Maake Edwɛkpa 12:1-44
12 Akee ɔbɔle ɔ bo ɔvale ndonwo ɔdendɛle ɔhilele bɛ kɛ: “Nrenyia bie yɛle vanye egyinli+ na ɔliele nwolɛ bane na ɔdule kuma mɔɔ bɛbahwihwi vanye ma ne nu la wɔ nu na ɔzile tawa;+ akee ɔvale ɔwulale ɛyazonlɛma asa anu na ɔdule adenle.+
2 Mɔɔ ma ɛdelɛ mekɛ ne dwule la, ɔzoanle ye akɛlɛ bie kɛ ɔhɔ ɛyazonlɛma ne ɛkɛ ɔhɔlie vanye egyinli ne anu ma ne bie ɔrɛlɛ ye.
3 Noko bɛhyele ye, bɛbole ye, na bɛmaanle ɔvale ɔ sa mgbane ɔhɔle.
4 Na ɔzoanle akɛlɛ bieko wɔ bɛ nwo ɛkɛ, na ɔdaye noko bɛvale debie bɛbɔle ɔ ti zo na bɛguale ɔ nyunlu aze.+
5 Na ɔzoanle bieko, na yemɔ bɛhunle ye, nee gyɛne dɔɔnwo noko, bɛbole bie mɔ yɛɛ bɛhunle bie mɔ.
6 Ɛnee yeha sonla ko, ɔ ra nrenyia mɔɔ ɔkulo ye la.+ Nzinlii, ɔzoanle ye wɔ bɛ nwo lɔ na ɔhanle kɛ, ‘Bɛbabu me ra ne.’
7 Noko ɛyazonlɛma ne hanle hilele bɛ nwo ngoko kɛ, ‘Koliagya ne ɛne.+ Bɛrɛla bɛmaa yɛhu ye, na agyapadeɛ ne bayɛ yɛ ɛdeɛ.’
8 Yemɔti bɛhyele ye bɛhunle ye na bɛhwenle ye bɛhɔdole vanye egyinli ne anzi lɔ.+
9 Duzu a vanye egyinli menle ne bayɛ a? Ɔbarahu ɛyazonlɛma ne na yeava vanye egyinli ne yeamaa menli fofolɛ.+
10 Asoo bɛtɛkengale ngɛlɛlera ɛhye: ‘Bolɛ ne mɔɔ suasivoma ne kpole la, ɛrayɛ mgbɛnezo bolɛ mɔɔ anwo hyia kpalɛ.+
11 Ɛhye vi Gyihova,* na ɔyɛ nwanwane wɔ yɛ nye zo’ la ɛlɛ ɔ?”+
12 Ɔti ɛnee bɛkpondɛ kɛ bɛkye ye, ɔluakɛ bɛnwunle kɛ bɛdabɛ ti a ɔyɛle ndonwo ne a, noko bɛzulole menli ne. Yemɔti bɛgyakyile ye ɛkɛ na bɛhɔle.+
13 Akee bɛzoanle Falasiima nee Hɛlɔdo eku ne anu amra bie mɔ wɔ ɔ nwo ɛkɛ amaa bɛalua ye ɛdendɛlɛ zo bɛahye ye.+
14 Mɔɔ bɛrale la, bɛzele ye kɛ: “Kilehilevolɛ, yɛze kɛ ɛka nɔhalɛ yɛɛ ɛmkpondɛ awie biala anyunlu ɛlolɛ, ɔluakɛ ɛnnea sonla nyunlu, na ɛkilehile Nyamenle adenle ne wɔ nɔhalɛ nu. Asoo mɛla maa adenle* kɛ bɛdua adwule bɛmaa Siza anzɛɛ ɔmmaa adenle?
15 Ɔwɔ kɛ yɛtua anzɛɛ ɔnle kɛ yɛtua?” Mɔɔ ɔnwunle bɛ nabalaba ne la, ɔzele bɛ kɛ: “Duzu ati a bɛlɛsɔ me bɛanlea ɛ? Bɛva denale* ne bie bɛrɛla bɛmaa menea.”
