តើផែនដីនឹងត្រូវបំផ្លាញចោលឬ?

លេង

ចម្លើយពីគម្ពីរ

មិនមែនទេ។ ភពផែនដីនឹងមិនត្រូវបំផ្លាញចោល ឬត្រូវភ្លើងឆេះ ឬជំនួសដោយភពផែនដីថ្មីឡើយ។ គម្ពីរបង្រៀនថាព្រះបានបង្កើតផែនដីឲ្យជាទីអាស្រ័យនៅជារៀងរហូត។

«ពួកអ្នកសុចរិតនឹងបានស្រុក[ឬ«ផែនដី»]ទុកជាមរដក ហើយនឹងនៅក្នុងស្រុកនោះជានិច្ច»។—ទំនុកតម្កើង ៣៧:២៩; ព.ថ.
«ទ្រង់បានតាំងឫសផែនដី ដើម្បីឲ្យបានមាំ មិនឲ្យត្រូវរញ្ជួយនៅអស់កល្ប»។—ទំនុកតម្កើង ១០៤:៥
«ផែនដីស្ថិតស្ថេរនៅជាដរាប»។—សាស្ដា ១:៤
«ទ្រង់សូនធ្វើហើយប្រតិស្ឋានផែនដី ក៏តាំងឡើង មិនមែនបង្កើតមកឲ្យនៅទទេទេ គឺបានជបសូនបង្កើតឲ្យជាទីអាស្រ័យនៅ»។—អេសាយ ៤៥:១៨

តើមនុស្សនឹងបង្ខូចផែនដីឬ?

ព្រះនឹងមិនអនុញ្ញាតឲ្យមនុស្សបង្ខូចផែនដីទាំងស្រុងដោយការបំពុលបរិស្ថាន ដោយសង្គ្រាម ឬដោយវិធីណាមួយឡើយ។ ផ្ទុយទៅវិញ លោកនឹង«បំផ្លាញពួកអ្នកដែលកំពុងបង្ខូចផែនដី»។ (ការបើកបង្ហាញ ១១:១៨) តើលោកនឹងសម្រេចការនេះយ៉ាងដូចម្ដេច?

រដ្ឋាភិបាលរបស់មនុស្សមិនអាចរក្សាការពារផែនដីបានទេ។ ព្រះនឹងជំនួសរដ្ឋាភិបាលទាំងនោះ ដោយរាជាណាចក្ររបស់ព្រះនៅស្ថានសួគ៌ដែលជារដ្ឋាភិបាលដ៏ល្អឥតខ្ចោះ។ (ដានីយ៉ែល ២:៤៤; ម៉ាថាយ ៦:៩, ១០) លោកយេស៊ូគ្រិស្តដែលជាបុត្ររបស់ព្រះនឹងគ្រប់គ្រងរាជាណាចក្រនោះ។ (អេសាយ ៩:៦, ៧) ពេលនៅផែនដី លោកយេស៊ូមានអំណាចលើកម្លាំងធម្មជាតិ។ (ម៉ាកុស ៤:៣៥-៤១) ក្នុងនាមជាស្ដេចនៃរាជាណាចក្ររបស់ព្រះ លោកយេស៊ូនឹងកាន់កាប់អំណាចទាំងអស់លើផែនដីនិងកម្លាំងធម្មជាតិ។ លោកនឹងបង្កើតសាជាថ្មី ហើយផ្លាស់ប្ដូរឲ្យមានស្ថានភាពថ្មីនៅផែនដី ដូចស្ថានភាពដែលស្រដៀងនឹងអ្វីៗដែលធ្លាប់មាននៅក្នុងសួនអេដែន។—ម៉ាថាយ ១៩:២៨; លូកា ២៣:៤៣

តើគម្ពីរបង្រៀនថាផែនដីនឹងត្រូវភ្លើងឆេះឬ?

