1, 2. (a) Ruthip No’omil­lu angalanerat aliasun­neran­nul­lu pis­sutaasut oqalut­tuarik­kit. (b) Sooq Ruthip No’omil­lu angalaner­tik as­sigiin­ngitsumik isumaqarfigaat?

RUTHIP No’omi Moabip narsar­taani anorsaar­tumi aq­qusinik­kut ingerlaqatigaa. Nuna isorar­tungaarmat ar­nat taak­ku kisimiil­lutik pisut­tut takuneqar­piarsin­naan­ngil­lat. Takorlooruk Ruthip ualik­kut seqineq ap­pasin­nerulermat sakini qiviaraa un­nuif­fis­sarsior­nis­samul­lu pif­fis­san­ngor­nersoq eq­qarsaatigilerlugu. Ruthip No’omi asangaar­paa isumas­sor­niarlugulu qanorluun­niit iliuuseqarusul­luni.

² Marluul­lutik aliasup­put. No’omi ukior­pas­suar­ni uil­lar­nerusimavoq, qanit­tuk­kul­li asasani, er­nini marluk Kiljoni Maklonilu, toquk­kut an­naasani aliasuutigai. Ruthil­lu uigigaluami Maklonip toqunera aliasuutigaa. No’omi Ruthilu Israelimi il­loqarfim­mut Betlehemimut angalaqatigiik­kaluarlutik angalaner­tik as­sigiin­ngitsumik isumaqarfigaat. No’omi angerlar­poq. Ruthi ilaqut­taminik, nunaminik sungiusimasaminil­lu – ilaatigut nunaq­qatimi guutiinik – qimatsil­luni nunamut nalusaminut aal­lar­poq. – Ruthi 1:3-6 atuakkit.

3. Ruthimik up­per­nik­kut ilaarsinis­satsin­nut apeq­qutit suut iluaqutigis­savavut?

³ Ar­nap inuusut­tup inuunerminik al­lan­nguerujus­suar­nis­saminut suna pis­sutigaa? Ruthip al­laanerusumik inooriaaseqaler­nis­saminut No’omimil­lu isumas­suinis­saminut suna nakus­satsis­sutigisin­naavaa? Taak­kua akis­sutis­sarsior­neran­ni Ruthi Moabik­kuusoq up­per­nik­kut as­sigiin­ngitsor­pas­suar­tigut ilaarsin­naal­lugu paasis­savar­put. (Aam­ma takuuk ungalusaq “Torral­lataq naatsoq”). Siul­lermik ar­nat taak­ku marluk sooq Betlehemimut taama ungasitsigisumut angalanersut sam­meriar­tigu.

4, 5. (a) Sooq No’omip ilaqutai Moabimut nuup­pat? (b) No’omi Moabimi sunik unam­miniagaqar­pa?

⁴ Ruthi Moabimi, nunami angin­ngitsumi Im­map Uumaatsup kangianiit­tumi, peroriar­tor­poq. Nuna qatsis­suuvoq or­peqar­pian­ngitsoq qooror­pas­sualik. Israelimi kaan­nersuaqaraluar­toq Moabip  narsar­tai naggoris­suusar­put. Kaan­nersuaqar­neralu pis­sutigalugu Ruthip Makloni ilaqutaalu at­taveqarfigiler­pai. – Ruth 1:1.

⁵ Israelimi kaan­nersuaq pis­sutigalugu No’omip uia, Elimeleki, aalajanger­poq nuliani er­ninilu marluk ilagalugit nunani qimal­lugu Moabimi takor­nar­tatut nunas­sin­niarluni. Israelik­kut Jehovap sumiif­fit­tut il­ler­nar­tutut toq­qagaanut pal­lorfigin­nik­kiar­tor­tar­tus­saam­mata ilaqutaasut tamarmik nuun­ner­tik up­per­nik­kut unam­miniar­nar­tis­simas­savaat. (5 Mos 16:16, 17) No’omi up­perluar­tuaraluarluni uini toqum­mat aliasungaar­poq. – Ruth 1:2, 3.

6, 7. (a) Sooq No’omip er­nermi Moabik­kut ar­nar­taan­nik nuliar­nerat er­numas­sutigisimas­savaa? (b) Sooq No’omip ukus­saminik pin­neriaasia nersor­nar­pa?

