មេរៀនទី១២
តើយើងអាចចូលទៅជិតព្រះយ៉ាងដូចម្ដេច?
១. តើព្រះស្តាប់សេចក្ដីអធិដ្ឋានទាំងអស់ឬ?
ព្រះអញ្ជើញមនុស្សគ្រប់ប្រភេទឲ្យមកជិតលោកតាមរយៈសេចក្ដីអធិដ្ឋាន។ (ទំនុកតម្កើង ៦៥:២) ប៉ុន្តែ លោកមិនស្តាប់សេចក្ដីអធិដ្ឋានទាំងអស់ទេ។ ជាឧទាហរណ៍ បើប្ដីធ្វើបាបប្រពន្ធ នោះសេចក្ដីអធិដ្ឋានរបស់ប្ដីអាចត្រូវរារាំង ឬព្រះយេហូវ៉ាមិនស្តាប់សេចក្ដីអធិដ្ឋានរបស់ប្ដីនោះទេ។ (ពេត្រុសទី១ ៣:៧) បន្ថែមទៅទៀត ពេលបណ្ដាជនអ៊ីស្រាអែលប្រព្រឹត្តអំពើអាក្រក់ ព្រះមិនព្រមស្តាប់សេចក្ដីអធិដ្ឋានរបស់ពួកគេឡើយ។ ដូច្នេះ ការអធិដ្ឋានទៅព្រះគឺជាឯកសិទ្ធិមួយ។ ទោះជាយ៉ាងនោះក៏ដោយ បើមនុស្សដែលប្រព្រឹត្តអំពើខុសឆ្គងធ្ងន់ធ្ងរប្រែចិត្ត ព្រះនឹងស្តាប់សេចក្ដីអធិដ្ឋានរបស់ពួកគេ។—សូមអាន អេសាយ ១:១៥; ៥៥:៧
សូមមើលវីដេអូ តើព្រះស្តាប់សេចក្ដីអធិដ្ឋានទាំងអស់ឬ?
២. តើយើងគួរអធិដ្ឋានយ៉ាងដូចម្ដេច?
សេចក្ដីអធិដ្ឋានគឺជាផ្នែកមួយនៃការគោរពប្រណិប័តន៍របស់យើង។ ដូច្នេះ យើងគួរអធិដ្ឋានទៅព្រះយេហូវ៉ាតែមួយប៉ុណ្ណោះដោយសារលោកជាអ្នកបង្កើតយើង។ (ម៉ាថាយ ៤:១០; ៦:៩) បន្ថែមទៅទៀត ដោយសារយើងជាមនុស្សមិនល្អឥតខ្ចោះ យើងគួរអធិដ្ឋានក្នុងនាមរបស់លោកយេស៊ូ ពីព្រោះលោកបានស្លាប់ដើម្បីភាពខុសឆ្គងរបស់យើង។ (យ៉ូហាន ១៤:៦) ព្រះយេហូវ៉ាមិនចង់ឲ្យយើងអធិដ្ឋានទៅលោក ដោយទន្ទេញពាក្យ ឬអានពីក្រដាសទេ។ លោកចង់ឲ្យយើងអធិដ្ឋានទៅលោកដោយនិយាយចេញពីដួងចិត្តវិញ។—សូមអាន ម៉ាថាយ ៦:៧; ភីលីព ៤:៦, ៧
ព្រះដែលជាអ្នកបង្កើត លោកអាចស្តាប់ឮសេចក្ដីអធិដ្ឋានរបស់យើង សូម្បីតែយើងមិនបញ្ចេញសំឡេងក៏ដោយ។ (សាំយូអែលទី១ ១:១២, ១៣) លោកអញ្ជើញយើងឲ្យអធិដ្ឋានទៅលោកគ្រប់ពេលវេលា មិនថាពេលព្រឹក ពេលយប់ ពេលបរិភោគអាហារ និងពេលដែលយើងជួបនឹងបញ្ហាផ្សេងៗក្ដី។—សូមអាន ទំនុកតម្កើង ៥៥:២២; ម៉ាថាយ ១៥:៣៦
៣. ហេតុអ្វីគ្រិស្ដសាសនិកពិតប្រជុំគ្នា?
