Ku sa fanana ne bathu, Jesu wa ka chila kudzimu i li nthu we meya a sa thu a ka zwagwa mu shango. (Johani 8:23) Wa ka be a li mbumbo ye kutanga ye Ndzimu, ngono wa ka batsha mu ku bumbiwa kwe zwithu zwingwe zose. Ndiye koga wa ka bumbiwa na Jehova ne bukukwe ndizo e fanigwa ne ku dangwa Nkololo “uyega” we Ndzimu. (Johani 1:14) Jesu wa ka be ali Nlebelekeli we Ndzimu, ndizo kakale e dangwa “Dama.”​—Bala Zwiani 8:22, 23, 30; Bakolosa 1:15, 16.

Ndzimu wa ka tumila Nkololo uwe mu shango ne ku pindisila buchilo gugwe ku dwa kudzimu mu ntumbu we ngwanadi we Njuta u noyi Mariya. Ngono Jesu ha a zo be ne tate be nthu. (Luka 1:30-35) Jesu wa ka zha mu shango (1) ku diya bathu malebeswa ne kwe Ndzimu, (2) ku ti lakidza se kwa ti nga thama ku da kwe Ndzimu nenguba ta ka lingisana ne mathatha, ne (3) ku dusa buchilo gwa ka zwilizanila se “chibayilo.”​—Bala Matewu 20:28.

Chibayilo i chingwe chi no dusiwa mu bumo gwe chingwe chi nga bulaya nthu. (Ekezodo 21:29, 30) Lufu ne kwegula zwa ka zwi si mu ndongoloso ye Ndzimu ye kutanga mu bathu. To ziba ichecho chini? Ndzimu wa ka budza nthu we kutanga, Adamu, kuti ha a nga thama “chibi,” u nowo fa. Ngono ha Adamu a ka be a sa thama chibi, u nowo be a sa ka fa. (Genesisi 2:16, 17; 5:5) Ku yenda ne Baibili lufu gwa ka “zha” mu shango na Adamu. Ndizo Adamu a ka pindisila mu bathu bose chibi ne mbayilo wa cho, lufu. To sheta chibayilo chi  nga ti dusa mu ku athuligwa lufu kwa ta ka thuwa ku dwa mu na Adamu.​—Bala Baroma 5:12; 6:23.

Ndi yani wa ka be a nga ruwela chibayilo chi nga ti sunungula mu lufu? A ti fa, to ruelela zwibi zwedu koga. A kuna nthu u sa ka zwilizanila u nga tengunula bangwe mu zwibi zwabo.​—Bala Pisalema 49:7-9.

Ku sa fanana naswi, Jesu wa ka be a ka zwilizanila. Ngono kwa ka be ku singa sheteke kuti a file zwibi zwizwe—ne kuti ha a so ngo thama chibi. Mu bumo gwa ichecho, Jesu wa ka fila zwibi zwe bangwe. Ndzimu wa ka lakidza bathu ludo gu kulu kwazo ne ku tumila nkololo uwe ku ti fila. Jesu na iye bo wa ka ti lakidza ludo ne ku teedza Tate babe ne ku dusa buchilo gugwe mu bumo gwe zwibi zwedu.​—Bala Johani 3:16; Baroma 5:18, 19.

Lingilila vidiyo Ini Jeso a Ka Fa?

Wa kati a li mu shango, Jesu wa ka podza ba no gwala, ka musa bafi, ne ku dusa bathu mu zwimo zwi no hwisa zogwadza. Ne ku thama e jalo wa ka lakidza cha a nowo thamila bathu bose ba no hwa, mu chibaka chi no zha. (Matewu 15:30, 31; Johani 5:28) Shule kwe lufu gugwe, Jesu wa ka musiwa se nthu we meya ne Ndzimu. (1 Pita 3:18) Jesu a ka linda a li ku liboko gwe Ndzimu gwe luji ku swikilila Jehova e mpa masimba e ku busa shango yose se She. (Bahebera 10:12, 13) Ngwenu Jesu u no busa a li She kudzimu, ngono batobeli babe ba no zibisa ndebo iyeyo mbuya mu shango yose.​—Bala Daniele 7:13, 14; Matewu 24:14.

Ku sathu ku ka no ti ngayi, Jesu u nowo shingisa masimba awe se She ku pedzisa ku dziyidzika kose na ibabo ba no ku thama. Bose ba na ku galamoyo mu na Jesu ne ku nteedza ba nowo shathila buchilo mu shango ye paradaisi.​—Bala Pisalema 37:9-11.