Дууӕ адӕймаги еумӕ цӕрун ку райдайунцӕ, уӕд син фӕззиннуй аллихузи зиндзийнӕдтӕ. Уотӕ фӕууй, фӕйнӕхузи ке фӕгъгъуди кӕнунцӕ ӕма цардмӕ алке ӕхе цӕстӕй ке кӕсуй, уой туххӕй. Кенӕ син зиндзийнӕдтӕ фӕззиннуй, ӕнӕнгъӕлӕги ка ’рцӕуй, уӕхӕн хабӕртти туххӕй кенӕ ба ӕндӕр естӕй туххӕй.

Уӕхӕн уавӕри адӕймаги, ка ’й зонуй, маци фӕндӕуа кӕнун, фал Библи куд зӕгъуй, уомӕ гӕсгӕ зиндзийнӕдтӕй ледзун нӕ гъӕуй (Матфейи 5:23, 24). Библий уагӕвӕрдтӕмӕ гӕсгӕ ку архайайтӕ, уӕд уин е устур ӕнхус уодзӕй.

БИБЛИЙ ЦИ ФИНСТ ЕС? «Ес рӕстӕг... дзорунмӕ» (Екклесиаст 3:1, 7). Ци зиндзийнӕдтӕбӕл исӕмбалдайтӕ, уонӕбӕл лӕмбунӕг радзубанди кӕнтӕ. Дӕ гъудитӕ ӕма дӕ зӕрди ци ес, уони дӕ цардӕмбалӕн радзорӕ. Кӕрӕдземӕн алкӕддӕр дзоретӕ, «ӕцӕг ци ӕй, уой» (Ефесӕгтӕмӕ 4:25). Ку исмӕстгун уай, уӕддӕр гъӕр ма кӕнисӕ. Сабурӕй ку дзорай, уӕд уӕ дзурд хилӕмӕ нӕ рахездзӕй (Ӕмбесӕндтӕ 15:4; 26:20).

Дӕ цардӕмбали хӕццӕ арази ку нӕ уай, уӕддӕр ӕ хӕццӕ фӕлмӕнӕй дзорӕ ӕма бӕрӕг уӕд, ке ’й уарзис ӕма ин ке аргъ кӕнис, е (Колоссӕгтӕмӕ 4:6). Фарста куд тагъддӕр ниллух кӕнайтӕ, уотӕ хуӕздӕр, удта мадзора миутӕ дӕр ма кӕнтӕ (Ефесӕгтӕмӕ 4:26).

ЦИ ЕС БАКӔНӔН?

• Ести зин фарстабӕл уӕ радзубанди кӕнун ку гъӕуа, уӕд уомӕн рӕстӕг равзаретӕ.

• Дӕ цардӕмбалмӕ лӕмбунӕг байгъосӕ ӕма ин ӕ дзурд ӕрдӕгбӕл ма ракъуӕрӕ. Дӕуӕн дӕр уодзӕй фадуат дӕ гъуди зӕгъунмӕ.

БИБЛИЙ ЦИ ФИНСТ ЕС? «Кӕрӕдзей уарзетӕ... фӕлмӕн уарзтӕй. Кӕрӕдземӕн кадӕ кӕнунмӕ еу инней разӕй фӕууӕд» (Ромӕгтӕмӕ 12:10). Куд игъосис, уомӕй берӕ кӕнгӕ ’й. Дӕ цардӕмбали гъуди балӕдӕрӕ, ӕ «рист дӕмӕ гъарӕд... уо сӕрниллӕг» (1 Петури 3:8; Иакови 1:19). Лӕмбунӕг имӕ игъосӕ. Еститӕ ку косай, уӕддӕр дӕ куст фӕууадзӕ кенӕ ин зӕгъӕ, фӕстӕдӕр ке радзордзинайтӕ. Дӕ цардӕмбал дӕ нихмӕ ке нӕй, фал дӕ фарс ке ӕй, уой ку лӕдӕрай, уӕд ибӕл минкъий нецӕй туххӕй нӕ бостӕ кӕндзӕнӕ (Екклесиаст 7:9).

ЦИ ЕС БАКӔНӔН?

• Кӕд, ци дзоруй, е дӕ зӕрдӕмӕ нӕ цӕуй, уӕддӕр имӕ байгъосӕ ӕма байархайӕ, цӕмӕй ӕй балӕдӕрай.

• Ци дзоруй, айдагъ уомӕ ма игъосӕ, фал ци зӕгъунмӕ гъавуй, уой дӕр балӕдӕрӕ. Дӕ гъос дарӕ, ӕхе куд даруй ӕма куд дзоруй, уомӕ.

БИБЛИЙ ЦИ ФИНСТ ЕС? «Цийфӕнди хъиамӕтӕй дӕр ес пайда, айдагъ дзубандитӕ кӕми ес, уоми ба ес мӕгурдзийнадӕ» (Ӕмбесӕндтӕ 14:23). Айдагъ унаффӕ рахӕссун фагӕ нӕй. Еци унаффӕмӕ гӕсгӕ архайун дӕр гъӕуй. Ке зӕгъун ӕй гъӕуй, уомӕн берӕ хъауритӕ багъӕудзӕй, фал еци хъиамӕт уой аргъ ӕй (Ӕмбесӕндтӕ 10:4). Алли гъуддаги дӕр еумӕ ку архайайтӕ, уӕд уӕ «хъиамӕт дзӕгъӕли» нӕ фӕууодзӕй (Екклесиаст 4:9).

ЦИ ЕС БАКӔНӔН?

• Еумӕ радзоретӕ, алкӕмӕн дӕр уи ӕ бон ци ӕй бакӕнун, цӕмӕй уӕ гъуддаг ниллух кӕнайтӕ.

• Рӕстӕгӕй-рӕстӕгмӕ дзоретӕ, ци уин бантӕстӕй, уобӕл.