Palōveepi 18:1-24
18 ʻIlonga ʻa ia ʻokú ne fakamavaheʻi iá ʻokú ne tuli ki heʻene ngaahi holi siokita pē ʻaʻaná;ʻOkú ne talitekeʻi ʻa e* poto ʻaonga kotoa pē.
2 Ko ha tokotaha vale ʻoku ʻikai te ne leleiʻia ʻi hono maʻu ʻa e mahinó;ʻOkú ne saiʻia ange ke fakahaaʻi ʻa e meʻa ʻoku ʻi hono lotó.+
3 ʻI he haʻu ʻa ha tokotaha fulikivanu, ʻoku haʻu ai foki mo e taʻetokaʻi,Pea ʻoku ʻalu fakataha ʻa e taʻefakalāngilangiʻí mo e fakamā.+
4 Ko e ngaahi lea ʻi he ngutu ʻo ha tangata ko e ngaahi vai loloto ia.+
Ko e matavai ʻo e potó ko ha kiʻi vaitafe mapunopuna ia.
5 ʻOku ʻikai lelei ke filifilimānako ʻo kau mo e tokotaha fulikivanú+Pe ʻikai fakahoko ha fakamaau totonu ki he tokotaha māʻoniʻoní.+
6 Ko e lea ʻa e tokotaha valé ʻoku iku ai ki he kē,+Pea ʻoku fakaafeʻi mai ʻe hono ngutú hano taaʻi.+
7 Ko e ngutu ʻo e valé ko hono tuʻutāmakiʻangá ia,+Pea ko hono loungutú ko ha tauhele ia ki heʻene moʻuí.
8 Ko e ngaahi lea ʻa ha tokotaha laukovi loi ʻoku hangē ia ha ngaahi maʻanga meʻakai ifó;*+ʻOku folofua hifo ia ki hono keté.+
9 ʻIlonga ʻa ia ʻoku fakapikopiko ʻi heʻene ngāuéKo ha tokoua ia ʻo e tokotaha ʻokú ne fakatupunga ha maumau.+
10 Ko e huafa ʻo Sihová ko ha taua mālohi.+
ʻOku lele ki ai ʻa e tokotaha māʻoniʻoní ʻo ne malu ai.*+
11 Ko e koloa ʻa e tuʻumālié ko hono kolo fakakolotaú ia;ʻOku hangē ia ha ʻā malú ʻi heʻene fakakaukaú.+
12 ʻOku muʻomuʻa ʻi he haveʻí ʻa e ʻafungi ʻi he loto ʻo ha tangata,+Pea ʻoku muʻomuʻa ʻi he lāngilangí ʻa e anga-fakatōkilaló.+
13 ʻI hono fai ʻe ha taha ha tali ki ha meʻa ki muʻa ke ne fanongo ki he ngaahi moʻoniʻi meʻá,Ko e vale ia mo e meʻa fakamā.+
14 ʻOku lava ʻe he laumālie ʻo ha taha ke ne tokoniʻi ia ʻi heʻene puké,+Ka ko hai ʻe lava ke ne matuʻuaki ha laumālie mafesi?*+
15 Ko e loto ʻo e tokotaha mahinó ʻokú ne maʻu ʻa e ʻiló,+Pea ko e telinga ʻo e potó ʻokú ne kumi ke maʻu ʻa e ʻiló.
16 Ko e meʻaʻofa ʻa ha tangata ʻokú ne fakaava ai ʻa e hala kiate ia;+ʻOku lava ai ke ne aʻu ki he kakai māʻolungá.
17 Ko e tokotaha ʻokú ne ʻuluaki lea ʻo taukapoʻi iá ʻokú ne hā ngali totonu,+Kae ʻoua kuo haʻu ʻa e tafaʻaki ʻe tahá ʻo fakafehuʻi ia.*+
18 Ko hono fai ha lulú ʻoku fakangata ai ha ngaahi fakakikihi+Pea fai ai ha fili ʻi he vahaʻa ʻo ha* ongo faʻahi mālohi ʻokú na fehangahangai.
19 Ko ha tokoua kuo fakaʻitaʻi ʻoku ikuʻingataʻa ange ia ʻi ha kolo fakakolotau,+Pea ʻoku ʻi ai ʻa e ngaahi fakakikihi ʻoku hangē ko e ngaahi meʻa fakamaʻu ʻo e matapā ʻo ha kolotau.+
20 Ko e fua mei he lea ʻa ha* tangata ʻe fonu ai ʻa hono keté;+Te ne mākona ʻi he meʻa ʻoku haʻu mei hono loungutú.
21 Ko e maté mo e moʻuí ʻoku ʻi he mālohi ia ʻo e ʻeleló;+Ko e faʻahinga ʻoku nau saiʻia ke ngāueʻaki iá te nau kai ʻa hono fuá.+
22 Ko e tokotaha ʻokú ne maʻu ha uaifi leleí kuó ne maʻu ha meʻa lelei,+Pea ʻokú ne maʻu ʻa e hōifua* ʻa Sihová.+
23 ʻOku kōlenga ʻa e tangata masivá ʻi he taimi ʻokú ne lea aí,Ka ʻoku fai ʻe he tangata tuʻumālié ʻa e tali anga-kakaha.
24 ʻOku ʻi ai ha ngaahi kaungāmeʻa ʻoku nau mateuteu ke fefaikoviʻaki,+Ka ʻoku ʻi ai ha kaumeʻa ʻoku pipiki ofi ange ia ʻi ha tokoua.+
Fakamatala ‘i Lalo
^ Pe “fakahāhā ʻa e taʻetokaʻi ki he.”
^ Pe “hangē ko e ngaahi meʻa ʻoku foloʻi mānumanú.”
^ Fakafoʻilea, “pea ʻoku hiki hake ia ʻo māʻolunga,” ʻa ia, ʻoku ʻikai fai ha aʻu ki ai, ʻokú ne malu.
^ Pe “siva fakaʻaufuli ʻa e ʻamanakí?”
^ Pe “sivisiviʻi ia.”
^ Fakafoʻilea, “fakamavahevaheʻi ha.”
^ Fakafoʻilea, “ngutu ʻo ha.”
^ Pe “leleiʻia.”
