ផលវិបាកពីបម្រែបម្រួលអាកាសធាតុ តើគម្ពីរចែងយ៉ាងណា?
សារព័ត៌មាន(The Guardian)បានរាយការណ៍ថា៖«បម្រែបម្រួលអាកាសធាតុបានធ្វើឲ្យមានគ្រោះមហន្តរាយធម្មជាតិ។ ផែនដីរបស់យើងចាប់ផ្ដើមលែងអាចទ្រទ្រង់ជីវិតដែលមាននៅលើផែនដីបានទៀតហើយ»។
មនុស្សជាតិមានបញ្ហាដ៏ធ្ងន់ធ្ងរមួយដែលបានបង្ករឡើងដោយខ្លួនឯង។ អ្នកវិទ្យាសាស្ត្រភាគច្រើនយល់ស្របថាអ្វីដែលមនុស្សកំពុងធ្វើ បណ្ដាលឲ្យកម្ដៅផែនដីកាន់តែកើនឡើង។ តាមពិត ការកើនឡើងនេះបានធ្វើឲ្យមានបម្រែបម្រួលអាកាសធាតុ ហើយនាំឲ្យមានគ្រោះមហន្តរាយធម្មជាតិជាច្រើនរួចទៅហើយ អ្វីទាំងនោះមានដូចតទៅ៖
មានព្រឹត្តិការណ៍ផ្សេងៗដែលបានកើតឡើងដោយសារបញ្ហាអាកាសធាតុធ្ងន់ធ្ងរ ហើយបញ្ហានោះមានកាន់តែញឹកញាប់ ដូចជារលកកម្ដៅ គ្រោះរាំងស្ងួត និងខ្យល់ព្យុះ ហើយអ្វីទាំងនេះបណ្ដាលឲ្យមានទឹកជំនន់ និងភ្លើងឆេះព្រៃកាន់តែច្រើនឡើង។
ការរលាយផ្ទាំងទឹកកកនៅតំបន់អាក់ទិច
កម្ពស់ទឹកសមុទ្រកើនឡើង។
បញ្ហាអាកាសធាតុមានឥទ្ធិពលទៅលើគ្រប់ទីកន្លែងនៅផែនដី។ ក្រោយពីបានចុះផ្សាយអំពីស្ថានភាពនៅ១៩៣ប្រទេស។ សារព័ត៌មាន(New York Times) បានរាយការណ៍ថា៖«ផែនដីរបស់យើងកំពុងអង្វរសុំជំនួយ»។ ដោយសារតែមានការស្លាប់និងទុក្ខវេទនាដែលបណ្ដាលមកពីបម្រែបម្រួលអាកាសធាតុ អង្គការសុខភាពពិភពលោកបានហៅបញ្ហានោះថា៖«អ្វីដែលមានគ្រោះថ្នាក់បំផុតចំពោះសុខភាពមនុស្ស»។
ទោះជាយ៉ាងនោះក្ដី យើងមានហេតុឲ្យមានសេចក្ដីសង្ឃឹមនៅថ្ងៃអនាគត។ គម្ពីរបានប្រាប់ទុកជាមុនអំពីព្រឹត្តិការណ៍ផ្សេងៗដែលយើងកំពុងឃើញនៅសព្វថ្ងៃនេះ។ គម្ពីរក៏ប្រាប់អំពីមូលហេតុដែលយើងអាចមានសង្ឃឹមថា ព្រះនឹងចាត់វិធានការហើយការពារអនាគតរបស់យើង។
តើបម្រែបម្រួលអាកាសធាតុសម្រេចទំនាយក្នុងគម្ពីរឬ?
