Ayezaya 63:1-19
63 Nwane a vi Yidɔm ɛlɛba,+Ahenle mɔɔ vi Bɔzela ɛlɛba+ mɔɔ ye tɛladeɛ ne ɛlɛta,*Ye tɛladeɛ ne le kɛnlɛma,Na ɔlɛfa ye tumi kpole ne yeadia la ɛ?
“Medame ɔ, Ahenle mɔɔ tendɛ tenleneyɛlɛ nu,Na ɔfa tumi kpole ɔdie ngoane la ɔ.”
2 Duzu ati a wɔ ɛdanlɛ ne anye ɛyɛ kɔkɔlɛ,Na wɔ adɛladeɛ ne mɔ anye ɛyɛ kɛ awie mɔɔ ɛlɛtietia vanye ma zo wɔ nwanye ɛhwihwinlɛ kuma nu la ɛ?+
3 “Me ngome a mentietiale vanye ma ne azo wɔ nwanye ɛhwihwinlɛ kuma ne anu a.
Ɛnee awie biala ɛmboka me nwo.
Mentietiale bɛ nwo zo wɔ me ɛya ne anu,+Na memkposole bɛ wɔ me ɛya kpole ne anu.
Bɛ mogya guale me adɛladeɛ ne mɔ anu,Na mezɛkye me ɛdanlɛ ne kɔsɔɔti anu.
4 Ɔluakɛ nzenralɛlilɛ kenle ne wɔ me ahonle nu,+Yɛɛ ɛvolɛ mɔɔ mebava meakpɔne me menli ne la ɛdwu.
5 Meneanle, noko ɛnee awie biala ɛnle ɛkɛ mɔɔ ɔbaboa me a;Ɔzinle me nwo kɛ awie biala amboa me la.
Yemɔti me sa vale ngoanelielɛ* rale,+Na me ɛya kpole ne boale me.
6 Mentietiale menli nwo zo wɔ me ɛya ne anu,Memaanle me ɛya kpole ne bole bɛ+Na menwolale bɛ mogya menguale azɛlɛ nwo.”
7 Mebaha Gyihova ɛlɔlɛ kpundii,Nee Gyihova ayɛlɛyelɛ gyima ne mɔ meahile,Ɔlua ninyɛne kɔsɔɔti mɔɔ Gyihova ɛyɛ ɛmaa yɛ la ati,+Ninyɛne mgbalɛ dɔɔnwo mɔɔ yeyɛ yemaa Yizilayɛma,Kɛ mɔɔ ye anwunvɔnezelɛ nee ye ɛlɔlɛ kpundii ne de la.
8 Ɔluakɛ ɔhanle kɛ: “Nɔhalɛ nu, bɛle me menli, bɛle mralɛ mɔɔ bɛnrɛbɔ adalɛ.”+
Ɔti ɔyɛle bɛ Ngoanedievolɛ.+
9 Bɛ nyanelilɛ mekɛ ne amuala anu, ɔlile nyane.+
Na ɔdaye mumua ne ye soanvolɛ* liele bɛ.+
Ɔluale ye ɛlɔlɛ nee ye anwunvɔnezelɛ* zo ɔkpɔnenle bɛ,+Na ɔmaanle bɛ zo ɔviale bɛ wɔ tete mekɛ ne anu amuala.+
10 Noko bɛdele atua+ na bɛmaanle ye sunsum nwuanzanwuanza ne lile nyane.+
Akee ɔhakyile bɛ kpɔvolɛ,+Na ɔ nee bɛ honle.+
11 Bɛhakyele tete ne,Ye sonvolɛ Mosisi mekɛ zo, na bɛhanle kɛ:
“Ahenle mɔɔ yele bɛ nee ye mboane ne neavolɛma vile nyevile ne anu la wɔ ni?+
Ahenle mɔɔ vale Ye sunsum nwuanzanwuanza ne wulale ye nu,+
12 Ahenle mɔɔ maanle Ye anyunlunyia ɛsalɛ ne nee Mosisi asa fema ne luale,+Ahenle mɔɔ kpakyele azule ne anu wɔ bɛ nyunlu+Na ɔliele duma ɔmaanle ɔ nwo dahuu,+
13 Ahenle mɔɔ maanle bɛluale azule mɔɔ ɛlɛtu* la anu,Kɛ ɛkpɔnwɔ mɔɔ lua ɛsɛlɛ zo*Na ɔlua zo bɛandɔ aze la wɔ ni?
14 Kɛ mɔɔ nyɛmoa kɔ bɔnza nu kɔdie bɛ menle la,Zɔhane ala a Gyihova sunsum ne maanle bɛliele bɛ menle a.”+
Kɛ ɛlile wɔ menli ne anyunluNa ɛliele duma kpole* ɛmaanle ɛ nwo la ɛne.+
15 Ɛvi anwuma to ɛ nye aze na nea,Ɛvi wɔ anyunlunyia nee nwuanzanwuanza tɛnlabelɛ ne.
Wɔ mɔdenlebɔlɛ nee wɔ tumi,Wɔ ahunluyelɛyelalɛ+ nee wɔ anwunvɔnezelɛ ne wɔ ni?+
Wɔye bɛ wɔvi me nwo zo.
16 Wɔmɔ a ɛle yɛ Ze a;+Bie a Ebileham ɛnze yɛYɛɛ Yizilayɛ ɛngakye yɛ bɔbɔ ɛdeɛ,Noko wɔmɔ Gyihova a ɛle yɛ Ze a.
Ɔvi tete, yɛ Kpɔnevolɛ a le wɔ duma.+
17 O Gyihova, duzu ati a wɔmaa yɛminli yɛvi wɔ ndenle ne mɔ anu a?
Duzu ati a wɔmaa yɛ ahonle ɛsolo mɔɔ yɛnzulo wɔ a?+
Wɔ azonvolɛ, menli ne mɔɔ bɛle wɔ agyapadeɛ la ati,Sia baboa yɛ.+
18 Wɔ menli nwuanzanwuanza ne asa hanle ye mekɛ ekyi bie.
Yɛ agbɔvolɛ ɛtietia wɔ ɛzonlenlɛsua ne azo.+
19 Yɛyɛ kɛ menli mɔɔ ɛtɛdile yɛ nwo zo tumi ɛlɛ la mekɛ tendenle,Kɛ menli mɔɔ bɛanva wɔ duma bɛanvɛlɛ yɛ ɛlɛ la.
Ɔbodwɛkɛ
^ Anzɛɛ ɔkola ɔkile, “le kɔkɔlɛ weɔɔnwo.”
^ Anzɛɛ “konimlilɛ.”
^ Anzɛɛ “anwumabɔvolɛ ne mɔɔ ɔgyi ɔ nyunlu la.”
^ Anzɛɛ “ahunluyelɛyelalɛ.”
^ Anzɛɛ “azule mɔɔ le kuma.”
^ Anzɛɛ “fienemgbole nu.”
^ Anzɛɛ “kɛnlɛma.”