Библийы дзырдбаст «ногӕй райгуырын» амоны, Хуыцау адӕймагмӕ ӕндӕр цӕстӕй кӕсын кӕй райдайы, уымӕ (Иоанны 3:3, 7). Ногӕй чи райгуыры, уыдоны Хуыцау схоны йӕ хъӕбултӕ (Ромӕгтӕм 8:15, 16; Галатӕгтӕм 4:5; 1 Иоанны 3:1). Зӕгъӕм, адӕймаг закъонмӕ гӕсгӕ искӕй йӕхицӕн фырт куы скӕны, уӕд уый дӕр йӕ бинонтӕй свӕййы. Ӕмӕ раст афтӕ, ногӕй чи райгуыры, уый дӕр свӕййы Хуыцауы бинонтӕй (2 Коринфӕгтӕм 6:18).

Адӕймаг ногӕй цӕмӕн райгуыры?

 Йесо Чырысти загъта: «Адӕймаг ногӕй куы нӕ райгуыра, уӕд йӕ бон не суыдзӕн Хуыцауы паддзахад фенын» (Иоанны 3:3). Уӕдӕ адӕймаг ногӕй кӕй райгуыры, уый фӕрцы цӕттӕ вӕййы, фидӕны Чырыстиимӕ иумӕ Хуыцауы Паддзахады паддзах кӕй уыдзӕн, уымӕ. Уыцы Паддзахад разамынд дӕтты уӕлӕрвтӕй. Уымӕ гӕсгӕ Библийы, Хуыцау «ногӕй [кӕй] райгуырын кодта», уыдоны тыххӕй фыст ис, зӕгъгӕ, сӕ «бынтӕ уӕлӕрвты ӕвӕрдӕй лӕууынц» (1 Петры 1:3, 4). Ногӕй чи райгуыры, уыдон фидарӕй фӕзонынц, Чырыстиимӕ иумӕ паддзӕхтӕ кӕй уыдзысты (2 Тимофеймӕ 2:12; 2 Коринфӕгтӕм 1:21, 22).

Адӕймаг ногӕй куыд райгуыры?

 Чырысти ацы хъуыддагыл куы дзырдта, уӕд загъта, зӕгъгӕ, цӕмӕй адӕймаг ногӕй райгуыра, уый тыххӕй хъуамӕ «донаргъуыд... райса ӕмӕ Хуыцауы сыгъдӕг тыхӕй... схайджын уа» (Иоанны 3:5). Ацы ныхӕстӕ уымӕ амонынц, ӕмӕ адӕймаг фыццаг доны райсы аргъуыд, стӕй та – Хуыцауы сыгъдӕг тыхӕй (Хъуыддӕгтӕ 1:5; 2:1–4).

 Ногӕй чи райгуырд, уыдонӕй фыццаг уыд Чырысти. Уый Иорданы цӕугӕдоны донаргъуыд райста, ӕмӕ йӕ стӕй Хуыцау йӕ сыгъдӕг тыхӕй байсӕрста, ома йын йӕ сыгъдӕг тыхӕй аргъуыд радта. Афтӕмӕй Чырысти ногӕй райгуырд – Хуыцау ӕй йӕ фырт схуыдта ӕмӕ йын ныфс фӕзынд, фӕстӕмӕ уӕлӕрвтӕм кӕй ацӕудзӕн, уымӕй (Марчы 1:9–11). Ӕмӕ, ӕцӕгдӕр, Чырысти куы амард, уӕд ӕй Хуыцау райгас кодта уӕларвон цардмӕ (Хъуыддӕгтӕ 13:33).

 Чырыстийӕ уӕлдай ма, ногӕй чи райгуыры, уыдон дӕр донӕй аргъуыд райсынц ӕмӕ стӕй сыгъдӕг тыхӕй схайджын вӕййынц (Хъуыддӕгтӕ 2:38, 41) a. Ӕмӕ сын уӕд фидар ныфс фӕзыны, Хуыцау сӕ кӕй райгас кӕндзӕн ӕмӕ уӕлӕрвты кӕй цӕрдзысты (1 Коринфӕгтӕм 15:42–49).

Ногӕй райгуырын цы нысан кӕны, уый фӕдыл цавӕр рӕдыд хъуыдытӕ ис

 Рӕдыд хъуыды. Адӕймагӕн йӕхицӕй кӕнгӕ у, ногӕй райгуырдзӕн ӕви нӕ.

 Ӕцӕгӕй та куыд у. Алы адӕймагӕн дӕр фадат ис, цӕмӕй Хуыцауы хӕлар суа ӕмӕ йын фервӕзыны ныфыс уа (1 Тимофеймӕ 2:3, 4; Иаковы 4:8). Фӕлӕ ногӕй чи райгуырдзӕн, ома сыгъдӕг тыхӕй сӕрст чи ӕрцӕудзӕн, уый Хуыцауӕй аразгӕ у. Библийы куыд фыст ис, афтӕмӕй, «Хуыцау кӕй ӕвзары, уый, кӕй фӕнды, уымӕй кӕнгӕ дӕр нӕу ӕмӕ, ӕппӕт хъарутӕй чи архайы, уымӕй дӕр, фӕлӕ... Хуыцауӕй» (Ромӕгтӕм 9:16). Ногӕй чи райгуыры, уыдоны тыххӕй ма Библийы загъд ис, «Хуыцауӕй райгуырынц», зӕгъгӕ, ӕмӕ уымӕй дӕр бӕрӕг у, ногӕй чи райгуырдзӕн, уый Хуыцауӕй кӕнгӕ кӕй у (1 Иоанны 3:9).