⁶ Kingusin­nerusuk­kut er­nini Moabik­kut ar­nar­taan­nik nuliarmata im­maqa No’omi aliasun­neruler­poq. (Ruth 1:4) Nalun­ngilaa inuiaqatimi siuaasaat Aaperaat er­nini Iisaaq inuiaqatiminik, Jehovamik pal­lorfigin­nit­tunik, nuliar­nias­sam­mat iliuuseqangaar­toq. (1 Mos 24:3, 4) Kingusin­nerusuk­kut Guutip in­nut­tai guutipilus­siuleqinam­mata Mosesip inatsisaani peq­qus­sutigineqar­poq Israelik­kut er­nitik panitil­lu takor­nar­tanik aap­par­taar­tit­tas­san­ngik­kaat. – 5 Mos 7:3, 4.

⁷ Taamaat­torli Makloni Kiljonilu Moabik­kut ar­nar­taan­nik nuliar­put. No’omip im­maqa taman­na er­numalis­sutigaa pakatsis­sutigalugulu, qular­nan­ngitsumil­li ukus­sani Ruthi Or­palu inus­siar­nersumik asan­nit­tumil­lu pisar­pai. Im­maqa Jehovamik pal­lorfigin­nilerumaar­nerat neriuutigaa. Qanorluun­niit pisoqarsimagaluar­pat Ruthip Or­pal­lu No’omi asavaat. At­taveqaqatigiil­luar­ner­tik alianar­tunik nalaataqar­nermin­ni iluaqutigaat. Ar­nat inuusut­tut suli meerar­taar­natik uil­lar­nin­ngor­put. – Ruth 1:5.

8. Ruthip Jehovamut qanin­neruler­neranut suut pis­sutaaqataagunar­pat?

⁸ Ruthip alianar­tunik atugaqar­nermini up­perisarsior­nik­kut tunuliaqut­tani iluaqutigaa? Ilimanan­ngilaq. Moabik­kut guuter­pas­suaqar­put, Kemoshilu taak­kua pingaar­nersaraat. (4 Mos 21:29) Soq­qusaan­nerit amiilaar­nar­tut, soorlu meeq­qanik pil­liisar­neq, taamanik­kut nalingin­naasut aam­ma Moabik­kut up­perisarsior­nermin­ni iliuuserisarunar­paat. Ruthip Israelik­kut Guutiat asan­nit­toq nal­lit­tuisorlu, Jehova, pil­lugu Maklonimit No’omimil­luun­niit ilik­kagai qular­nan­ngitsumik sungiusimasaanit al­laanerul­luin­nar­put. Jehova asan­nil­luni, qunusiarin­nin­nani, naalak­kersuivoq. (5 Mosesi 6:5 atuaruk). Ruthip im­maqa toquk­kut an­naasaqar­nini No’omimut qanin­nerulis­sutigalugulu Guuti Ajugaqan­ngitsoq, Jehova, taas­sumalu suliai alutor­nar­tut aam­ma asan­nit­tumik nal­lit­tuisumil­lu in­nut­taminik pin­nit­tar­nera pil­lugit ar­naq utoq­qaq oqalut­tuar­til­lugu tusar­naar­nis­saminut kajumis­sis­sutigisimas­savaa.

9-11. (a) No’omi, Ruthi Or­palu suniarlutik aalajanger­pat? (b) No’omip, Ruthip Or­pal­lu nalaataan­nit alianar­tunit suut paasivavut?

 ⁹ No’omi nunagisani pil­lugu tusagaqarusungaar­poq. Taamaal­luni, im­maqa niuer­tumit angalasar­tumit, tusar­paa Israelimi kaan­nersuaqarun­naar­toq. Jehovap in­nut­tani isumas­sulersimavai. Betlehemi taaguutiminut, ‘timiusaqarfim­mik’ isumaqar­tumut, naaper­tuuteq­qiler­poq. No’omi angerlar­niarluni aalajanger­poq. – Ruth 1:6.

¹⁰ Ruthi Or­palu sus­sap­pat? (Ruth 1:7) Uil­lar­nin­ngor­nermik kingor­na No’omimut qanin­neruler­put. No’omip inus­siar­ner­nera Jehovamul­lu up­perluar­nera pis­sutigalugit ingam­mik Ruthi No’omimut ataneruler­poq. Uil­lar­nerit pingasut Judap tungaanut aal­lar­put.