ការចូលទៅជិតព្រះមិនមែនជាការងាយស្រួលទេ ដោយសារយើងរស់នៅក្នុងចំណោមមនុស្សដែលមិនធ្វើតាមច្បាប់របស់ព្រះ ហើយមិនជឿលើសេចក្ដីសន្យារបស់លោកស្ដីអំពីសន្តិភាពលើផែនដី។ (ធីម៉ូថេទី២ ៣:១, ៤; ពេត្រុសទី២ ៣:៣, ១៣) ដូច្នេះ យើងត្រូវសេពគប់ជាមួយបងប្អូនរួមជំនឿដើម្បីទទួលការលើកទឹកចិត្ត ហើយពួកគាត់ក៏ត្រូវការការលើកទឹកចិត្តពីយើងដែរ។—សូមអាន ហេប្រឺ ១០:២៤, ២៥
ការសេពគប់ជាមួយមនុស្សដែលស្រឡាញ់ព្រះជួយយើងឲ្យចូលទៅជិតលោក។ កិច្ចប្រជុំរបស់សាក្សីព្រះយេហូវ៉ាផ្ដល់ឱកាសដ៏ល្អដើម្បីពង្រឹងជំនឿរបស់យើង។—សូមអាន រ៉ូម ១:១១, ១២
៤. តើយើងអាចចូលទៅជិតព្រះយ៉ាងដូចម្ដេច?
លោកអ្នកអាចចូលទៅជិតព្រះយេហូវ៉ាដោយរំពឹងគិតអំពីអ្វីដែលលោកអ្នកបានរៀនពីបណ្ដាំរបស់លោក។ សូមពិចារណាអំពីការប្រព្រឹត្ត ឱវាទ និងសេចក្ដីសន្យារបស់លោក។ បើយើងអធិដ្ឋាននិងរំពឹងគិត នោះជួយយើងឲ្យយល់នូវទំហំនៃសេចក្ដីស្រឡាញ់និងប្រាជ្ញារបស់ព្រះ។—សូមអាន យ៉ូស្វេ ១:៨; ទំនុកតម្កើង ១:១-៣
លោកអ្នកអាចក្លាយទៅជាមិត្តសម្លាញ់របស់ព្រះបាន លុះត្រាតែលោកអ្នកមានជំនឿលើលោក។ ប៉ុន្តែ ជំនឿគឺប្រៀបដូចជារុក្ខជាតិដែលត្រូវការការថែបំប៉ន។ លោកអ្នកក៏ត្រូវថែបំប៉នជំនឿរបស់លោកអ្នកឲ្យបានមាំមួនដែរ ដោយរំពឹងគិតអំពីមូលហេតុដែលលោកអ្នកមានជំនឿទៅលើព្រះ។—សូមអាន ម៉ាថាយ ៤:៤; ហេប្រឺ ១១:១, ៦
៥. តើការចូលទៅជិតព្រះនឹងជួយលោកអ្នកយ៉ាងដូចម្ដេច?
ព្រះយេហូវ៉ាយកចិត្តទុកដាក់ចំពោះអស់អ្នកដែលស្រឡាញ់លោក។ លោកអាចការពារពួកគេពីអ្វីៗទាំងអស់ដែលអាចបង្ខូចជំនឿ និងសេចក្ដីសង្ឃឹមរបស់ពួកគេស្ដីអំពីជីវិតដែលគ្មានទីបញ្ចប់។ (ទំនុកតម្កើង ៩១:១, ២, ៧-១០) លោកព្រមានប្រាប់យើងអំពីរបៀបរស់នៅដែលអាចបង្ខូចសុខភាពរបស់យើង ហើយដែលធ្វើឲ្យយើងលែងមានសុភមង្គលទៀត។ ព្រះយេហូវ៉ាបង្រៀនយើងឲ្យមានរបៀបរស់នៅដ៏ល្អបំផុត។—សូមអាន ទំនុកតម្កើង ៧៣:២៧, ២៨; យ៉ាកុប ៤:៤, ៨
លោកអ្នកក៏ប្រហែលជាចូលចិត្តដែរ
អំពីយើង
ហេតុអ្វីគួររៀនគម្ពីរ?
គម្ពីរផ្ដល់ចម្លើយចំពោះចម្ងល់អំពីជីវិតដល់មនុស្សរាប់លានអ្នកនៅទូទាំងពិភពលោក។ តើលោកអ្នកចង់បានចម្លើយដែរឬទេ?
