Bibiliya ituremesha gutanga ata gahato kandi tubitumwe n’imvo nziza. Yerekana ko gutanga muri ubwo buryo bigirira akamaro uwutanze n’uwuhawe. (Imigani 11:25; Luka 6:38) Yezu yavuze ati: “Gutanga birimwo agahimbare kuruta guhabwa.”​—Ivyakozwe 20:35.

•  Ni ryari gutanga biba ari vyiza?

•  Ni ryari gutanga bitaba ari vyiza?

•  Ivyanditswe bivuga ibijanye no gutanga

 Gutanga biba vyiza igihe umuntu abigize ata gahato. Bibiliya ivuga iti: “Umwe wese nagire nk’uko yavyiyemeje mu mutima wiwe, atabigiranye umwikomo canke ngo abigire agoberewe, kuko Imana ikunda uwutangana akamwemwe.”​—2 Abakorinto 9:7.

 Gutanga bivuye ku mutima biri mu bigize “insengo” Imana ishima. (Yakobo 1:27) Umuntu akunda gufasha abari n’ivyo bakeneye aba ariko akorana n’Imana, kandi Imana ibona ko aba ayiguranye. (Imigani 19:17) Bibiliya ivuga ko Imana ubwayo ari yo izobimwishura.​—Luka 14:12-14.

 Igihe umuntu abitumwe n’ubwikunzi. Nk’akarorero:

•   Igihe atanze ngo yiyerekane.​—Matayo 6:2.

•   Igihe atanze ngo na we azohabwe.​—Luka 14:12-14.

•   Igihe atanze ngo ni ho azoca ahezagirwa.​—Zaburi 49:6, 7.

 Igihe atanze kugira ashigikire ibintu Imana yanka. Nk’akarorero, si vyiza guha umuntu amahera atwara mu kamari, mu biyayuramutwe canke mu nzoga. (1 Abakorinto 6:9, 10; 2 Abakorinto 7:1) Si vyiza kandi guha umuntu yari ashoboye kwibeshaho ariko akaguma areze amaboko.​—2 Abatesalonika 3:10.

 Igihe bituma umuntu yirengagiza amabanga Imana yamujeje. Bibiliya ivuga ko ba serugo bategerezwa kuronsa imiryango yabo ivyo ikeneye. (1 Timoteyo 5:8) Ntivyoba vyiza serugo atanze gushika aho umuryango wiwe usigara wifumbereje. Na Yezu yariyamirije abanka gufasha abavyeyi babo bageze mu zabukuru, bakitwaza ngo ivyo bari kubaha ni “ingabirano yeguriwe Imana.”​—Mariko 7:9-13.