¹¹ Ruthi pil­lugu oqalut­tuamit erser­poq inuit ajun­ngitsut ajor­tul­lu tamarmik alianar­tunik nalaataqar­tarlutil­lu toquk­kut an­naasaqar­tar­tut. (Oqal 9:2; Jaak 4:13, 14) Aam­ma paasivar­put toquk­kut an­naasaqar­nermik aliasuutigin­nin­nermi al­lanut – ingam­mik inun­nut Jehovamut, Guutimut No’omip pal­lorfigisaanut, oq­qif­fis­sarsior­tar­tunut – tup­pal­lersaq­qusarut­ta silatusaas­sal­luta. – Us­s 17:17.

12, 13. Sooq Ruthip Or­pal­lu nunagisamin­nut uter­nis­saat No’omip kis­saatigaa, ar­nal­lu inuusut­tut aal­laq­qaam­mut qanoq oqar­pat?

¹² Moabi ungasil­liar­tor­til­lugu No’omi er­numaler­poq. Ar­nat inuusut­tut marluk ilagisami im­minut er­nerminul­lu asan­nin­nermik ersersitsisimanerat eq­qarsaatigaa. Taak­kua naner­tuuteqar­neruler­neran­nut pis­sutaasin­naanini sapingajap­paa. Nunagisar­tik qimal­lugu aal­laqatigip­pan­ni Betlehemimi qanoq ajun­ngitsuliorfigisin­naagamigit?

¹³ Naggataatigut No’omip ima oqarfigai: “Tas­sa uter­niaritsi anaanas­si il­luinut angerlarlusi! Qanor­toq Naalak­kap ajun­ngitsuliorfigilisi soorlu ilis­si toqusor­tak­ka uangalu isumagisimagitsigut.” Aam­ma oqaatigaa ueqaleq­qin­nermik­kut Jehovamit pil­luaq­quneqarumaar­nerat neriuutigalugu. “Taava inuul­luaq­qul­lugit kunip­pai; taak­kuli qis­saser­put.” Paasinar­poq Ruthip Or­pal­lu ar­naq inus­siar­ningaar­toq nam­minis­sarsiun­ngitsorlu qanitarilersimam­mas­suk.  Aalajangersimar­palul­lutik ima oqar­put: “Inuiaqatin­nut uteqatigis­savatsigit.” – Ruth 1:8-10.

14, 15. (a) Or­pap suut uterfigai? (b) No’omip Ruthi uteq­qul­lugu qanoq kimigiiserfigaa?

¹⁴ No’omili akuersiin­naruman­ngilaq. Ilungersorluni oqarfigai isumagin­nis­sin­naasumik ueqan­ngin­nami, katis­sin­naasaan­nik er­neqan­ngin­nami kateq­qin­nis­sanilu ilimanan­ngim­mat Israelimut pigunik ikiorsin­naanagit. Aam­ma oqarfigai taak­kunin­nga isumas­suisin­naan­ngin­nini an­nikil­liuutigalugu. No’omip suna pineraa Or­pap paasivaa. Ilaqutai, anaanaa angerlarsimaf­fialu Moabimiip­put. Moabimi najugaqar­neq ajor­nan­ngin­nerus­saaq. Taamaat­tumik sakini inuul­luaq­qul­lugu kuneriarlugu Or­pa aliasoqaluni angerlar­poq. – Ruth 1:11-14.

¹⁵ Ruthimi? No’omip tun­ngavilersuutai aam­ma taas­sumun­nga atuup­put. Oqalut­tuarli ima nangip­poq: “Ruthi sakiminit qimaguk­kuman­ngilaq.” Im­maqa No’omip aq­qusinik­kut pisutsil­luni Ruthi tunumini pisut­toq malugileramiuk ima oqarfigaa: “Takuat ukuaqatit inuiaqatiminut guutiminul­lu uter­toq. Ukuaqatit ilaginiaruk!” (Ruth 1:15) No’omip oqaasii paasis­sutis­sanik pingaarutilin­nik ersersitsip­put. Or­pa inuiaqatiminut utiin­nar­nani aam­ma ‘guutiminut’ uter­poq. Kemoshimik guutipilun­nil­lu al­lanik pal­lorfigin­nin­nini naam­magaa. Ruthi aam­ma taamatut isumaqar­pa?

16-18. (a) Ruthip ilumoorfigin­nil­luni asan­nin­neq qanoq ersersip­paa? (b) Ilumoorfigin­nil­luni asan­nin­nermut tun­ngatil­lugu Ruthi qanoq ilin­niarfigisin­naavar­put? (Aam­ma ar­nat marluk as­siliar­taat takuk­kit).

