តើរាជាណាចក្ររបស់ព្រះនឹងសម្រេចអ្វីខ្លះ?

លេង

លោកយេស៊ូបានបង្រៀនឲ្យអ្នកកាន់តាមលោកអធិដ្ឋានឲ្យរាជាណាចក្ររបស់ព្រះបានមកដល់ ដោយសារលោកដឹងថាស្ថានភាពដ៏អាក្រក់នៅផែនដី គឺមិនមែនជាបំណងប្រាថ្នារបស់ព្រះទេ ហើយដឹងថាមានតែរាជាណាចក្ររបស់ព្រះប៉ុណ្ណោះដែលអាចដោះស្រាយបញ្ហាទាំងនេះ។ តើរាជាណាចក្ររបស់ព្រះនឹងសម្រេចអ្វីខ្លះ?

តើរាជាណាចក្ររបស់ព្រះបានសម្រេចអ្វីរួចទៅហើយ?

នៅអត្ថបទមុន យើងបានពិចារណាអំពីសញ្ញាសម្គាល់ដែលលោកយេស៊ូបានផ្ដល់។ សញ្ញាសម្គាល់នោះបញ្ជាក់ភ័ស្តុតាងថា រាជាណាចក្ររបស់ព្រះបានតាំងឡើងនៅស្ថានសួគ៌ ដោយមានលោកយេស៊ូគ្រិស្តជាស្ដេច។

គម្ពីរចែងថា ពេលលោកយេស៊ូចាប់ផ្ដើមមានអំណាចជាស្ដេចក្នុងរាជាណាចក្ររបស់ព្រះ លោកនឹងទម្លាក់សាថាននិងពួកវិញ្ញាណកំណាចចេញពីស្ថានសួគ៌។ ឥឡូវនេះ ពួកវាអាចមានសកម្មភាពនៅផែនដីប៉ុណ្ណោះ ហើយនេះគឺជាមូលហេតុមួយដែលស្ថានភាពនៅផែនដីកាន់តែអាក្រក់ទៅៗតាំងពីឆ្នាំ១៩១៤មក។—ការបើកបង្ហាញ ១២:៧, ៩

ទោះជាពិភពលោកមានស្ថានភាពកាន់តែអាក្រក់ក៏ដោយ លោកយេស៊ូជាស្ដេចនៃរាជាណាចក្ររបស់ព្រះ បានធ្វើអ្វីផ្សេងៗដើម្បីជួយមនុស្សនៅទូទាំងផែនដី។ ដោយជួយមនុស្សទូទាំងពិភពលោកឲ្យទទួលចំណេះពីគម្ពីរបរិសុទ្ធ នោះមនុស្សជាច្រើនកំពុងរៀននិងអនុវត្តតាមគោលការណ៍គម្ពីរក្នុងជីវិតប្រចាំថ្ងៃ។ (អេសាយ ២:២-៤) មនុស្សរាប់លាននាក់បានរៀនឲ្យចេះមានទស្សនៈត្រឹមត្រូវអំពីការងារ មានជីវិតគ្រួសារល្អប្រសើរជាង និងមានទ្រព្យសម្បត្តិដោយមិនក្លាយទៅជាខ្ញុំបម្រើរបស់ទាំងនោះ។ មនុស្សទាំងនេះកំពុងរៀនអំពីរបៀបដែលពួកគេអាចទទួលប្រយោជន៍នៅពេលឥឡូវនេះ និងក្លាយទៅជាប្រភេទមនុស្សដែលព្រះចង់មានជារាស្ត្រក្រោមរាជាណាចក្ររបស់លោក។

នៅថ្ងៃខាងមុខ តើរាជាណាចក្ររបស់ព្រះនឹងសម្រេចអ្វី?

ទោះជាលោកយេស៊ូកំពុងគ្រប់គ្រងនៅស្ថានសួគ៌ក្ដី តែរដ្ឋាភិបាលមនុស្សនៅតែគ្រប់គ្រងនៅផែនដី។ ក៏ប៉ុន្តែ ព្រះបានបង្គាប់លោកយេស៊ូថា៖ «ចូរទៅកណ្ដាលពួកសត្រូវរបស់អ្នក ហើយបង្ក្រាបពួកគេ»។ (ចម្រៀងសរសើរព្រះ ១១០:២) បន្តិចទៀត លោកយេស៊ូនឹងបំផ្លិចបំផ្លាញអ្នកប្រឆាំងទាំងអស់ និងបំបាត់ទុក្ខលំបាករបស់អ្នកដែលសុខចិត្តស្ដាប់បង្គាប់ព្រះ។

