មេរៀនទី២
តើព្រះពិតជានរណា?
១. ហេតុអ្វីយើងគួរគោរពប្រណិប័តន៍ព្រះ?
ព្រះពិតគឺជាអ្នកដែលបានបង្កើតអ្វីៗទាំងអស់។ លោកគ្មានទីចាប់ផ្ដើម ហើយក៏គ្មានទីបញ្ចប់ដែរ។ (ទំនុកតម្កើង ៩០:២) ដំណឹងល្អក្នុងគម្ពីរគឺមកពីព្រះ។ (ធីម៉ូថេទី១ ១:១១) ដោយសារព្រះជាអ្នកផ្ដល់ជីវិតឲ្យយើង នោះយើងគួរគោរពប្រណិប័តន៍លោកតែមួយប៉ុណ្ណោះ។—សូមអាន ការបើកបង្ហាញ ៤:១១
២. តើព្រះពិតជាព្រះបែបណា?
គ្មានមនុស្សជាតិណាម្នាក់ធ្លាប់ឃើញព្រះនោះទេ ពីព្រោះលោកជាបុគ្គលវិញ្ញាណ។ នេះមានន័យថា លោកមានជីវិតមួយប្រភេទដែលខ្ពង់ខ្ពស់ជាងជីវិតទាំងឡាយដែលរស់នៅផែនដី។ (យ៉ូហាន ១:១៨; ៤:២៤) ទោះជាយ៉ាងនោះក៏ដោយ យើងអាចយល់អំពីគុណសម្បត្តិរបស់ព្រះដោយពិចារណាអ្វីៗដែលលោកបានបង្កើត។ ជាឧទាហរណ៍ ពេលយើងឃើញផ្លែឈើមានច្រើនប្រភេទខុសៗគ្នា ហើយផ្កាដែលមានច្រើនយ៉ាងផ្សេងគ្នា នោះបង្ហាញអំពីសេចក្ដីស្រឡាញ់និងប្រាជ្ញារបស់លោក។ ពេលយើងឃើញទំហំនៃសកលលោក នេះក៏បញ្ជាក់ឲ្យយើងដឹងអំពីឫទ្ធានុភាពរបស់លោកដែរ។—សូមអាន រ៉ូម ១:២០
យើងអាចរៀនច្រើនថែមទៀតអំពីគុណសម្បត្តិរបស់ព្រះ ដោយអានគម្ពីរ។ ជាឧទាហរណ៍ គម្ពីរប្រាប់យើងអំពីអ្វីដែលលោកចូលចិត្ត និងអ្វីដែលលោកមិនចូលចិត្ត ហើយក៏ប្រាប់អំពីរបៀបដែលលោកប្រព្រឹត្តទៅលើមនុស្ស។ គម្ពីរក៏ប្រាប់អំពីអ្វីដែលលោកធ្វើក្នុងស្ថានការណ៍ផ្សេងៗដែរ។—សូមអាន ទំនុកតម្កើង ១០៣:៧-១០
៣. តើព្រះមាននាមឬទេ?
លោកយេស៊ូបានមានប្រសាសន៍ថា៖ «ឱបិតារបស់យើងដែលនៅស្ថានសួគ៌ សូមឲ្យនាមរបស់លោកបានបរិសុទ្ធ»។ (ម៉ាថាយ ៦:៩) ទោះជាព្រះមានងារជាច្រើនក៏ដោយ លោកមាននាមតែមួយទេ ហើយតាមភាសានីមួយៗ មានរបៀបបញ្ចេញសំឡេងខុសៗគ្នា។ ក្នុងភាសាខ្មែរ យើងអានថា«យេហូវ៉ា»។—សូមអាន ទំនុកតម្កើង ៨៣:១៨
ក្នុងគម្ពីរជាច្រើន នាមរបស់ព្រះបានត្រូវដកចេញ ហើយដាក់ជំនួសវិញដោយពាក្យព្រះអម្ចាស់ ឬព្រះជាម្ចាស់។ ប៉ុន្តែ ពេលគម្ពីរបានត្រូវសរសេរ នោះមាននាមរបស់ព្រះជិត៧.០០០ដង។ លោកយេស៊ូបានធ្វើឲ្យគេស្គាល់នាមរបស់ព្រះពេលដែលលោកបង្រៀនមនុស្សអំពីព្រះ។—សូមអាន យ៉ូហាន ១៧:២៦
សូមមើលវីដេអូ តើព្រះមាននាមឬទេ?
