Кудай ишенимдүү кызматчыларынын арасынан өлгөндөн кийин тирилип асманда жашай тургандарды тандап алат (1 Петир 1:3, 4). Алар тандалгандан кийин асмандагы сыйлыгынан кол жууп калбашы үчүн өмүрүнүн акырына чейин ишенимдүүлүгүнөн жазбай, Кудайдын мыйзам-принциптерине карманып жашашы керек (Эфестиктер 5:5; Филипиликтер 3:12—14).

Асманга кеткендер ал жакта эмне кылышат?

 Иса Машаяк менен бирге падыша жана дин кызматчы болуп 1 000 жыл кызмат кылышат (Аян 5:9, 10; 20:6). Алар «жаңы жерди» — адамзат коомун — башкара турган «жаңы асманды», атап айтканда, асмандагы өкмөттү түзүшөт. Асмандагы ал башкаруучулар, Кудай башында ниет кылгандай, адамзатты кайрадан жеткилеңдикке жеткирет (Ышая 65:17; 2 Петир 3:13).

Асмандагы жашоого канча киши тирилет?

 Ыйык Китепте асмандагы жашоого 144 000 киши тирилери айтылган (Аян 7:4). Аян 14:1—3-аяттарда элчи Жакандын аян көргөнү жазылган. Ал «Сион тоосунда турган Козуну» жана жанында 144 000дин турганын көргөн. Аяндагы «Козу» тирилген Иса Машаякты билдирет (Жакан 1:29; 1 Петир 1:19). «Сион тоосу» Исанын жана аны менен бирге асманда падыша катары башкара турган 144 000дин даңкын, жогорку абалын билдирет (Забур 2:6; Еврейлер 12:22).

 Кудайдын Падышалыгында Иса менен бирге башкарууга «чакырылгандар, тандалгандар» «кичине оторду» билдирет (Аян 17:14; Лука 12:32). Мындан алардын саны Иса Машаяктын кой мүнөздүү кызматчыларына салыштырмалуу аз эле болору көрүнүп турат (Жакан 10:16).

Асманга бара тургандарга байланыштуу жаңылыш түшүнүк

 Жаңылыш түшүнүк. Аян китебиндеги 144 000 деген сан түзмө-түз эмес, каймана мааниде айтылган.

 Чындык. Аян китебинде айрым сандар каймана мааниде колдонулса да, бул сан түзмө-түз мааниде айтылган. Мисалы, анда «Козунун он эки элчисинин он эки ысмы жазылганы» айтылат (Аян 21:14). 144 000 деген сандын түзмө-түз мааниде айтылганына байланыштуу бир далил карап көрөлү.

 Аян 7:4тө «мөөрлөнгөндөрдүн [асмандагы жашоого тандалгандардын] саны 144 000 экени» айтылат. Ушундан кийинки аяттарда экинчи топ, тагыраак айтканда, «эч ким санай албаган эбегейсиз көп адамдар» жөнүндө жазылат. Кудай ошол «эбегейсиз көп адамдарды» да куткарат (Аян 7:9, 10). Эгер 144 000 деген сан каймана мааниде, башкача айтканда, саны белгисиз топко карата айтылган болсо, анда эбегейсиз көп адамдар менен 144 000дин бири-биринен айырмаланган эки башка топ экени билинбей калмак a.

 Андан тышкары, 144 000ге киргендер «адамдардын арасынан... биринчи түшүм катары сатылып алынгандар» деп сыпатталат (Аян 14:4). «Биринчи түшүм» деген сөз чоң нерсенин кичинекей бөлүгүнө карата айтылат. Бул Иса Машаяк менен бирге асманда боло тургандар жер бетинде жашаган сансыз адамдардын үстүнөн бийлик жүргүзөрүн көрсөтүп турат (Аян 5:10).