Chiuta wali kutipa Baibolo kuti wayowoye nase. Kuti timumanye makora Mwenecho wa mazgu agha, tikwenera kusambira Baibolo. (Yohane 17:3; 2 Timote 3:16) Mu Baibolo, Yehova Chiuta wakutiphalira ivyo wakukhumba kuchitira ŵanthu kweniso charu chapasi.—Genizesi 3:15; Chivumbuzi 21:3, 4.

Baibolo lawovwira ŵanthu ŵanandi chomene kuluska buku linyake lililose. Baibolo likutovwira kuti tiŵenge na chitemwa, lusungu, na chiwuravi, nga umo Yehova waliri. Likovwira ŵanthu kuzizipizga masuzgo ghakuru chomene, chifukwa cha kumanya kuti kunthazi kuli viwemi. Likuvumbura vinthu viheni vya mu charu ichi ivyo vikupambana na ivyo Chiuta wakukhumba.—Salimo 119:105; Ŵahebere 4:12; 1 Yohane 2:15-17.

Pakwambilira penecho, Baibolo likalembeka mu Chihebere, Chiaramu, na Chigiriki, ndipo lang’anamulika lose panji chigaŵa waka mu viyowoyero pafupifupi 3,000. Ni buku lekha ilo lang’anamulika mu viyowoyero vinandi kweniso ilo ŵanthu ŵanandi chomene ŵali nalo. Fundo iyi njakuzizika yayi, chifukwa uchimi wa mu Baibolo ukuti: “Makani ghawemi agha gha Ufumu [uthenga wakuzirwa chomene uwo uli mu Baibolo], ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.”—Mateyu 24:14.

Pakumanya kuti uthenga wa mu Baibolo ngwakuzirwa chomene, khumbo lithu ndakuti tiŵe na Baibolo ilo fundo zake ni zakukolerana na izo zikalembeka mu viyowoyero vyakwambilira kweniso lakupulikikwa makora na lambura kusuzga pakuŵazga. Mu nkhani za Vyakusazgirapo nga ni, “Fundo Izo Zikovwira pa Kung’anamura Baibolo,” “Ivyo Vili mu Baibolo Ili,” ndiposo “Kasi Baibolo Lafika Wuli kwa Ise?” muli fundo izo talondezga pakung’anamura, kweniso talongosora vigaŵa vinyake ivyo vili mu Baibolo ili.

Awo ŵakutemwa Yehova Chiuta na kumusopa ŵakukhumba Baibolo lakupulikikwa makora kweniso ilo fundo zake ni zaunenesko. (1 Timote 2:4) Ntheura, tafumiska Baibolo ili mu Chitumbuka, chifukwa tikukhumba kuti Baibolo la Mang’anamuliro gha Charu Chiphya liŵe mu viyowoyero vinandi chomene. Tili na chigomezgo chose kuti apo imwe mukuŵazga Baibolo ili, movwirikenge chomene apo ‘mukupenja Chiuta na kumusanga nadi.’—Milimo 17:27.