Maake Edwɛkpa 1:1-45
-
Dwɔn Sɔnevolɛ ne bɔ nolo (1-8)
-
Gyisɛse ɛzɔnenlɛ (9-11)
-
Seetan zɔle Gyisɛse nleanle (12, 13)
-
Gyisɛse bɔle edwɛkɛhanlɛ ne abo wɔ Galeli (14, 15)
-
Ɛdoavolɛma mɔɔ limoa la ɛvɛlɛlɛ (16-20)
-
Ɔdule sunsum ɛtane (21-28)
-
Gyisɛse yɛ menli dɔɔnwo ayile wɔ Kapɛnayɛm (29-34)
-
Ɔyɛle asɔne wɔ ɛleka koonwu bie (35-39)
-
Kokobɛvolɛ bie ayileyɛlɛ (40-45)
1 Gyisɛse Kelaese, Nyamenle Ara ne anwo edwɛkpa ne mɔlebɛbo:
2 Kɛ mɔɔ ngapezonli Ayezaya hɛlɛle la: “(Nea! Melɛsoa me ɛbɔfoɔ meamaa yealimoa ɛ nyunlu, na yemɔ a ɔbaziezie wɔ adenle nu a.)+
3 Ɛnelɛ bie ɛlɛtea nu wɔ fienemgbole ne anu kɛ: ‘Bɛziezie Gyihova* adenle ne! Bɛmaa ye ndenle ɛdenrɛ.’”+
4 Ɛnee Dwɔn Sɔnevolɛ ne wɔ fienemgbole ne anu ɔlɛbɔ ɛzɔnenlɛ mɔɔ gyi ɛkɛ maa anlubɛnwo mɔɔ kɔ ɛtanefakyɛ nu la anwo nolo.+
5 Na Dwudiya maanzinli ne amuala nee Gyɛlusalɛm amra amuala hɔle ye ɛkɛ, na ɔzɔnenle* bɛ wɔ Azule Dwɔdan ne anu, na bɛhanle bɛ ɛtane ne mɔ wɔ bagua nu.+
6 Ɛnee Dwɔn wula tɛladeɛ mɔɔ bɛva afunlumu enrinli bɛnwo la yɛɛ nane nwoma bɛlɛte hye ɔ nze zo,+ na ɛnee ɔdi abɛbɛ nee ɛbɔ nu wolɛ.+
7 Na ɔbɔle nolo kɛ: “Awie li me nzi ɛlɛba mɔɔ ɔlɛ tumi ɔtɛla me a, menfɛta kɛ mekɛbutu mekɛzianyi ye mgbɔlaboa zo nyɛma bɔbɔ.+
8 Mame, menvale nzule a menzɔnenle bɛ a, na yemɔ ɔbava sunsum nwuanzanwuanza a yeazɔne bɛ a.”+
9 Mekɛ zɔhane anu, Gyisɛse vi Nazalɛte mɔɔ wɔ Galeli la rale, na ɔmaanle Dwɔn zɔnenle ye wɔ Dwɔdan ne anu.+
10 Na mɔɔ ɔvi nzule ne anu ɔvindele ala la, ɔnwunle kɛ anwuma ɛbuke na sunsum ne ɛlɛdwu kɛ abubule la ara ɔ nwo zo.+
11 Na ɛnelɛ bie vi anwuma hanle kɛ: “Ɛle me Ra mɔɔ mekulo wɔ; melie wɔ medo nu.”+
12 Na ndɛndɛ ne ala sunsum ne maanle ɔhɔle fienemgbole ne anu.
13 Yemɔti ɔdɛnlanle fienemgbole ne anu kenle 40, na Seetan zɔle ye nleanle.+ Ɔ nee nane mɔɔ bɛ nwo yɛ ɛzulolɛ la dɛnlanle, noko anwumabɔvolɛma boale ye.+
14 Akee mekɛ mɔɔ bɛhyele Dwɔn la, Gyisɛse hɔle Galeli+ hɔbɔle Nyamenle anwo edwɛkpa ne nolo+
15 na ɔhanle kɛ: “Mekɛ ne mɔɔ bɛhile la ɛdwu, Nyamenle Belemgbunlililɛ ne ɛbikye. Bɛnlu bɛ nwo,+ na bɛlie edwɛkpa ne bɛli.”
