Zintharika 16:1-33
16 Munthu wakunozga yekha maghanoghano gha mtima wake,*Kweni zgoro ilo wakupeleka* likufuma kwa Yehova.+
2 Nthowa zose za munthu zikuwoneka zakunyoloka* kwa iyo,+Kweni Yehova wakusanda makhumbiro.*+
3 Peleka kwa Yehova chose icho ukuchita,*+Ndipo ivyo ukughanaghana vikwenderenge makora.
4 Yehova wachita chilichose kuti wafiske khumbo lake,Muheni nayo wamusungira zuŵa la soka.+
5 Uyo wakujinotha mu mtima ni munyankhasi kwa Yehova.+
Manyani kuti* walekenge chara kulangika.
6 Ubudi ukubenekelereka na lusungu* na kugomezgeka,+Ndipo munthu wakuwerako ku uheni chifukwa cha kopa Yehova.+
7 Para Yehova wakukondwa na mendero gha munthu,Wakuchitiska nanga mbalwani ŵake kuŵa nayo pamtende.+
8 Ntchiwemi kuŵa na tuchoko waka pamoza na urunji+Kuluska kuŵa na vinandi kwambura urunji.+
9 Munthu wanganozga nthowa yake mu mtima wake,Kweni Yehova ndiyo wakulongozga mendero ghake.+
10 Ivyo Chiuta wadumura viŵenge pa milomo ya themba.+Lingapuvyanga chara pakweruzga.+
11 Vyakupimira viwemi na sikelo zakwenelera vikufuma kwa Yehova.Vyakupimira uzito vyose vya mu thumba ni mulimo wake.+
12 Milimo yiheni mbukazuzi ku mathemba,+Pakuti chitengo chaufumu chikukhozgeka na urunji.+
13 Kayowoyero kawemi kakukondweska mathemba.
Ghakutemwa uyo wakuyowoya unenesko.+
14 Ukali wa themba uli nga ni thenga la nyifwa,+Kweni munthu wavinjeru wakuwutuniska.*+
15 Mu ungweru wa chisko cha themba muli umoyo.Lusungu lwake luli nga ni bingu la vula yaumaliro.+
16 Nkhuwemi chomene kusanga vinjeru kuluska golide!+
Kuŵa wakupulikiska nkhuwemi kuluska siliva.+
17 Msewu wa ŵakunyoloka ukugega viheni.
Uyo wakuvikilira mendero ghake wakusungilira umoyo wake.+
18 Para munthu wakujikuzga ndikuti wali pafupi kuparanyika,Ndipo para wamba mzimu wakujituntha wali pafupi kuwa.+
19 Ntchiwemi kuŵa wakujiyuyura* pa ŵakuzika+Kuluska kugaŵana vinthu ivyo ŵakujikuzga ŵaphanga.
20 Uyo wakulongora mahara vinthu vimwenderenge makora,*Ndipo ngwakukondwa uyo wakuthemba Yehova.
21 Uyo ngwavinjeru mu mtima wachemekenge munthu wakupulikiska,+Ndipo uyo wakuyowoya mwalusungu wakusazgako* kukopa.+
22 Mahara ntchisimi cha umoyo ku awo ŵali nagho,Kweni vindere vikulangika na uchindere wawo.
23 Mtima wa munthu wavinjeru ukupa mulomo wake mahara,+Ndipo wakusazgako kukopa ku kayowoyero kake.
24 Mazgu ghawemi ghali nga ni chisa cha uchi,Ghakunong’omera ku umoyo* ndipo ghakuchizga viwangwa.+
25 Pali nthowa iyo yikuwoneka yakwenelera kwa munthu,Kweni umaliro wake ni nyifwa.+
26 Waganyu wakulimbikira ntchito chifukwa cha kukhumba kurya,Pakuti njara yake ndiyo yikumukhukiska.*+
27 Munthu wawakawaka wakufukura viheni.+Kayowoyero kake kali nga ni moto wakuŵawura.+
28 Munthu wakusuzga* wakwambiska mphindano,+Ndipo uyo wakusesa wakupatuska ŵabwezi.+
29 Munthu wankhaza wakunyenga mzengezgani wake,Na kumulongozgera ku nthowa yiheni.
30 Wakutinyira ŵanthu jiso lake, apo wakwata vyakupweteka.
Wakulumira milomo yake apo wakufiska viheni.
31 Mbuha ni mphumphu ya utozi*+Para zasangika munthowa ya urunji.+
32 Munthu wambura kukalipa luŵiro+ ni muwemi kuluska munthu wankhongono,Na uyo wakujikora* kuluska uyo wathereska msumba.+
33 Mphenduzga* yikuponyeka pa chipakato,+Kweni chilichose icho yalongora ntchakufuma kwa Yehova.+
Mazgu Ghamusi
^ Panji kuti, “zgoro lakwenelera.” Mazgu gheneko, “zgoro la lulimi.”
^ Mazgu gheneko, “Ivyo vikunozgeka mu mtima ni vya munthu.”
^ Mazgu gheneko, “zakutowa.”
^ Mazgu gheneko, “mizimu.”
^ Mazgu gheneko, “Kunkhuzgira milimo yako pa Yehova.”
^ Mazgu gheneko, “Woko ku woko.”
^ Panji kuti, “chitemwa chakugomezgeka.”
^ Panji kuti, “wakuwugega.”
^ Mazgu gheneko, “wakujikhizga mu mzimu.”
^ Mazgu gheneko, “wasangenge viwemi.”
^ Panji kuti, “Ndipo kayowoyero kawemi kakusazgako.” Mazgu gheneko, “Ndipo kunong’omera kwa milomo kukusazgako.”
^ Panji kuti, “pakughacheta.”
^ Mazgu gheneko, “Pakuti mulomo wake ndiwo ukumukhukiska.”
^ Panji kuti, “wachiŵembu.”
^ Panji kuti, “uchindami.”
^ Mazgu gheneko, “wakuwusa mzimu wake.”
^ Wonani Mang’anamuro gha Mazgu.
