Ayezaya 33:1-24
33 Wɔmɔ sɛkyevolɛ mɔɔ bɛtɛsɛkyele wɔ;+Wɔmɔ mɔɔ ɛye menli ɛmaa mɔɔ bɛtɛyele wɔ bɛtɛmaanle la, gyakɔ!
Saa ɛsɛkye ninyɛne ɛwie a, bɛbazɛkye wɔ.+
Saa ɛye menli ɛmaa ɛwie a, bɛbaye wɔ bɛamaa.
2 O Gyihova, nwu yɛ anwunvɔne.+
Yɛ nye la ɛ nwo zo.
Bayɛ yɛ sa*+ nwonlomɔ biala,Ɛhɛe, yɛ ngoanelielɛ wɔ anwongyelelɛ mekɛ nu.+
3 Saa ɛ ne dielie a, menli nriandi.
Saa ɛmaa ɛ nwo zo a, maanle maanle bɔ asande.+
4 Kɛ mɔɔ abɛbɛ mɔɔ sɛkye ninyɛne boɔboa bɛ nloa la, zɔhane ala a bɛbaboɔboa bɛ ninyɛne nloa a;Menli banriandi ahɔ nwolɛ kɛ abɛbɛ ekpunli la.
5 Bɛbakpogya Gyihova zo,Ɔluakɛ ɔde anwuma lɔ.
Ɔbava pɛlepɛlelilɛ nee tenleneyɛlɛ yeayi Zayɔn.
6 Ɔdaye a ɔmaa bɛ mekɛ gyinla a;Ɔmaa bɛnyia ngoanelielɛ molozo,+ nrɛlɛbɛ, adwenle nee Gyihova ɛzulolɛ+—Ɛhye le ye anwonyia.
7 Nea! Bɛ katakyiema su wɔ awɔdenle zo;Bɛ anzodwolɛ soanvolɛma su alɔbɔlɛ ɛzunlɛ.
8 Ademgbole ne mɔ ɛdɔ mgbane;Awie biala ɛnva adenle ne azo bieko.
Yezɛkye* ngyekyeleɛ ne;Yekpo azuamgbole ne mɔ;Ɔmbu sonla dasanli biala.+
9 Azɛlɛ ne di nyane* na ɔsɛkye.
Lɛbanɔn ɛbɔ anyiemgba;+ yekpɔlɔ.
Hyɛlɔn ɛyɛ kɛ ɛsɛlɛ zo,Yɛɛ Beehyan nee Kamɛle nya ɛkpolo.+
10 Gyihova se, “Akee mebadwazo,Akee mebamaa me nwo zo;+Akee mebakpogya me nwo zo.
11 Bɛnrenzɛ ndile welera na bɛwo ndile bo zo.
Bɛ sunsum bayela bɛ kɛ senle.+
12 Menli bayɛ kɛ ewole* mɔɔ bɛyela la.
Bɛbado senle nu bɛayela bɛ kɛ mbowule mɔɔ bɛpɛ bɛgua aze la.+
13 Bɛdabɛ mɔɔ bɛwɔ moa la, bɛdie mɔɔ mebayɛ la!
Bɛdabɛ mɔɔ bɛbikye la, bɛlie me tumi ne bɛdo nu!
14 Ɛtanevolɛma mɔɔ wɔ Zayɔn la ahonle ɛdu;+Ɛzulolɛ ɛha kpɔkyevolɛma:
‘Yɛ nuhua boni a bahola adɛnla ɛleka mɔɔ sendɔlɔra wɔ la a?+
Yɛ nuhua boni a bahola adɛnla senle mɔɔ ɛnnu ɛlɛ la anwo a?’
15 Sonla mɔɔ dua tenleneyɛlɛ nu dahuu,+Ɔka mɔɔ le fɔɔnwo,+Ɔkpo nzisi nee adalɛ nvasoɛ,Ɔnva ɔ sa ɔnlie belaebo yɛɛ ɔkpo kɛ ɔkɛzɔ nu,+Ɔtuodua ɔ nzo wɔ mogya mɔɔ bɛka bɛgua la edwɛkɛ nwo,Yɛɛ ɔmuomua ɔ nye amaa yeannwu debie ɛtane
16 —Ɔbadɛnla awoka zo;Awolɛ aranemgbole bayɛ ye ɛvealeka kpalɛ,Bɛbamaa ye aleɛ,Na ye nzule ɛnrɛwie ɛlɛ.”+
17 Bɛ nye banwu anyunlunyia belemgbunli bie;Bɛbanwu azɛlɛ bie wɔ moamoa.
18 Bɛbadwenledwenle ɛzulolɛ nwo wɔ bɛ ahonle nu kɛ:
“Kɛlɛhɛlɛvolɛ ne wɔ ni?
Ahenle mɔɔ zuzule adwule ne la wɔ ni?+
Ahenle mɔɔ dianle tawa ne mɔ la wɔ ni?”
19 Bɛnrɛnwu menli mɔɔ ɛmbu debie,Mɔɔ bɛ aneɛ yɛ se* kɛ bɛkɛde ɔ bo,Menli mɔɔ bɛyi bɛlɛbɛlɛ na bɛtendɛ a bɛnde ɔ bo la bieko.+
20 Bɛnlea Zayɔn, sua ne mɔɔ yɛdi yɛ ɛvoyia ngakyile wɔ zo la!+
Bɛ nye banwu Gyɛlusalɛm kɛ ɛleka mɔɔ anwodɔlɛ wɔ,Ɛdanlɛsua mɔɔ bɛnrɛdudu.+
Bɛnrɛdudu ye adakola ne mɔ,Yɛɛ bɛnrɛtete ye nyɛma biala anu ɛlɛ.
21 Ɛkɛ ne a Gyihova, Tumivolɛ Ne,Bayɛ kɛ ɛleka mɔɔ azule nee kanale mgbole wɔ la yeamaa yɛ a,Ɛleka mɔɔ ɛlɛne biala ɛngola ɛngɔYɛɛ meli mgbole ɛngola ɛnva ɛkɛ ne la.
22 Ɔluakɛ Gyihova le yɛ Ndɛnebuavolɛ,+Gyihova le yɛ Mɛla Maavolɛ,+Gyihova le yɛ Belemgbunli;+Ɔdaye a ɔbalie yɛ ngoane a.+
23 Bɛ nyɛma ne mɔ anu batuto;Bɛnrɛhola bɛnrɛzɔ avela baka ne yɛɛ bɛnrɛhola bɛnrɛdɛlɛ avela ne anu.
Zɔhane mekɛ ne, bɛbahyɛ ninyɛne dɔɔnwo mɔɔ bɛsesa la;Abuburama bɔbɔ basesa ninyɛne dɔɔnwo.+
24 Na maanlema ne* anu biala ɛnrɛha kɛ: “Me nwo ɛdo me.”+
Bɛbava azɛlɛ ne azo amra ɛtane bɛahyɛ bɛ.+
Ɔbodwɛkɛ
^ Anzɛɛ “anwosesebɛ.”
^ Ɔgyi ɛkɛ ɔmaa kpɔvolɛ ne.
^ Anzɛɛ ɔkola ɔkile, “we.”
^ Anzɛɛ “kalo.”
^ Hibulu aneɛ nu, “aneɛ ne anu pi.”
^ Anzɛɛ “menli mɔɔ de ɛkɛ ne la.”