¹⁶ Ruthip aq­qusinermi tas­sani inoqan­ngitsumi No’omi oqaloqatigitil­lugu suniar­nerluni qularin­ngil­luin­nar­paa. No’omi  taas­sumalu Guuti kif­far­torfigisaa asagamigit ima oqar­poq: “Ilin­nit qimagun­nis­san­nut angerlar­nis­san­nul­lu kimigiiserfigeqinanga. Or­nik­kat uangat­taaq or­nis­savara, najugariligas­san­nilu najugaqas­saanga. Inuiaqatitit uangat­taaq inuiaqatigis­savak­ka, il­lil­lu Guutit uangat­taaq Guutigis­savara. Il­lit toquf­fis­san­ni toqujumavunga tas­sanilu ilisaajumal­lunga. Naalak­kap pil­laqat­taar­tuarilinga ilin­nit avis­saas­sagaluaruma, toqum­mi kisimi avis­saar­tis­sin­naavaatigut!” – Ruth 1:16, 17.

¹⁷ Ruthip oqaasii maluginiar­nangaaramik ukiut 3.000-t matuma sior­na toqoreeraluar­toq ilisimaneqarluar­put. Pis­suserineqar­tus­samik erlin­nar­tumik – ilumoorfigin­nil­luni asan­nin­nermik – ersersitsil­luar­put. Ruthip asan­ningaarami ilumoorfigin­ningaaramilu No’omi sumukaraluar­pal­luun­niit ilagerusup­paa. Toqu taamaal­laat avis­saas­sutigisin­naavaat. Ruthi Moabimi sungiusimasaminik tamanik, al­laat Moabik­kut guutiinik, qimatseriaan­naagami No’omip inuiaqataanik inuiaqateqalerusup­poq. Or­pa as­siginagu Ruthi uum­matik­kut iluun­ngarluni oqarsin­naavoq No’omip Guutia, Jehova, Guutigilerusul­lugu.

¹⁸ Taava marluin­naal­lutik Betlehemimut aq­qut atuarlugu ingerlaq­qiler­put. Angalanerup sapaatip-akun­neranik ataatsimik sivisus­suseqar­nera mis­singer­neqarsimavoq. Qular­nan­ngitsumik aliasun­nermin­ni tup­pal­lersaqatigiit­tar­put.

19. Ilumoorluni asan­nin­nermut tun­ngatil­lugu Ruthi qanoq ilaarsin­naavar-put?

¹⁹ Ul­lumik­kut silarsuarmi matumani inup­pas­suit aliasuuteqar­tar­put. Nalitsin­ni, ‘ul­lunik atugarliungaarfiusunik’ Biibilimi taaneqar­tuni, tamat­ta an­naasaqar­nerit aliasun­neril­lu as­sigiin­ngitsut misigisar­pavut. (2 Tim 3:1) Taamaat­tumik Ruthip pis­suseq ersersitaa aatsaat taama pingaaruteqar­tigaaq. Ilumoorfigin­nil­luni asan­nin­neq soraan­ngisaan­nar­toq silarsuarmi matumani ajorsiar­tuin­nar­tumi ajun­ngitsulior­nis­samut iluaqutaangaar­tar­poq. Taman­na aap­pariin­nermi, ilaqutariit­tut inuunermi, ikin­ngutinut at­taveqar­nermi kristumiul­lu ilagiivini pisariaqar­tip­par­put. (1 Johannesi 4:7, 8, 20 atuakkit). Asan­nin­neq taama it­toq ineriar­tor­tik­kaangatsigu Ruthip maligas­siuil­luar­nera ilaar­tar­par­put.

20-22. (a) No’omi Moabimit uterami qanoq ip­pa? (b) No’omi atugarlior­nerminut tun­ngatil­lugu qanoq kuk­kusumik isum­mer­pa? (Aam­ma takuuk Jaaku 1:13).

²⁰ Soorunami ilumoorfigin­nil­luni asan­nin­nerar­neq ilumoorfigin­nil­luni asan­nit­tulior­nermit al­laanerul­luin­nar­poq. Ruthi ilumoorfigin­nil­luni  asan­nin­nermik No’omimuin­naan­ngitsoq kisian­ni aam­ma Guutimisut toq­qak­kaminut, Jehovamut, ersersitsinis­samut periarfis­saqar­poq.