16 Mekɛ mɔɔ ɔlua Galeli Nyevile* ne anloa la, ɔnwunle Saemɔn nee ɔ diema Andelu+ kɛ bɛlɛgua bɛ asawu wɔ nyevile ne anu,+ ɔluakɛ bɛle fɛlɛkyevoma.+
17 Na Gyisɛse zele bɛ kɛ: “Bɛdoa me, na mebamaa bɛahye menli kɛ bɛkye fɛlɛ la.”+
18 Na ɛkɛ ne ala bɛgyakyile bɛ asawu ne ɛkɛ na bɛdoale ye.+
19 Ɔhɔle ɔ nyunlu ekyii la, ɔnwunle Zɛbɛdi ara Gyemise nee ɔ diema Dwɔn kɛ bɛde bɛ ɛlɛne nu bɛlɛyɛ bɛ avonle boɛ,*+
20 na ndɛndɛ ne ala ɔvɛlɛle bɛ. Yemɔti bɛgyakyile bɛ papa Zɛbɛdi nee ɛkpafoma ne wɔ ɛlɛne ne anu na bɛdoale ye.
21 Na bɛhɔle Kapɛnayɛm.
Ɛnwomenlelielɛ kenle ne dwule ala la, ɔhɔle nyianusua ne anu na ɔbɔle ɔ bo kɛ ɔkilehile.+
22 Na kɛzi ɔhilehilele la zinle bɛ nwo, ɔluakɛ ɛnee ɔlɛkilehile bɛ kɛ awie mɔɔ lɛ tumi, na ɔnle kɛ mɛla kilehilevolɛma* ne la.+
23 Mekɛ ne anu ala, ɛnee nrenyia bie mɔɔ sunsum ɛtane wɔ ɔ nwo la wɔ bɛ nyianusua ne anu, na ɔdeanle nu kɛ:
24 “Duzu a ɛkpondɛ wɔavi yɛ ɛkɛ a, Gyisɛse mɔɔ vi Nazalɛte?+ Wɔra kɛ ɛbazɛkye yɛ ɔ? Meze wɔ sonla holɛ, wɔmɔ a ɛle Nwuanzanwuanzanli ne mɔɔ vi Nyamenle ɛkɛ la!”+
25 Noko Gyisɛse deanle ye hanle kɛ: “Yɛ koonwu na fi ɔ nwo tu!”
26 Na sunsum ɛtane ne kpusule nrenyia ne kpole kpalɛ,* na ɔdeanle nu kpole na ɔvi ɔ nwo ɔdule.
27 Ɔyɛle menli ne amuala azibɛnwo kpole na bɛbɔle ɔ bo bɛhanle bɛhilele bɛ nwo ngoko kɛ: “Duzu ɛne? Ngilehilelɛ fofolɛ boni a le ɛhye! Ɔtendɛ tumi zo ɔkile sunsum ɛtane ne mɔ bɔbɔ a, bɛtie ye.”
28 Na ndɛndɛ ne ala ɔ nwo edwɛkɛ dɛlɛle hɔle Galeli maanzinli ne anu amuala.
29 Akee bɛvile nyianusua ne anu na bɛ nee Gyemise nee Dwɔn hɔle Saemɔn nee Andelu sua nu.+
30 Ɛnee ebunlu ɛhye Saemɔn ase*+ na ɔla ɛkɛ, na ɛkɛ ne ala bɛbɔle ye amaneɛ.
31 Ɔhɔle ɔ nwo ɛkɛ ne na ɔzɔle ɔ sa ɔmaanle ye zo. Ebunlu ne hɔle, na ɔkpondɛle debie ɔmaanle bɛ.