16 Bɛvale ko bɛrale, na ɔzele bɛ kɛ: “Nwane nvoninli nee ye ngɛlɛlera a le ɛhye?” Bɛzele ye kɛ: “Siza ɔ.”
17 Akee Gyisɛse hanle kɛ: “Bɛva Siza ɛdeɛ bɛmaa Siza,+ na bɛva Nyamenle ɛdeɛ bɛmaa Nyamenle.”+ Na ɔ nwo yɛle bɛ azibɛnwo.
18 Akee Sadusiima mɔɔ bɛka kɛ ewudwazo ɛnle ɛkɛ+ ne la rale ɛkɛ na bɛbizale ye kɛ:+
19 “Kilehilevolɛ, Mosisi hɛlɛle maanle yɛ kɛ saa awie adiema nrenyia wu gyakyi ɔ ye na ɔnlɛ ralɛ a, ɔwɔ kɛ ɔ diema nrenyia gya ɔ ye ne na ɔ nee ye wo mralɛ maa ɔ diema ne.+
20 Ɛnee mediema mrenyia nsuu bie wɔ ɛkɛ. Mɔɔ limoa la gyale raalɛ, noko ɔ nee ye anwo na yeawu.
21 Na mɔɔ tɔ zo nwiɔ la gyale raalɛ ne, na ɔdaye noko ɔ nee ye anwo na yeawu, yɛɛ mɔɔ tɔ zo nsa la noko zɔhane ala.
22 Na menli nsuu ne amuala nee ye anwo. Nzinlii raalɛ ne noko wule.
23 Ewudwazo ne anu, boni a raalɛ ne bayɛ ɔ ye a? Ɔluakɛ menli nsuu ne amuala gyale ye bie.”
24 Gyisɛse buale bɛ kɛ: “Bɛnze Ngɛlɛlera ne anzɛɛ Nyamenle tumi ne, na asoo tɛ ɛhye ati a bɛvo la ɔ?+
25 Ɔluakɛ saa bɛdwazo bɛfi mowuamra anu a, mrenyia ɛnrɛgya anzɛɛ bɛnrɛva mraalɛ bɛnrɛmaa agyalɛ, emomu, bɛbayɛ kɛ anwumabɔvolɛma mɔɔ wɔ anwuma la.+
26 Na mɔɔ fale mowuamra ɛdwazolɛ ne anwo la, asoo bɛtɛkengale ye wɔ Mosisi buluku ne anu wɔ kpɔkɛ ne anwo edwɛkɛ ne anu kɛ, Nyamenle zele ye kɛ: ‘Mame a mele Ebileham Nyamenle ne nee Ayezeke Nyamenle ne nee Gyekɔbo Nyamenle ne a’?+
27 Ɔnle mowuamra Nyamenle, emomu teasema Nyamenle. Bɛvo kpole kpalɛ.”+
28 Mɛla kilehilevolɛma ne anu ko mɔɔ rale ɛkɛ ne la dele kɛ bɛlɛsu kpolera na ɔnwunle kɛ yebua bɛ edwɛkɛ ne kɛnlɛma la, ɔbizale ye kɛ: “Mɛla ne boni a limoa* a?”+
29 Gyisɛse buale kɛ: “Mɔɔ limoa la a le kɛ, ‘O Yizilayɛ, tie, Gyihova* yɛ Nyamenle ne le Gyihova* kokye,
30 na fa wɔ ahonle muala nee wɔ ɛkɛla* muala nee wɔ adwenle muala nee wɔ anwosesebɛ muala kulo Gyihova* wɔ Nyamenle ne.’+