²¹ Ar­nat marluk taak­ku kiisami Betlehemimut, il­loqarfeeq­qamut Jerusalemimit kujam­mut 10 kilometerit mis­siliorlugit ungasitsigisumiit­tumut, apuup­put. No’omi ilaqutaalu il­loqarfeeq­qami tas­sani nuimasuusimagunaramik uter­nerat kik­kun­nit tamanit eq­qar­tor­neqar­poq. Ar­nat takugaangamik­ku ima oqar­tar­put: “Arraa, ilumut taan­naanerluni No’omi?” Moabimiin­nermini as­sut al­lan­ngorsimavoq; ukior­pas­suar­ni atugarliorsimanera aliasus­simaneralu isik­kuatigut timaatigul­lu takuneqarsin­naavoq. – Ruth 1:19.

²² No’omip ilaqut­tani sanilerisimasanilu narrutsaq­qangaar­nerminik oqalut­tuup­pai. Al­laat misigivoq No’omimik, ‘inequnar­tumik’ imaluun­niit ‘inus­siar­nersumik’ isumaqar­tumik, ateqarun­naarluni Maramik, ‘narrutsas­simasumik’ isumaqar­tumik, taaneqar­tariaqarluni. No’omin­nguak­kuluk! Jobitut isum­mer­poq Jehovap Guutip atugarlior­tik­kaani. – Ruth 1:20, 21; Job 2:10; 13:24-26.

23. Ruthip suna eq­qarsaatigiler­paa, Mosesil­lu inatsisaani piitsunut qanoq aalajangersagaqar­pa? (Aam­ma qup­per­nerup ataatungaani ilan­ngus­saq takuuk).

²³ Betlehemimi inuunermin­nik sungius­siar­tor­til­lutik Ruthip qanoq pitsaaner­paamik im­minut pilersorsin­naanerluni No’omimil­lu pilersuisin­naanerluni eq­qarsaatigiler­paa. Paasivaa Inatsisini Jehovap Israelik­kun­nut tun­nius­saani piitsunut asan­nit­tumik aalajangersagaqar­toq. Piitsut katersuif­fiup nalaani karrit katersuisunit qaangiin­nar­neqarsimasut karreqarfiil­lu kil­lingan­niit­tut katersorsin­naavaat. * – 3 Mos 19:9, 10; 5 Mos 24:19-21.

24, 25. Ruthi nalaatsor­nik­kut Boazip narsaataanut pigami sua, katersuinerlu qanoq it­tar­pa?

²⁴ Suaasias­sanik katersuif­fiup, nalitsin­ni qaam­matisiutit naaper­torlugit apriilip, nalaani Ruthi narsaatinukar­poq paasiniarlugu  sorlermi katersuisin­naanerluni. Nalaatsor­nik­kut angutip Boazimik atil­lip pisuup nunaatil­lip, No’omip uigigaluata Elimelekip ilaqutaata, narsaataanut pivoq. Inatsisit naaper­torlugit katersuisin­naatitaanini taamaat­tus­saan­nar­tut isigin­ngin­namiuk katersuisut pisor­taat inuusut­toq aperaa katersuisin­naanerluni. Akuerim­mani Ruthi ingerlaan­naq suliler­poq. – Ruth 1:22-2:3, 7.

²⁵ Takorlooruk Ruthip katersuisut malik­kai. Kil­luum­mik ujaraasumik suaasias­sanik agguinermin­ni nak­kaasaat qaangiin­nagaal­luun­niit peqil­luni katersoriarlugit kanaar­tai qilersor­tar­pai karrer­taajaaf­fis­samukaat­tarlugil­lu. Taamatut sulineq pisariul­lunilu tamaviaar­narlunilu ualiar­tor­nerani ar­tor­nar­neruler­tar­poq. Ruthili suliuar­poq taamaal­laal­lu qaamigut kiagun­nini al­lar­ter­niaraangamiuk taqus­saniluun­niit neriniaraangamigit unit­tarluni.

26, 27. Boazi inut­tut qanoq it­tuua, Ruthimil­lu qanoq pin­nit­tar­pa?

