Fakatatau kia Luke 3:1-38
3 ʻI he taʻu hono 15 ʻo e pule ʻa Sisa Taipilioó, ʻi he taimi naʻe kōvana ai ʻa Ponitō Pailato ʻi Siuteá, pea pule ʻa Hēlota*+ ʻi he vahefonua ʻo Kālelí, pea pule ʻa Filipe ko hono tokouá ʻi he vahefonua ʻo ʻAitulia mo Telakonaitisí, pea pule ʻa Lisaniasi ʻi he vahefonua ʻo ʻApiliné,
2 ʻi he ngaahi ʻaho ʻo e ʻeiki taulaʻeiki ko ʻĀnasi pea mo Kaiafasí,+ naʻe hoko mai ai ʻa e folofola ʻa e ʻOtuá kia Sione+ ko e foha ʻo Sākalaiá ʻi he toafá.+
3 Ko ia naʻá ne ʻalu ki he kotoa ʻo e fonua takatakai ki Sioataní, ʻo malangaʻi ʻa e papitaisó ko e fakaʻilonga ʻo e fakatomala ki he fakamolemoleʻi ʻo e ngaahi angahalá,+
4 hangē tofu pē ko ia kuo hiki ʻi he tohi ʻo e ngaahi lea ʻa ʻAisea ko e palōfitá: “ʻOku ʻi ai ha leʻo ʻo ha taha ʻoku kalanga ʻi he toafá: ‘Mou teuteu ʻa e ʻalunga ʻo Sihová!* ʻAi ʻa hono ngaahi halá ke hangatonu.+
5 Ko e teleʻa kotoa pē kuo pau ke tanu, pea ko e moʻunga mo e foʻi māʻolunga kotoa pē ke holoki; ko e ngaahi hala pikopikó kuo pau ke ʻai ke hangatonu, pea ko e ngaahi hala tokakoví ke ʻai ke tokalelei;
6 pea ko e kakano kotoa pē* te nau sio ki he fakamoʻui ʻa e ʻOtuá.’”*+
7 Ko ia naʻe kamata ke ne lea ki he fuʻu kakai naʻe haʻu ke ne papitaisó: “ʻA e hako ʻo e fanga ngata huhu kona, ko hai ia naʻe fakatokanga atu kiate kimoutolu ke mou hola mei he houhau ʻoku tuʻunuku maí?+
8 Ko ia ai, mou fua ʻo taau mo e fakatomalá. ʻOua naʻa mou kamata pehē ʻi homou lotó, ‘Ko ʻemau tamaí ko ʻĒpalahame.’ He ʻoku ou tala atu kiate kimoutolu, ʻoku malava ʻe he ʻOtuá ke fokotuʻu hake mei he ngaahi maká ni ha fānau maʻa ʻĒpalahame.
9 Ko e moʻoni, kuo ʻosi fokotuʻu ʻa e tokí ki he tefito ʻo e ʻuluʻakaú. Ko ia, ko e fuʻu ʻakau kotoa pē ʻoku ʻikai ke fua leleí ʻe tā ia ʻo laku ki he afí.”+
10 Pea naʻe ʻeke ange ʻe he fuʻu kakaí kiate ia: “Ko e hā leva te mau faí?”
11 ʻI he tali ki aí naʻá ne pehē kiate kinautolu: “Tuku ki he tangata ʻoku ua hono kofú* ke ne vahevahe mo e tangata ʻoku halá, pea tuku ki he tokotaha ʻoku ʻi ai ʻene meʻa ke kaí ke ne fai ʻa e meʻa tatau.”+
12 Naʻa mo e kau tānaki tukuhaú naʻa nau omi ke papitaiso,+ pea nau pehē kiate ia: “Faiako, ko e hā te mau faí?”
13 Naʻá ne pehē kiate kinautolu: “ʻOua te mou kounaʻi* ha meʻa lahi ange ʻi he totongi totonu ʻo e tukuhaú.”+
14 Pehē foki, ko e faʻahinga ko ia ʻi he ngāue fakakautaú naʻa nau ʻeke kiate ia: “Ko e hā te mau faí?” Pea naʻá ne pehē kiate kinautolu: “ʻOua te mou fai ha faʻao fakamālohi mei ha taha pē pe tukuakiʻi loi ha taha pē,+ ka ke mou fiemālie pē ʻi homou ngaahi ʻinasí.”*
15 ʻI he lolotonga ʻa e ʻamanaki ʻa e kakaí ki he Kalaisí pea nau fakaʻuhinga kotoa ʻi honau lotó ʻo fekauʻaki mo Sione, “Ko e Kalaisí nai ia?”+
16 Naʻe ʻoatu ʻe Sione ʻa e talí, ʻo ne pehē ki he faʻahinga kotoa: “Ko au, ʻi heʻeku tafaʻakí, ʻoku ou papitaiso kimoutolu ʻaki ʻa e vaí, ka ʻoku haʻu ʻa e tokotaha ʻoku mālohi ange ia ʻiate au, ʻoku ʻikai te u taau ke u vete ʻa e haʻi ʻo hono senitoló.+ Te ne papitaiso kimoutolu ʻaki ʻa e laumālie māʻoniʻoní pea ʻaki ʻa e afi.+
17 Ko ʻene sāvolo ʻauʻau uité ʻoku ʻi hono nimá ke fakamaʻa ʻosi ʻaki ʻene ʻauʻauʻanga uité pea ke tānaki ʻa e uité ki hono feleokó,* ka ko e kafukafú te ne tutu ia ʻi he afi ʻa ia ʻe ʻikai lava ke tāmateʻi.”