31 Mɔɔ tɔ zo nwiɔ la a le ɛhye, ‘Kulo ɛ gɔnwo kɛ ɛ nwo.’+ Mɛla bieko ɛnle ɛkɛ mɔɔ le kpole tɛla ɛhye mɔ a.”
32 Mɛla kilehilevolɛ ne zele ye kɛ: “Kilehilevolɛ, wɔdendɛ kɛnlɛma, ɔle nɔhalɛ bɔkɔɔ, ‘Ɔle Kokye, na bieko ɛnle ɛkɛ ne kɛ Ɔdaye ala’;+
33 na awie ahonle muala, ye ndelebɛbo muala, nee ye anwosesebɛ muala mɔɔ ɔfa yeahulo ye na yeahulo ɔ gɔnwo kɛ ɔ nwo la sonle bolɛ tɛla ɛyelalɛ afɔlebɔlɛ nee afɔlebɔlɛ kɔsɔɔti.”+
34 Mɔɔ Gyisɛse nwunle kɛ yebua ye nrɛlɛbɛ nu la, ɔzele ye kɛ: “Ɛ nee Nyamenle Belemgbunlililɛ ne avinli anwa.” Na awie biala annyia akɛnrasesebɛ ambiza ye edwɛkɛ bieko.+
35 Noko mɔɔ Gyisɛse ɛlɛkilehile wɔ ɛzonlenlɛsua ne anu la, ɔhanle kɛ: “Kɛmɔti a mɛla kilehilevolɛma ne se Kelaese ne le Devidi ara ɛ?+
36 Sunsum nwuanzanwuanza ne+ maanle Devidi mumua ne hanle kɛ, ‘Gyihova* zele me Awulae kɛ: “Tɛnla me sa fema zo kɔkpula kɛ mebava wɔ agbɔvolɛ meawula ɛ gyakɛ abo la.”’+
37 Devidi mumua ne vɛlɛle ye Awulae, yemɔti kɛzi ɔkola ɔyɛ ɔ ra ɛ?”+
Na ɛnee menli dɔɔnwo ne ɛlɛfa anyelielɛ adie ye.
38 Wɔ ye ngilehilelɛ ne anu, ɔhanle kɛ: “Bɛnlea boɛ wɔ mɛla kilehilevolɛma* mɔɔ bɛkulo kɛ bɛwula adɛladeɛ ndendenle bɛkpɔsa na bɛkulo gua zo ahyebizalɛ+
39 nee nyianu azua nu mbia mɔɔ wɔ ɔ nyunlu* nee ɛleka mɔɔ menli titili tɛnla wɔ nɔsolɛ ɛkponledolɛ bo la anwo.+
40 Bɛbɔ ahunlanvolɛ awuke* na bɛkpati bɛyɛ asɔne ndendenle. Ɛhye mɔ banyia ndɛnebualɛ mɔɔ anu yɛ se kpalɛ la.”
41 Na ɔdɛnlanle aze mɔɔ ɛnee ɔ nye dua ezukoa nlɛka ne mɔ,+ na ɔbɔle ɔ bo ɔnleanle kɛzi menli dɔɔnwo ɛlɛfa ezukoa agua ezukoa nlɛka ne mɔ anu la, na sukoavolɛma dɔɔnwo vale ezukoa dɔɔnwo raguale nu.+
42 Akee kunlavolɛ ehyianli bie vale ngapɛlɛ nwiɔ mɔɔ ɛnzonle bolɛ biala* la raguale nu.+
43 Ɔti ɔvɛlɛle ye ɛdoavolɛma ne wɔ ɔ nwo ɛkɛ na ɔzele bɛ kɛ: “Nɔhalɛ nu meka meahile bɛ kɛ, kunlavolɛ ehyianli ɛhye ɛva dɔɔnwo ɛgua nu ɛdɛla bɛdabɛ mɔɔ bɛva ezukoa bɛgua ezukoa nlɛka ne mɔ anu la amuala.+
44 Ɔluakɛ bɛ kɔsɔɔti bɛva mɔɔ bɛnyia bɛmaa yebo zo la bie a bɛragua nu a, noko yemɔ, ɔvi ye ehyia nu, yeva debie biala mɔɔ ɔlɛ, mɔɔ ɛha ɔ nwo la amuala a yeragua nu a.”+
Ɔbodwɛkɛ
^ Anzɛɛ “asoo ɔle kpalɛ.”
^ Anzɛɛ “hyia kpalɛ.”
^ Nea Edwɛkɛbohilelɛ.
^ Mɔlebɛbo ne, ɛnee ɛhye le Ngɛlɛlera ne anwo kɛlɛhɛlɛvolɛ, noko wɔ Gyisɛse mekɛ zo, ɛnee ɔle awie mɔɔ ze Mɛla ne kpalɛ na ɔkilehile la.
^ Anzɛɛ “mɔɔ le kpalɛ.”
^ Anzɛɛ “bɛsɛkye bɛ agyapadeɛ.”