៤. តើព្រះយេហូវ៉ាយកចិត្តទុកដាក់ចំពោះយើងឬទេ?
ការដែលមនុស្សជាច្រើនរងទុក្ខវេទនា តើនេះមានន័យថាព្រះយេហូវ៉ាមិនយកចិត្តទុកដាក់ចំពោះយើងឬ? មនុស្សខ្លះនិយាយថា លោកបានបង្កើតឲ្យមានទុក្ខវេទនាដើម្បីសាកល្បងយើង។ ប៉ុន្តែ នេះមិនមែនជារឿងពិតទេ។—សូមអាន យ៉ាកុប ១:១៣
ព្រះបានលើកកិត្តិយសយើងដោយឲ្យយើងមានចិត្តសេរី។ យើងពិតជារីករាយដែលយើងមានសេរីភាពដើម្បីសម្រេចចិត្តបម្រើព្រះ មែនទេ? (យ៉ូស្វេ ២៤:១៥) ប៉ុន្តែ មនុស្សជាច្រើនបានសម្រេចចិត្តធ្វើអាក្រក់ចំពោះអ្នកឯទៀត ហើយការធ្វើដូច្នេះបាននាំឲ្យមនុស្សជាច្រើនរងទុក្ខវេទនា។ ពេលព្រះយេហូវ៉ាឃើញភាពអយុត្តិធម៌បែបនេះ នោះធ្វើឲ្យលោកពិបាកចិត្តណាស់។—សូមអាន លោកុប្បត្តិ ៦:៥, ៦
ព្រះយេហូវ៉ាជាព្រះដែលយកចិត្តទុកដាក់នឹងយើង។ លោកចង់ឲ្យយើងមានជីវិតសប្បាយ។ បន្តិចទៀត លោកនឹងបំបាត់ចោលការឈឺចាប់ និងអស់អ្នកដែលបណ្ដាលឲ្យមានការឈឺចាប់ទាំងនោះ។ ទម្រាំដល់ពេលនោះ លោកមានមូលហេតុត្រឹមត្រូវដែលអនុញ្ញាតឲ្យមានទុក្ខវេទនាជាបណ្ដោះអាសន្ន។ យើងនឹងរៀនអំពីមូលហេតុនេះក្នុងមេរៀនទី៨។—សូមអាន ពេត្រុសទី២ ២:៩; ៣:៧, ១៣
៥. តើយើងអាចមានភាពជិតស្និទ្ធជាមួយព្រះយ៉ាងដូចម្ដេច?
ព្រះយេហូវ៉ាអញ្ជើញយើងឲ្យចូលទៅជិតលោកតាមរយៈការអធិដ្ឋានជម្រាបលោកអំពីអ្វីក្នុងចិត្ត។ លោកយកចិត្តទុកដាក់ចំពោះយើងម្នាក់ៗ។ (ទំនុកតម្កើង ៦៥:២; ១៤៥:១៨) លោកបម្រុងតែនឹងអត់ទោសឲ្យយើង។ ទោះជាពេលខ្លះយើងភ្លាត់ធ្វើខុសក៏ដោយ លោកកត់សម្គាល់ការខំប្រឹងព្យាយាមរបស់យើងដើម្បីធ្វើឲ្យលោកពេញចិត្ត។ ដូច្នេះ ទោះជាយើងមិនល្អឥតខ្ចោះ តែយើងពិតជាអាចមានចំណងមិត្តភាពជិតស្និទ្ធជាមួយព្រះបាន។—សូមអាន ទំនុកតម្កើង ១០៣:១២-១៤; យ៉ាកុប ៤:៨
ដោយសារព្រះយេហូវ៉ាបានផ្ដល់ជីវិតឲ្យយើង យើងគួរស្រឡាញ់លោកច្រើនជាងអ្នកឯទៀត។ (ម៉ាកុស ១២:៣០) កាលដែលលោកអ្នកបង្ហាញថាលោកអ្នកស្រឡាញ់ព្រះដោយរៀនកាន់តែច្រើនអំពីលោក និងដោយធ្វើតាមបង្គាប់លោក នោះលោកអ្នកនឹងចូលកាន់តែជិតព្រះថែមទៀត។—សូមអាន ធីម៉ូថេទី១ ២:៤; យ៉ូហានទី១ ៥:៣