មែន។ បញ្ហាអាកាសធាតុដែលបណ្ដាលឲ្យមានការកើនឡើងកម្ដៅពិភពលោក គឺស្របនឹងព្រឹត្តិការណ៍ផ្សេងៗដែលគម្ពីរបានរៀបរាប់នៅសម័យរបស់យើង។
ទំនាយ៖ ព្រះនឹង«បំផ្លាញពួកអ្នកដែលកំពុងបង្ខូចផែនដី»។—ការបើកបង្ហាញ ១១:១៨
គម្ពីរបានប្រកាសទុកជាមុនអំពីគ្រាមួយដែលការប្រព្រឹត្តរបស់មនុស្សហៀបនឹងបំផ្លាញភពផែនដី។ ដោយមានការកើនឡើងកម្ដៅពិភពលោក យើងឃើញថានៅសព្វថ្ងៃមនុស្សកំពុងបង្ខូចផែនដីខ្លាំងជាងពេលណាៗទាំងអស់។
ទំនាយនេះលើកឡើងមូលហេតុមួយដែលបញ្ជាក់ថា យើងមិនអាចរំពឹងថាមនុស្សជាតិនឹងអាចស្រោចស្រង់ផែនដីបានទេ។ សូមកត់សម្គាល់ថាកាលដែលមនុស្ស«កំពុងបង្ខូចផែនដី» ព្រះនឹងចាត់វិធានការ។ ទោះជាមនុស្សខ្លះមានបំណងចិត្តល្អនិងព្យាយាមបញ្ឈប់បញ្ហាដែលបណ្ដាលឲ្យមានបម្រែបម្រួលអាកាសធាតុក៏ដោយ ពួកគេនឹងមិនអាចបញ្ឈប់មនុស្សពីការបង្ខូចផែនដីបានឡើយ។
ទំនាយ៖ «នឹងឃើញអ្វីដែលគួរឲ្យខ្លាច»។—លូកា ២១:១១
គម្ពីរប្រកាសទុកជាមុនថា៖«អ្វីដែលគួរឲ្យខ្លាច»នោះ ឬព្រឹត្តិការណ៍ដ៏គួរឲ្យតក់ស្លុតនឹងកើតឡើងនៅសម័យរបស់យើង។ បម្រែបម្រួលអាកាសធាតុបានបណ្ដាលឲ្យមានព្រឹត្តិការណ៍ផ្សេងៗដ៏គួរឲ្យរន្ធត់នៅទូទាំងពិភពលោក។ សព្វថ្ងៃមនុស្សខ្លះមានជំងឺផ្លូវចិត្តម្យ៉ាងដែលទាក់ទងនឹងបរិស្ថាន គឺដោយសារពួកគេខ្លាចថាបរិស្ថានផែនដីនឹងត្រូវបង្ខូចហើយលែងមានជីវិតរស់នៅតទៅទៀត។
ទំនាយ៖ «នៅគ្រាចុងក្រោយបង្អស់នឹងលំបាកខ្លាំងណាស់។ ព្រោះមនុស្សនឹងស្រឡាញ់តែខ្លួនឯង ស្រឡាញ់ប្រាក់ . . . គ្មានភក្ដីភាព . . . មិនព្រមស្រុះស្រួលគ្នា . . . ជាអ្នកក្បត់ ធ្វើតាមទំនើងចិត្ត»។—ធីម៉ូថេទី២ ៣:១-៤
គម្ពីរប្រកាសទុកជាមុនអំពីលក្ខណៈនិងការប្រព្រឹត្តរបស់មនុស្សដែលបង្កឲ្យមានបញ្ហាអាកាសធាតុ។ ពួកអ្នកនយោបាយនិងពួកពាណិជ្ជករ ខ្វល់ខ្វាយអំពីលុយរបស់ពួកគេ ច្រើនជាងអ្វីដែលនឹងកើតឡើងចំពោះមនុស្សនៅថ្ងៃអនាគត។ ទោះជាពួកគេខំព្យាយាមសហការគ្នាក៏ដោយ ពួកគេមិនអាចយល់ស្របគ្នាស្ដីអំពីអ្វីដែលពួកគេត្រូវធ្វើដើម្បីបញ្ឈប់ការកើនឡើងកម្ដៅពិភពលោកឡើយ។
ទំនាយនេះបញ្ជាក់ថាយើងមិនគួររំពឹងថាមនុស្សនៅជំនាន់នេះនឹងកែប្រែការប្រព្រឹត្តរបស់ពួកគេហើយការពារផែនដីនោះទេ។ ផ្ទុយទៅវិញ គម្ពីរបានចែងថាមនុស្សដែលគិតតែពីប្រយោជន៍ផ្ទាល់ខ្លួននឹង«អាក្រក់កាន់តែខ្លាំងឡើងៗ»។—ធីម៉ូថេទី២ ៣:១៣
ហេតុអ្វីយើងអាចប្រាកដថាព្រះនឹងចាត់វិធានការ?
