“Namni tokko sirreeffama yeroo sii kennu, dogoggora tokko akka hojjette sitti himaa jira jechuudha. Namni ‘Dogoggora akkan hojjedhe yeroo natti himan natti tola’ jedhu jira jedhee hin yaadu.”—Eemii, umrii waggaa 17. *

Sirreeffama warrakee, barsiisotakeefi nama guddaarraa sii kennamu fudhachuun sitti ulfaataa? Akkas yoo taʼe, matadureen kun si gargaara.

Namni sirreeffamni isa hin barbaachisne hin jiru.

“Nuyi hundumti keenya baayʼee irraa in kaanna.”—Yaaqoob 3:2.

“Dogoggora tokko yeroo hojjettu sirreeffamni sii kennamuunsaa waan nama qaanessu miti.”—Jeesiikaa.

Sirreeffamni sii kennamuunsaa ati nama gadhee akka taate kan argisiisu miti.

“Abbaan ilma isaa isa jaallatu akkuma adabu, Waaqayyo nama jaallatu in adaba.”—Fakkeenya 3:12.

“Namoonni yeroo sirreeffama naa kennan, kana gochuun hammam isaanitti ulfaatee taʼuu akka dandaʼuufi gorsa naa kennuunsaanii jaalala naaf qaban kan argisiisu taʼuusaarrattin xiyyeeffadha.”—Tamaaraa.

Sirreeffamni nama fooyyaʼaa akka taatu si godha.

“Gorsa dhagaʼaa, ogeessotas taʼaa.”—Fakkeenya 8:33, hiika bara 1899.

“Sirreeffamni guddina gochuuf baayʼee barbaachisaadha. Ilaalcha namoonni siif qaban hubachuuf, akkasumas amala gadhee ati qabaachuu keellee hin beekne jijjiiruuf si gargaara.”—Diyaan.

Dhimmichaaf ilaalcha sirrii qabaadhu. Sirreeffamni tokko yeroo sii kennamu aaruu dandeessa taʼa. Taʼuyyuu miirakeerratti xiyyeeffachuu dhiisuuf yaali. Kana gochuuf akka si gargaaruuf, yeroodhaaf haala sana keessaa of baasiitii akka waan nama biraatiif, tarii quxisuukeetiif gorsuma kana kennaa jirtuutti yaadi. Ammahoo faayidaa gorsi kun qabu hubattee? Mee ammammoo haala sana keessa deebisii of galchiitii, faayidaa inni siif qaburratti yaaduuf yaali.—Seera buʼuuraa Macaafa Qulqulluu: Lallaba 7:9.

“Al tokko tokko namni gorsa kan sii kennu miirakee miidhuuf utuu hin taʼin, nama fooyyaʼaa akka taatu si gargaaruuf akka taʼe waan irraanfattuuf sirreeffamni sii kennamuusaatti ni aarta taʼa.”—Tariisa.

Gad of deebisi. Koorri sirreeffama fudhachuurraa duubatti akka jettu akka si godhu hin heyyamin. Karaa gara biraatiinimmoo, wanti sirreessuu qabdu jiraachuunsaa abdii si kutachiisuu hin qabu. Gad of deebisuun koorarraas taʼe abdii kutachuurraa si eega. Sirreeffamni fudhachuuf baayʼee sitti ulfaate tokko sirreeffama baayʼee si barbaachisu taʼuu akka dandaʼu yaadadhu. Sababa kamiiniyyuu kan kaʼe sirreeffama kana yoo fudhachuu didde, carraa gaarii guddina gochuuf si gargaaru tokko dhabdeetta jechuudha.—Seera buʼuuraa Macaafa Qulqulluu: Fakkeenya 16:18.

“Gaʼeessa taʼuuf sirreeffama fudhachuun baayʼee barbaachisaadha. Sirreeffama nuu kennamu fudhannee guddina hin goonu taanaan, yeroo booda miidhaan nurra gaʼuunsaa hin oolu.”—Liinaa.

Kan galateeffattu taʼi. Sirreeffama sii kenname fudhachuun ulfaataa sitti taʼus, nama sirreeffama sana sii kenne maaliif hin galateeffattu? Namni kun jaalala akka siif qabuufi akka milkooftu akka barbaadu hin shakkisiisu.—Seera buʼuuraa Macaafa Qulqulluu: Faarfannaa 141:5.

“Keessumaa yeroo gorsi si barbaachisu sii kennamutti, ‘Galatoomi’ jechuun dogoggora miti. Gorsi si hin barbaachisne yeroo sii kennamuttillee, carraaqqii namni sun sitti dhihaatee si gorsuuf godheef isa galateeffachuu dandeessa.”—Kaarlaa.