Ке зӕгъун ӕй гъӕуй, бийнонтӕ дарунмӕ ӕхца гъӕуй (Ӕмбесӕндтӕ 30:8). Библи куд зӕгъуй, уомӕ гӕсгӕ ӕхцатӕ адӕймаги гъӕуай кӕнунцӕ (Екклесиаст 7:12). Ка ’й зонуй, лӕг ӕма уосӕн ӕнцон нӕ фӕууй ӕхцай хӕццӕ баст гъуддӕгтӕбӕл дзорун, фал гъӕуама архайонцӕ, цӕмӕй сӕмӕ ӕхцай туххӕй хӕлхъой ма рауайа (Ефесӕгтӕмӕ 4:32). Лӕг ӕма уосӕ гъӕуама кӕрӕдзебӕл ӕууӕндонцӕ ӕма, се ’хцатӕ цӕбӕл харз кӕндзӕнцӕ, уой фӕдбӕл кӕрӕдзей хӕццӕ унаффӕ кӕнонцӕ.

БИБЛИЙ ЦИ ФИНСТ ЕС? «Сумахӕй еске мӕсуг исамайун ку исфӕндӕ кӕна, уӕд бал раздӕр не ’рбаддзӕй ӕма, е ’скӕнӕггаг цӕйбӕрцӕ ислӕудзӕй, уой нӕ банимайдзӕй, цӕмӕй ӕй зона, е ’скӕнуни фагӕ имӕ ес ӕви нӕ?» (Лукай 14:28). Уе ’хцатӕ цӕбӕл харз кӕндзинайтӕ, уой гъӕуама еумӕ пълан кӕнайтӕ (Амос 3:3). Расагъӕс кӕнтӕ, ӕцӕгӕйдӕр уӕ ци гъӕуй балхӕнун ӕма уӕ бон цӕйбӕрцӕ ’й бахарз кӕнун, уобӕл (Ӕмбесӕндтӕ 31:16). Ести балхӕнунмӕ уӕмӕ ’хца ке ес, е уобӕл дзорӕг нӕма ’й, ӕма ’й гъӕуама ӕлхӕнгӕ бакӕнайтӕ. Архайетӕ, цӕмӕй уӕ ӕфстау есун ма багъӕуа. Уӕ къох цӕйбӕрцӕ амонуй, уомӕй фулдӕр ма харз кӕнтӕ (Ӕмбесӕндтӕ 21:5; 22:7).

ЦИ ЕС БАКӔНӔН?

• Мӕйи кӕронмӕ уӕмӕ ’хца ку байзайа, уӕд бадзубанди кӕнтӕ, хуӕздӕр си куд ес испайда кӕнӕн, уобӕл.

• Ӕхца уин ку нӕбал фагӕ кӕна, удта бадзубанди кӕнтӕ, цӕмӕй уӕ хӕрзтӕ фӕмминкъийдӕр кӕнайтӕ. Зӕгъӕн, цӕттӕ хуӕруйнаг ӕлхӕнуни бӕсти ’й уӕхуӕдтӕ кӕнтӕ.

БИБЛИЙ ЦИ ФИНСТ ЕС? «Архайетӕ алцидӕр ӕнӕзӕрдихудтӕй кӕнун, ӕма айдагъ Йегови рази нӕ, фал адӕми рази дӕр» (2 Коринфӕгтӕмӕ 8:21). Дӕ цардӕмбалӕн ӕргом дзорӕ, ӕхца дӕмӕ цӕйбӕрцӕ ӕфтуйуй ӕма цӕйбӕрцӕ бахарз кӕнис, уой.

Устур хӕрзтӕ кӕнун дӕ ку багъӕуа, уӕд дӕ цардӕмбали хӕццӕ радзубанди кӕнӕ (Ӕмбесӕндтӕ 13:10). Ӕхцай туххӕй ӕргом ку дзорайтӕ, уӕд уӕ медастӕу фарнӕ уодзӕй. Иронх ди ма уӕд, ци ’хца уӕмӕ ӕфтуйуй, етӕ айдагъ дӕу нӕ ’нцӕ, фал уӕ дууей дӕр (1 Тимофеймӕ 5:8).

ЦИ ЕС БАКӔНӔН?

• Бадзубанди кӕнтӕ, ӕнӕ кӕрӕдзей фӕрсгӕй уи алкӕмӕн дӕр ӕ бон цӕйбӕрцӕ ’й бахарз кӕнун, уобӕл.

• Цалинмӕ уин ӕхцай хӕццӕ баст зиндзийнӕдтӕ нӕма фӕззиндтӕй, уӕдмӕ сӕбӕл рагацау дзоретӕ.