គម្ពីរបង្ហាញថាព្រះយេហូវ៉ា aដែលជាអ្នកបង្កើតរបស់យើងយកចិត្តទុកដាក់យ៉ាងខ្លាំងចំពោះភពផែនដី និងចំពោះអស់អ្នកដែលរស់នៅលើភពផែនដីនេះ។ សូមពិចារណាខគម្ពីរ៣ប៉ុណ្ណោះដែលបញ្ជាក់ថាព្រះនឹងចាត់វិធានការ។
១. ព្រះ«មិនបានបង្កើតផែនដីឲ្យនៅទទេនោះទេ តែបានបង្កើតផែនដីជាទីអាស្រ័យនៅវិញ»។—អេសាយ ៤៥:១៨
ព្រះនឹងសម្រេចគោលបំណងរបស់លោកសម្រាប់ផែនដី។ (អេសាយ ៥៥:១១) លោកនឹងមិនអនុញ្ញាតឲ្យផែនដីត្រូវបំផ្លាញ ឬគ្មានមនុស្សរស់នៅនោះទេ។
២. «មនុស្សដែលមានចិត្តសុភាពនឹងបានផែនដីជាមត៌ក ពួកគេនឹងសប្បាយរីករាយយ៉ាងខ្លាំង ដោយសារមាន សេចក្ដីសុខសាន្តជាបរិបូរ។ មនុស្សសុចរិតនឹងបានផែនដីជាមត៌ក ហើយពួកគេនឹងរស់នៅផែនដីជារៀងរហូត»។—ចម្រៀងសរសើរព្រះ ៣៧:១១, ២៩
ព្រះបានសន្យាថាមនុស្សនឹងរស់ផែនដីជារៀងរហូត ក្រោមស្ថានភាពដ៏សុខសាន្ត។
៣. «ចំណែកឯជនទុច្ចរិត ពួកគេនឹងត្រូវកាត់ចេញពីផែនដី»។—សុភាសិត ២:២២
ព្រះសន្យាថាលោកនឹងដកអស់អ្នកដែលបន្តប្រព្រឹត្តអាក្រក់ រួមទាំងពួកអ្នកដែលបង្ខូចផែនដីផងដែរ។
តើព្រះនឹងធ្វើអ្វីខ្លះសម្រាប់អនាគតរបស់យើង?
តើតាមរបៀបណាព្រះនឹងសម្រេចសេចក្ដីសន្យារបស់លោកសម្រាប់ផែនដី? លោកនឹងធ្វើដូច្នេះតាមរយៈរដ្ឋាភិបាលដែលគ្រប់គ្រងពេញពិភពលោកដែលគេស្គាល់ថារាជាណាចក្រព្រះ។ (ម៉ាថាយ ៦:១០) រាជាណាចក្រនោះនឹងគ្រប់គ្រងពីស្ថានសួគ៌ ហើយរាជាណាចក្ររបស់ព្រះនឹងមិនធ្វើកិច្ចព្រមព្រៀងជាមួយនឹងរដ្ឋាភិបាលរបស់មនុស្សស្ដីអំពីរឿងទាក់ទងនឹងផែនដី និងបញ្ហាបរិស្ថានផែនដីឡើយ។ ផ្ទុយទៅវិញ រដ្ឋាភិបាលរបស់ព្រះនឹងគ្រប់គ្រងជំនួសរដ្ឋាភិបាលរបស់មនុស្ស។—ដានីយ៉ែល ២:៤៤
រាជាណាចក្ររបស់ព្រះនឹងនាំមកនូវអ្វីល្អៗសម្រាប់មនុស្សជាតិនិងបរិស្ថាន។ (ចម្រៀងសរសើរព្រះ ៩៦:១០-១៣) សូមពិចារណាអ្វីដែលព្រះយេហូវ៉ានឹងធ្វើតាមរយៈរាជាណាចក្ររបស់លោក។
ការកែលម្អបរិស្ថានឡើងវិញ
អ្វីដែលគម្ពីរចែង៖ «តំបន់ស្ងាត់ជ្រងំនិងតំបន់ហួតហែងនឹងអរសប្បាយ វាលរហោស្ថាននឹងត្រេកអរ ហើយមានផ្ការីកស្គុសស្គាយ»។—អេសាយ ៣៥:១