²⁶ Ruthi malugineqar­nis­sani neriuutigin­ngik­kaluarlugu naatsorsuutigin­ngik­kaluarlugulu maluginiar­neqar­poq. Boazip takugamiuk katersuisut pisor­taat inuusut­toq ar­nap taas­suma kinaaneranik aperaa. Boazip up­perluar­tup sulisuni – ul­lormusial­lit al­laal­lu takor­nar­tat – ima oqarfigalugit ilas­sisar­pai: ‘Jehovap najorlisi!’ Ilas­sisaalu aam­ma taamatut akisar­put. Boazip, angutip utoq­qaap Jehovamik asan­nit­tup, Ruthi ataatatut soqutigin­nin­nermik ersersitsivigaa. – Ruth 2:4-7.

²⁷ Boazip Ruthi ‘panim­minik’ taariarlugu narsaatimini katersuisaq­qul­lugu angutinil­lu katersuisunit ajor­tumik pineqan­ngin­nias­sam­mat kif­faminik ar­nanik peqateqar­taq­qul­lugu siun­nersor­paa. Ul­loqeq­qanut nerisas­saqar­tar­nis­saa isumagaa. (Ruthi 2:8, 9, 14  atuakkit). Tamatumali saniatigut nersualaarlugulu tup­pal­lersar­paa. Qanoq?

28, 29. (a) Ruthi qanoq tusaamaneqar­pa? (b) Ruthitut Jehovamut qanoq oq­qif­fis­sarsiorsin­naavit?

²⁸ Inus­siar­nersumik pineqar­tar­nerminut suna pis­sutaanersoq Ruthip apeq­qutigim­magu Boazi akivoq Ruthip sakiminut, No’omimut, iliuuserisimasar­pas­sui tusarsimal­lugit. No’omip Ruthi asasani Betlehemimi ar­nat akor­nan­ni un­nersiutigisarunaramiuk Ruthi pil­lugu Boazi tusagaqarsimas­saaq. Aam­ma nalun­ngilaa Ruthi Jehovamik pal­lorfigin­nilersimasoq, imami oqarami: “Naalak­kap akilerilisit­toq qanoq iliorsimanitit pil­lugit. Qanor­toq Naalak­kap Israelik­kut Guutiata naam­mat­tumik akis­sarsitik­kilisit maanga or­nis­simagan­ni suluisa ataan­ni oq­qif­fis­sarsiumal­lutit!” – Ruth 2:12.

²⁹ Ruthip taamatut oqarfigineqar­nini tup­pal­lersaatigingaarsimas­savaa! Tim­miaaq­qap anaanaminut il­lersor­tis­sarsior­tar­neratut Jehovap Guutip suluisa ataan­ni oq­qif­fis­sarsinis­sani aalajangiusimavaa. Toq­qis­sisimalersitsinera pil­lugu Boazi qutsavigereerlugu Ruthi un­nun­nis­saata tungaanut sulivoq. – Ruth 2:13, 17.

30, 31. Sulinermut, qujamasun­nermut ilumoorfigin­nil­lunilu asan­nin­nermut tun­ngatil­lugu Ruthi qanoq ilin­niarfigisin­naavar­put?

³⁰ Ruthi up­perluni iliuuseqar­toq ul­luni mak­kunani aningaasaqar­nik­kut ajor­nar­torsiorfiusuni uagutsin­nut maligas­saal­luar­poq. Uil­lar­nerunini pil­lugu al­lanit ikior­neqar­tariaqar­tutut misigin­ngin­nami al­lanit ikior­neqaraangami qujamasut­tar­poq. Asasani isumas­sorumal­lugu sivisuumik tamaviaarlunilu, al­laat nikagineqar­tumik, suliaqar­nis­sani kan­ngunar­tutut isigin­ngilaa. Isuman­naatsumik sulinis­saq inutsialan­nil­lu peqateqar­nis­saq pil­lugu siun­nersuut pitsaasoq maleruar­paa. Pingaar­ner­tut, puiun­ngisaan­nar­paa Ataatani il­lersuisar­toq, Jehova Guuti, taamaal­laat oq­qif­fis­sarsif­figisin­naal­lugu.

³¹ Ruthitut ilumoorfigin­nil­luta asan­nin­nermik ersersitsigut­ta taas­sumalu maniguun­nermik, tamaviaarluni sulinermik Jehovamil­lu ilisarisiman­niler­nermik qujamasuutigin­nin­nermik maligas­siuil­luar­nera ilaarutsigu al­lanut up­per­nik­kut maligas­saal­lualersin­naavugut. Jehoval­li Ruthi No’omilu qanoq isumas­sor­pai? Taman­na kapitalimi tul­liut­tumi sam­mis­savar­put.