ក្នុងអំឡុងគ្រានោះ រាជាណាចក្ររបស់ព្រះនឹងចាត់វិធានការដើម្បី

បំផ្លាញចោលសាសនាមិនពិត។ សាសនាដែលបង្រៀនសេចក្ដីមិនពិតអំពីព្រះ ហើយបានធ្វើឲ្យមនុស្សមានជីវិតពិបាកនឹងលែងមានទៀត។ គម្ពីរប្រៀបធៀបសាសនាមិនពិតទៅនឹងស្ត្រីពេស្យា។ ការបំផ្លាញចោលសាសនាមិនពិតនឹងនាំឲ្យមនុស្សជាច្រើនភ្ញាក់ផ្អើល។—ការបើកបង្ហាញ ១៧:១៥, ១៦
បំបាត់ចោលការគ្រប់គ្រងរបស់មនុស្ស។ រាជាណាចក្ររបស់ព្រះនឹងចាត់វិធានការ ដើម្បីបំផ្លាញចោលការគ្រប់គ្រងទាំងអស់របស់មនុស្ស។—ការបើកបង្ហាញ ១៩:១៥, ១៧, ១៨
ធ្វើឲ្យលែងមានមនុស្សទុច្ចរិត។ ចុះយ៉ាងណាពួកអ្នកដែលតាំងចិត្តធ្វើអាក្រក់ ហើយមិនព្រមស្ដាប់បង្គាប់ព្រះ? គម្ពីរចែងថា៖ «ចំណែកឯជនទុច្ចរិត ពួកគេនឹងត្រូវកាត់ចេញពីផែនដី»។—សុភាសិត ២:២២
បំផ្លាញចោលសាថាននិងពួកវិញ្ញាណកំណាច។ សាថាននិងពួកវិញ្ញាណកំណាចនឹងមិនអាច«បំភាន់ប្រជាជាតិនានាទៀត»ឡើយ។—ការបើកបង្ហាញ ២០:៣, ១០

តើអ្វីទាំងអស់នេះនឹងមានន័យអ្វីចំពោះពួកអ្នកដែលទទួលយកការគ្រប់គ្រងរបស់រាជាណាចក្រព្រះ?

តើរាជាណាចក្ររបស់ព្រះនឹងធ្វើអ្វីដើម្បីមនុស្សជាតិ?

ដោយសារលោកយេស៊ូគ្រប់គ្រងជាស្ដេចនៅស្ថានសួគ៌ លោកនឹងសម្រេចអ្វីច្រើនជាងអ្នកគ្រប់គ្រងដែលជាមនុស្ស។ ម្យ៉ាងទៀត នឹងមានមនុស្ស១៤៤.០០០នាក់ដែលនឹងគ្រប់គ្រងជាមួយលោក ដែលបានត្រូវជ្រើសរើសពីចំណោមមនុស្សជាតិ។ (ការបើកបង្ហាញ ៥:៩, ១០; ១៤:១, ៣) លោកនឹងធ្វើឲ្យប្រាកដថាបំណងប្រាថ្នារបស់ព្រះនឹងសម្រេចនៅផែនដី។ តើរាជាណាចក្ររបស់ព្រះនឹងធ្វើអ្វីសម្រាប់អ្នកដែលរស់នៅផែនដី?

បំបាត់ចោលជំងឺ និងសេចក្ដីស្លាប់។ «រីឯបណ្ដាជនដែលរស់នៅក្នុងស្រុក ពួកគេនឹងមិននិយាយថា៖ ‹ខ្ញុំឈឺ›ទៀតឡើយ» ហើយ«សេចក្ដីស្លាប់នឹងលែងមានទៀត»។—អេសាយ ៣៣:២៤; ការបើកបង្ហាញ ២១:៤
នាំឲ្យមានសន្តិភាពនិងសន្តិសុខពិតប្រាកដ។ «សេចក្ដីសុខសាន្តរបស់ពួកគេនឹងមានជាបរិបូរ» ហើយ«ពួកគេនឹងអង្គុយនៅក្រោមដើមទំពាំងបាយជូរនិងដើមល្វារបស់ខ្លួន ហើយនឹងគ្មានអ្នកណាមកបំភ័យពួកគេឡើយ»។—អេសាយ ៥៤:១៣; មីកា ៤:៤
ផ្ដល់ឲ្យមនុស្សមានការងារដែលស្កប់ចិត្ត។ «ឯពួកអ្នកដែលខ្ញុំជ្រើសរើស ពួកគេនឹងមានអំណរយ៉ាងពេញលេញ ចំពោះស្នាដៃរបស់ខ្លួន។ ពួកគេនឹងមិនខំប្រឹងធ្វើការនឿយហត់ដោយឥតប្រយោជន៍ទេ»។—អេសាយ ៦៥:២២, ២៣
ដោះស្រាយបញ្ហាបរិស្ថាន។ «តំបន់ស្ងាត់ជ្រងំនិងតំបន់ហួតហែងនឹងអរសប្បាយ វាលរហោស្ថាននឹងត្រេកអរ ហើយមានផ្ការីកស្គុសស្គាយ»។—អេសាយ ៣៥:១
បង្រៀនមនុស្សអំពីអ្វីដែលពួកគេត្រូវធ្វើដើម្បីរស់ជារៀងរហូត។ «អស់អ្នកដែលនឹងទទួលជីវិតដែលគ្មានទីបញ្ចប់ ត្រូវស្គាល់លោកដែលជាព្រះពិតតែមួយឲ្យបានច្បាស់ និងត្រូវស្គាល់យេស៊ូគ្រិស្តដែលលោកបានចាត់ឲ្យមក»។—យ៉ូហាន ១៧:៣