តើនេះមានន័យយ៉ាងណាចំពោះអនាគតយើង?៖ ព្រះយេហូវ៉ានឹងធ្វើឲ្យផែនដីរបស់យើងល្អឡើងវិញ។ ទោះជាកន្លែងជាច្រើនបានត្រូវបង្ខូចយ៉ាងធ្ងន់ធ្ងរដោយសារមនុស្សក៏ដោយ។
ការគ្រប់គ្រងទៅលើកម្ដៅកើនឡើង
អ្វីដែលគម្ពីរចែង៖ «[ព្រះយេហូវ៉ា]ធ្វើឲ្យខ្យល់ព្យុះស្ងប់រម្ងាប់ រលកសមុទ្របានស្ងាត់ស្ងៀមទៅ»។—ចម្រៀងសរសើរព្រះ ១០៧:២៩
តើនេះមានន័យយ៉ាងណាចំពោះអនាគតយើង?៖ ព្រះយេហូវ៉ាមានឫទ្ធានុភាពគ្រប់គ្រងទៅលើកម្លាំងធម្មជាតិ។ មនុស្សនឹងលែងរងទុក្ខដោយសារបម្រែបម្រួលអាកាសធាតុទៀតហើយ។
ការបង្រៀនមនុស្សឲ្យថែរក្សាផែនដី
អ្វីដែលគម្ពីរចែង៖ «ខ្ញុំនឹងឲ្យអ្នកមានការយល់ធ្លុះជ្រៅ ហើយណែនាំអ្នកឲ្យដើរតាមផ្លូវដែលគួរដើរ»។—ចម្រៀងសរសើរព្រះ ៣២:៨
តើនេះមានន័យយ៉ាងណាចំពោះអនាគតយើង?៖ ព្រះយេហូវ៉ាបានប្រគល់ភារកិច្ចឲ្យមនុស្សជាតិថែរក្សាផែនដី។ (ដើមកំណើត ១:២៨; ២:១៥) លោកនឹងបង្រៀនយើងអំពីរបៀបថែរក្សាអ្វីដែលលោកបានបង្កើត ហើយរស់នៅតាមរបៀបមួយដែលមិនបង្ខូចបរិស្ថាន។
a យេហូវ៉ាគឺជានាមរបស់ព្រះ។ (ចម្រៀងសរសើរព្រះ ៨៣:១៨) សូមមើលអត្ថបទចំណងជើងថា«តើព្រះយេហូវ៉ាជានរណា?»។
លោកអ្នកក៏ប្រហែលជាចូលចិត្តដែរ
ចូរចាំយាម!
គ្រោះរាំងស្ងួតដ៏ធ្ងន់ធ្ងរ តើគម្ពីរចែងយ៉ាងណា?
តើបញ្ហានៅក្នុងពិភពលោកនេះអាចដោះស្រាយបានទេ? តើមានសេចក្ដីសង្ឃឹមនៅថ្ងៃអនាគតទេ?
សេចក្ដីបង្រៀនសំខាន់ៗក្នុងគម្ពីរ
តើរាជាណាចក្ររបស់ព្រះជាអ្វី?
ក្នុងអំឡុងកិច្ចបម្រើផ្សាយរបស់លោកយេស៊ូនៅផែនដី លោកបានបង្រៀនអំពីរាជាណាចក្រព្រះច្រើនជាងប្រធានបទផ្សេងទៀត។ អស់រាប់រយឆ្នាំមកហើយ អ្នកកាន់តាមលោកអធិដ្ឋានឲ្យរាជាណាចក្រនោះបានមកដល់។
ទស្សនាវដ្ដី
តើរាជាណាចក្ររបស់ព្រះនឹងសម្រេចអ្វីខ្លះ?
លោកយេស៊ូដឹងថាមានតែរាជាណាចក្ររបស់ព្រះប៉ុណ្ណោះដែលអាចដោះស្រាយបញ្ហានៅផែនដី។ តើរាជាណាចក្ររបស់ព្រះបានសម្រេចអ្វីរួចទៅហើយដើម្បីបង្កើនទំនុកចិត្តរបស់យើង?