គឺមិនមែនទេ។ ការយល់ខុសនេះមកពីមនុស្សយល់ច្រឡំខគម្ពីរមួយ គឺនៅពេត្រុសទី២ ៣:៧ ដែលចែងថា៖«មេឃនិងផែនដីដែលមានឥឡូវនេះបានត្រូវទុកដោយឡែកសម្រាប់ឲ្យភ្លើងឆេះ»។ សូមពិចារណាចំណុចសំខាន់ពីរដែលជួយយើងឲ្យយល់អំពីអត្ថន័យនៃពាក្យទាំងនេះ៖

១. ពាក្យ«មេឃ» «ផែនដី» និង«ភ្លើង» ដែលមានក្នុងគម្ពីរអាចមានអត្ថន័យផ្សេងៗ។ ជាឧទាហរណ៍ នៅលោកុប្បត្តិ ១១:១ ចែងថា៖‹ផែនដីទាំងមូល នោះមានភាសាតែ១ទេ›។ ក្នុងខនេះពាក្យ«ផែនដី»សំដៅទៅលើសង្គមមនុស្ស។
២. បរិបទនៃពេត្រុសទី២ ៣:៧ បញ្ជាក់អំពីអត្ថន័យនៃពាក្យមេឃ ផែនដី និងភ្លើងដែលបានរៀបរាប់ក្នុងខនោះ។ ខ៥និងខ៦ រៀបរាប់អំពីអ្វីដែលស្រដៀងនឹងទឹកជំនន់នៅសម័យណូអេ។ នៅសម័យណូអេ ពិភពលោកបានត្រូវបំផ្លាញចោល ប៉ុន្តែភពផែនដីមិនបានត្រូវបំផ្លាញឡើយ។ ផ្ទុយទៅវិញ ទឹកជំនន់បានបំផ្លាញ«ផែនដី»ឬមនុស្សអាក្រក់និងមនុស្សឃោរឃៅទាំងអស់ដែលរស់នៅសម័យនោះ។ (លោកុប្បត្តិ ៦:១១) ទឹកជំនន់នោះក៏បំផ្លាញ«មេឃ» ឬអ្នកគ្រប់គ្រងលើមនុស្សអាក្រក់ទាំងអស់ដែរ។ ដូច្នេះ មនុស្សអាក្រក់បានត្រូវបំផ្លាញ មិនមែនភពផែនដីយើងទេ។ ណូអេនិងក្រុមគ្រួសាររបស់គាត់បានរួចជីវិតពីការបំផ្លាញពិភពលោកនៅសម័យនោះ ហើយពួកគាត់បានបន្តរស់នៅផែនដីក្រោយពីទឹកជំនន់។—លោកុប្បត្តិ ៨:១៥-១៨

ស្រដៀងគ្នានឹងគ្រាទឹកជំនន់ «ភ្លើង»ដែលបានរៀបរាប់នៅពេត្រុសទី២ ៣:៧ នឹងបំផ្លាញមនុស្សអាក្រក់ដែលរស់នៅក្នុងពិភពលោកនេះ មិនមែនភពផែនដីទេ។ ព្រះសន្យាថានឹងមាន«មេឃថ្មីនិងផែនដីថ្មី» ជាកន្លែងដែល«សេចក្ដីសុចរិតនឹងស្ថិតស្ថេរជាដរាប»។ (ពេត្រុសទី២ ៣:១៣) «ផែនដីថ្មី»ឬសង្គមមនុស្សថ្មី នឹងត្រូវគ្រប់គ្រប់ដោយ«មេឃថ្មី»ឬការដឹកនាំថ្មី ពោលគឺរាជាណាចក្ររបស់ព្រះ។ ក្រោមការគ្រប់គ្រងរបស់រាជាណាចក្រនោះ ផែនដីនឹងទៅជាសួនឧទ្យានដែលមានសេចក្ដីសុខសាន្ត។—ការបើកបង្ហាញ ២១:១-៤