵakakopera.”
^ “Makhalang’anjo,” ni vinthu ivyo vyakhalira para ŵenga visulo.
^ Panji kuti, “nkhani zachisisi za ŵanji.”
^ Panji kuti, “umoyo wa fumu yake.”
^ Mazgu gheneko, “chawanangwa chautesi.”
^ Pangayowoyekaso kuti, “munthu muryarya.”
^ Panji kuti, “magali; tchezeko.”
^ Panji kuti, “uyo wakukutinkha.”
^ Ndiko kuti, kutimiska munthu na kusongonora unonono wake.
^ Panji kuti, “wakusuzga.”
^ Mazgu gheneko, “wakupenthyapenthya pamaso pa.”
^ Panji kuti, “uyo wakutondeka kukora mzimu wake.”