32 Ɔdwule nɔsolɛ nu mɔɔ ɛnee sɛnzɛne ne ɛhɔdɔ la, menli bɔle ɔ bo vale bɛdabɛ mɔɔ bɛnde kpɔkɛ la amuala nee bɛdabɛ mɔɔ sunsum ɛtane wɔ bɛ nwo la rɛlɛle ye;+
33 na sua ne azo amra amuala rayile anlenkɛ ne anloa.
34 Yemɔti ɔyɛle bɛdabɛ mɔɔ ewule ngakyile wɔ bɛ nwo la ayile,+ na ɔdule sunsum ɛtane dɔɔnwo, noko yeammaa sunsum ɛtane ne mɔ andendɛ, ɔluakɛ ɛnee bɛze ye kɛ yemɔ a ɔle Kelaese ne a.*
35 Nwonlomɔ mangyee ne, mɔɔ maanle nu ɛtɛtetele la, ɔdwazole na ɔvindele ɔhɔle ɛleka koonwu bie, na ɔbɔle ɔ bo kɛ ɔyɛ asɔne.+
36 Noko Saemɔn nee bɛdabɛ mɔɔ ɔ nee bɛ lua la hɔkpondɛle ye
37 na mɔɔ bɛnwunle ye la, bɛzele ye kɛ: “Awie biala ɛlɛkpondɛ wɔ.”
38 Noko ɔzele bɛ kɛ: “Bɛmaa yɛhɔ ɛleka fofolɛ, wɔ azua mɔɔ bikye la azo, amaa meaha edwɛkɛ ne wɔ ɛkɛ ne noko, ɔluakɛ ɛhye ati a membale a.”+
39 Na ɔhɔhanle edwɛkɛ ne wɔ bɛ nyianu azua ne mɔ anu wɔ Galeli amuala na ɔdule sunsum ɛtane dɔɔnwo.+
40 Kokobɛvolɛ bie noko rahotole bodole ye na ɔhanle kɛ: “Saa ɛkulo a, maa me nwo ɛde.”+
41 Alɔbɔlɛ hunle ye, na ɔdenrɛle ɔ sa ɔzɔle ye na ɔzele ye kɛ: “Mekulo! Ɛ nwo ɛde.”+
42 Ɛkɛ ne ala ye kokobɛ ne hɔle na ɔ nwo dele.
43 Akee ɔbɔle ye kɔkɔ ɛsesebɛ na ɔgyakyile ye ɛkɛ ne ala kɛ ɔhɔ,
44 na ɔzele ye kɛ: “Nea na awie biala ande nwolɛ edwɛkɛ, noko kɔva ɛ nwo kile ɛsɔfo ne na fa wɔ anwodelɛ nwo afɔlebɔlɛ ninyɛne ne mɔ kɔ kɛ mɔɔ Mosisi hanle la,+ amaa yeayɛ daselɛ yeamaa bɛ.”+
45 Noko nrenyia ne vile ɛkɛ ne la, ɔhɔbɔle ye nolo wɔ ɛleka biala, yemɔti Gyisɛse angola anye ɔ nyunlu angɔ sua biala azo, emomu, ɔhɔdɛnlanle sua ne kandiba ɛleka koonwu bie. Noko bɛvi ɛleka ngakyile bɛrale ɔ nwo ɛkɛ.+
Ɔbodwɛkɛ
^ Anzɛɛ “ɔnlomanle; ɔwulale.”
^ Anzɛɛ “Tandane.”
^ Anzɛɛ “bɛlɛsa bɛ avonle.”
^ Mɔlebɛbo ne, ɛnee ɛhye le Ngɛlɛlera ne anwo kɛlɛhɛlɛvolɛ, noko wɔ Gyisɛse mekɛ zo, ɛnee ɔle awie mɔɔ ze Mɛla ne kpalɛ na ɔkilehile la.
^ Giliki aneɛ nu, “maanle nrenyia ne pɛle mgbutike.”
^ Anzɛɛ “aye ne mame.”
^ Anzɛɛ ɔkola ɔkile, “bɛze ye sonla holɛ.”
