THUTO 9
Nsha Uwo u Nga Shatha Chini?
1. Ini ku lobolana ku sheteka kuti nsha u shathe?
Ndebo mbuya dzo dwa ku na Jehova, Ndzimu wa ka shatha, u no shaka kuti misha i shathe. (1 Timoti 1:11) Ndiye wa ka tangisa ndobolo. Ndobolo ye nlayo i no sheteka kuti nsha u shathe ne kuti bana ba kulile mu ndawo ya ka bakililika. Bakirisiti ba ka fanila hlonipha milayo ye shango yabo ha ku zha mu ku kwalisiwa kwe ndobolo.—Bala Luka 2:1, 4, 5.
Ndzimu u no linga ndobolo chini? U no shaka kuti i be chidumano chi no galila chose pakati kwe nlume ne nkadzi. Jehova u no shaka kuti nlume ne nkadzi ba ka lobolana ba thembeke mu na wa ba ka lobolana naye. (Bahebera 13:4) U no shima divorce mu ndobolo. (Malaki 2:16) Koga u no duma kuti Bakirisiti ba nga thubukana (divorce) ne ku lobola kakale ha wa ba ka lobolana naye a thama bupongwe.—Bala Matewu 19:3-6, 9.
2. Nlume ne nkadzi ba ka lobolana ba ka fanila batana chini?
Jehova wa ka bumba nlume ne nkadzi kuti ba batshane mu ndobolo. (Genesisi 2:18) Nlume se nsholo we nsha, u na mazwidabililo e ku batsha be nsha uwe ne zwa ba no sheta, ne ku ba diya ne kwe Ndzimu. Wa ka fanila lakidza nkadzi uwe ludo gwe ku zwidusa chibayilo. Balume ne bakadzi ba ka lobolana ba ka fanila dana ne ku hloniphana. Se nlume ne nkadzi ba sa ka zwilizanila, ba ka fanila ku zwidiya ku zwibatilana kuti nsha wabo u shathe.—Bala Baefeso 4:31, 32; 5:22-25, 33; 1 Pita 3:7.
3. A wa ka fanila siya wa wa ka lobolana naye ha u sa ka shatha mu ndobolo?
Ha mu na mathatha mu ndobolo yenyu, mose bubili gwenyu ma ka fanila gwisa ku batana ne ludo. (1 Bakorinta 13:4, 5) Dama le Ndzimu a li to alakanisa separation kuti ku bankanyiwe mathatha a ka jwaeleka mu ndobolo.—Bala 1 Bakorinta 7:10-13.
4. Bana, Ndzimu u no mu shakilani?
Jehova u no shaka kuti mu shathe. U no mu kumbuludza zwibuyanana kuti mu shathile butshwa gwenyu. U no shaka kuti mu be ne mbayilo mu buchenjedu ne mu na cha ka shingikalila bazwadzi benyu. (Bakolosa 3:20) Kakale Jehova u no shaka kuti mu shathe apa mu nshingila iye Mbumbi, ne Nkololo uwe.—Bala Nreri 11:9–12:1; Matewu 19:13-15; 21:15, 16.
5. Bazwadzi, bana benyu ba nga shatha chini?
Ma ka fanila thama kose kwa mu nga khona ku chengeta bana benyu ne zojiwa, pa ba no gala, ne zwiambalo. (1 Timoti 5:8) Ngono kuti bana benyu ba shathe, ma ka fanila ku ba diya kuda Ndzimu ne ku zwidiya munli. (Baefeso 6:4) Chilakidzilo chenyu che ku da Ndzimu chi nga sendedzela mimoyo ye bana benyu. Ha mu ba kulumbidza ku yenda ne Dama le Ndzimu, ichecho chi nga ba sendedzela ku kumbula ne zila ya ka lulwama.—Bala Ditironomi 6:4-7; Zwiani 22:6.
Bana benyu ba nga be ne mbayilo ha mu ba kulumbidza ne ku ba boka. Ba no sheta ku chemegwa ne ku lulwamisiwa. Ku diya kwa ka jalo ko ba bakilila kuti ba si wile mu mbatsha dze mazwibato a sa ka lulwama a nga thama kuti ba si shathe. (Zwiani 22:15) Ne kwa ka jalo, bana a ba zo fanila ku chemegwa ne bushongola.—Bala Bakolosa 3:21.
Bafakazi ba Jehova ba no tshambisa buka njinji dza ka thamigwa ku batsha bazwadzi ne bana. Buka idzedzi dza ka teyiwa mu Baibili.—Bala Pisalema 19:7, 11.
