Bushe gwe Ndzimu i mbuso we kudzimu. Gowo tola mamo e mibuso yose gu be gu thama kuti ku da kwe Ndzimu ku shingikale mu shango ne kudzimu. Ko shathisa ku ziba kuti Ndzimu u nowo shingisa bushe gugwe ne zila iyeyi. Ku sathu ku kati ngayi, Bushe gwe Ndzimu gowo thama kuti ku yemula kwe bathu ku be ne mbuso wa ka lulwama ku shingikale. Gowo thama kuti bathu bose ba no chila mu shango ba wanane.​—Bala Daniele 2:44; Matewu 6:9, 10; 24:14.

Bushe gwa ka fanila ku be ne she. Jehova wa ka biga Nkololo uwe, Jesu Kirisiti, kuti a be She ye Bushe Gugwe.​—Bala Zumbunulo 11:15.

Lingilila vidiyo What Is Godʼs Kingdom?

Nkololo we Ndzimu ndiye She ya ka fanila ne kuti u na moyonnyolo kakale u no milila cha ka lulwama. (Matewu 11:28-30) Kakale u na masimba e ku batsha bathu ne kuti u nowo busa shango a li kudzimu. Shule kwe ku musiwa kukwe, a ka tathila kudzimu ngono a ka gala a ka linda a li ku liboko gwe liji gwa Jehova. (Bahebera 10:12, 13) Ndzimu a ka peleledza a mpa masimba kuti a tangise ku busa.​—Bala Daniele 7:13, 14.

Mbunga we bathu ba no dangwa “bayengemali” ba nowo busa na Jesu kudzimu. (Daniele 7:27) Bayengemali be kutanga ku shalugwa i baapostolo ba no thembeka ba Jesu. Jehova u cha dwilila e shalula balume ne bakadzi ba ka yengemala ne mu misi ya ngwenu. Ba no musiwa ne mbili we meya, sa Jesu.​—Bala Johani 14:1-3; 1 Bakorinta 15:42-44.

 I bathu bangana ba nowo yenda kudzimu? Jesu wa ka ba dana ‘pkhwizi shomanana.’ (Luka 12:32) Ku bupelo ba nowo be palo ye 144,000. Ba nowo busa shango na Jesu.​—Bala Zumbunulo 14:1.

Bushe gwe Ndzimu gwa ka tangisa ku busa ne 1914. * Thambo ye kutanga ya ka togwa na Jesu a li She ya ka be ku lashila Satani ne madimoni awe mu shango. Satani wa ka zhala bushongola ngono a ka tangisa thama mathatha mu shango yose. (Zumbunulo 12:7-10, 12) Chinga kwa ipapo, mathatha e bathu a no paphidzika ku no chenamisa. Nghwa, zhala, magwele, ne ku zunguzika kwe shango, zose izwezwi i “chilakidzilo” che kuti Bushe gowo dwa gu busa mu shango yose.​—Bala Luka 21:7, 10, 11, 31.

Nshingo we ku rera wa ka thama kuti Bushe gwe Ndzimu gu shanganye bathu banjinji kwazo ku dwa mu njudzi dzose. Dzimillion dze bathu ba moyonnyolo ba nowo busiwa ne Bushe gwe Ndzimu, gu no busiwa na Jesu. Bushe gwe Ndzimu gowo ba bakilila ha gu chinya njendiso iyeyi ya ka bipa ye shango. Bose ba no shaka ku be ne mbayilo mu Bushe gwe Ndzimu, ba ka fanila ku zwidiya ku be babusiwa ba Jesu ba no hwa.​—Bala Zumbunulo 7:9, 14, 16, 17.

Mu chibaka che makole a li 1,000, Bushe gowo shingikadza mazwimisilo e Ndzimu e kutanga ne kwe bathu. Shango yose i nowo be paradaisi. Ku bupelo, Jesu o nowo gwiliza Bushe ku na Tate babe. (1 Bakorinta 15:24-26) A ku na nngwe wa u no ziba wa u no shaka lebeleka naye ne kwe Bushe gwe Ndzimu?​—Bala Pisalema 37:10, 11, 29.