18 Naʻá ne toe ʻoatu ha ngaahi enginaki lahi kehe pea hokohoko atu hono talaki ʻa e ongoongo leleí ki he kakaí.
19 Ka ko Hēlota ko e pule ʻi he vahefonuá, koeʻuhi ko hono valokiʻi ia ʻe Sione ʻi he fekauʻaki mo Helotiasi ko e uaifi ʻo hono tokouá pea ʻi he fekauʻaki mo e ngaahi ngāue fulikivanu kotoa naʻe fai ʻe Hēlotá,
20 naʻá ne toe tānaki atu ki he ngaahi ngāue kotoa ko iá ʻa e meʻá ni: Naʻá ne lokaʻi ʻa Sione ʻi he pilīsoné.+
21 Ko ia, ʻi he papitaiso kotoa ʻa e kakaí, naʻe papitaiso foki mo Sīsū.+ ʻI heʻene fai ha lotu, naʻe fakaava hifo ʻa e langí,+
22 pea naʻe ʻalu hifo ʻa e laumālie māʻoniʻoní kiate ia ʻi he sino hangē ha lupé, pea naʻe ongo mai ha leʻo mei he langí: “Ko hoku ʻAló koe, ʻa e ʻofeiná; kuó u hōifua ʻiate koe.”+
23 ʻI he kamata ʻe Sīsū+ ʻa ʻene ngāué, naʻá ne taʻu 30 nai,+ ko e foha ia, hangē ko ia naʻe ʻiloʻi ʻakí,ʻo Siosifa,+ko e foha ʻo Hēlai,
24 ko e foha ʻo Matati,ko e foha ʻo Līvai,ko e foha ʻo Melikai,ko e foha ʻo Sianai,ko e foha ʻo Siosifa,
25 ko e foha ʻo Matataiasi,ko e foha ʻo ʻĒmosi,ko e foha ʻo Nēhumi,ko e foha ʻo ʻEsilai,ko e foha ʻo Nakai,
26 ko e foha ʻo Maʻati,ko e foha ʻo Matataiasi,ko e foha ʻo Semaini,ko e foha ʻo Sioseki,ko e foha ʻo Siota,
27 ko e foha ʻo Sioanani,ko e foha ʻo Lesa,ko e foha ʻo Seluipēpeli,+ko e foha ʻo Saletili,+ko e foha ʻo Nēlai,
28 ko e foha ʻo Melikai,ko e foha ʻo ʻĀtai,ko e foha ʻo Kōsame,ko e foha ʻo ʻElimatami,ko e foha ʻo ʻEa,
29 ko e foha ʻo Sīsū,ko e foha ʻo ʻEliese,ko e foha ʻo Siolimi,ko e foha ʻo Matati,ko e foha ʻo Līvai,
30 ko e foha ʻo Simioni,ko e foha ʻo Siutasi,ko e foha ʻo Siosifa,ko e foha ʻo Sionami,ko e foha ʻo ʻIlaiakimi,
31 ko e foha ʻo Melea,ko e foha ʻo Mena,ko e foha ʻo Matata,ko e foha ʻo Nētane,+ko e foha ʻo Tēvita,+
32 ko e foha ʻo Sese,+ko e foha ʻo ʻŌpeti,+ko e foha ʻo Pōasi,+ko e foha ʻo Salemone,+ko e foha ʻo Naʻasoni,+
33 ko e foha ʻo ʻAminatape,ko e foha ʻo ʻAlanai,ko e foha ʻo Hesiloni,ko e foha ʻo Pēlesi,+ko e foha ʻo Siuta,+
34 ko e foha ʻo Sēkope,+ko e foha ʻo ʻAisake,+ko e foha ʻo ʻĒpalahame,+ko e foha ʻo Tela,+ko e foha ʻo Nēhoa,+
35 ko e foha ʻo Sēluki,+ko e foha ʻo Leʻu,+ko e foha ʻo Pēleki,+ko e foha ʻo ʻEpa,+ko e foha ʻo Sila,+
36 ko e foha ʻo Kānani,ko e foha ʻo ʻAfakisate,+ko e foha ʻo Semi,+ko e foha ʻo Noa,+ko e foha ʻo Lēmeki,+
37 ko e foha ʻo Mētuisela,+ko e foha ʻo ʻĪnoke,ko e foha ʻo Sēleti,+ko e foha ʻo Mahalalieli,+ko e foha ʻo Kānani,+
38 ko e foha ʻo ʻĪnosi,+ko e foha ʻo Seti,+ko e foha ʻo ʻĀtama,+ko e foha ʻo e ʻOtuá.
Fakamatala ‘i Lalo
^ ʻA ia, ko Hēlota ʻAnitipasa. Sio ki he Lea mo Hono ʻUhinga.
^ Sio ki he Fakamatala Fakalahi A5.
^ Pe “faʻahinga kotoa pē ʻo e tangatá.”
^ Pe “ki he founga faifakahaofi ʻa e ʻOtuá.”
^ Pe “ʻokú ne maʻu ha toe kofu ʻe tahá.”
^ Pe “tānaki.”
^ Pe “ʻi hoʻomou totongí.”
^ Pe “fale tukuʻanga koloá.”
