Lekwalo la Bakolosa 1:1-29
1 Nna Paulo, yo ke nnileng moaposetoloi wa ga Keresete Jesu ka thato ya Modimo, le Timotheo+ mokaulengwe wa rona,
2 re kwalela ba ba boitshepo le bakaulengwe ba ba ikanyegang ba e leng barutwa ba ga Keresete kwa Kolosa:
E kete Modimo Rraarona a ka lo naya bopelonomi jo bogolo* le kagiso.
3 Ka metlha fa re lo rapelela, re leboga Modimo Rraagwe Morena wa rona Jesu Keresete,
4 ka gonne re ne ra utlwalela gore lo dumela mo go Keresete Jesu e bile lo rata botlhe ba ba boitshepo
5 ka ntlha ya masego a lo a beetsweng kwa magodimong.+ Lo ne lwa utlwalela ka masego ano fa lo ne lo bolelelwa molaetsa wa boammaaruri wa dikgang tse di molemo
6 tse lo neng lwa di rerelwa. Fela jaaka dikgang tse di molemo di oketsega e bile di anamela kwa bathong botlhe,+ ke sone se se ntseng se direga mo go lona go tloga ka letsatsi le lo neng lwa utlwa lwa bo lwa itse boammaaruri ka bopelonomi jo bogolo jwa Modimo.
7 Lo ithutile dilo tseno mo go Epaforase+ motlhankammogo le rona yo o rategang. Modiredi yono yo o ikanyegang wa ga Keresete o dira tiro e re ka bong re e dira fa re ka bo re na le lona.
8 Gape o re boleletse kafa lo ratang Modimo ka gone.*
9 Mme go tloga ka letsatsi le re neng ra utlwalela ka lorato lwa lona ka lone, re ne ra tswelela re lo rapelela+ e bile re kopa gore lo nne le kitso e ntsi e e boammaaruri+ ka thato ya Modimo le botlhale le gore moya wa Modimo o lo thuse go tlhaloganya.+
10 Tsela e lo tshelang ka yone e tshwanetse go itumedisa* Jehofa* e bile lo tshwanetse go dira ditiro tse di molemo le go oketsa kitso ya lona e e boammaaruri ka Modimo;+
11 e kete Modimo a ka lo nonotsha ka maatla a gagwe ka gonne o na le maatla a magolo,+ gore lo tle lo itshokele dilo tsotlhe lo le pelotelele e bile lo itumetse,
12 lo ntse lo leboga Rara yo o dirileng gore lo amogele boswa jwa batho ba Modimo*+ ba ba leng mo leseding.
13 O ne a re ntsha mo lefifing*+ a bo a re isa kwa bogosing jwa Morwawe yo a mo ratang,
14 yo o re golotseng ka thekololo, mo go rayang gore maleo a rona a itshwaretswe.+
15 Morwa yono o tshwana le Modimo yo o sa bonaleng,+ e bile ke leitibolo la popo yotlhe;+
16 ka gonne o ne a dirisiwa go bopa dilo tsotlhe tse di kwa magodimong le tse di mo lefatsheng, dilo tse di bonalang le dilo tse di sa bonaleng,+ e ka tswa e le magosi kgotsa baeteledipele kgotsa dipuso kgotsa balaodi. Dilo tsotlhe di bopilwe ka ene+ e bile di bopetswe ene.
17 Gape, o nnile gone pele ga dilo tsotlhe,+ e bile o ne a dirisiwa go bopa dilo tsotlhe tse dingwe tse di leng gone,
18 e bile ke tlhogo ya mmele, e leng phuthego.+ Ke tshimologo ya dilo tsotlhe, leitibolo le le neng la tsosiwa mo baswing,+ gore a nne wa ntlha mo dilong tsotlhe;
19 ke gone ka moo Modimo a neng a batla gore dinonofo tsotlhe tsa gagwe di nne mo go Keresete,+
20 le gore Keresete a dire gore dilo tsotlhe tse dingwe, e ka tswa e le dilo tse di mo lefatsheng kgotsa tse di kwa magodimong, di boe di atamalane* le ene*+ gore go nne le kagiso ka ntlha ya madi+ a a a tsholotseng mo koteng ya tlhokofatso.*
21 Eleruri, lo kile lwa bo lo le kgakala le Modimo e bile lo le baba ba gagwe ka gonne lo ne lo tlhomile megopolo ya lona mo ditirong tse di bosula,
22 mme jaanong Modimo o dirile gore lo boelane le ene a dirisa mmele wa ga Morwawe yo o neng a swa, gore a lo tlise fa pele ga gagwe lo le boitshepo, lo se na molato e bile go se na sepe se lo ka latofadiwang ka sone,+
23 fa fela lo tswelela lo le mo tumelong,+ lo tlhomilwe mo motheong+ e bile lo tiile,+ lo sa sutisiwe mo tsholofelong ya dikgang tseo tse di molemo tse lo neng lwa di utlwa le tse di neng tsa rerwa mo lefatsheng lotlhe.*+ Nna Paulo, ke ne ka nna modiredi wa dikgang tseno tse di molemo.+
24 Jaanong ke itumelela go bo ke boga gore lo solegelwe molemo.+ Ke ikemiseditse go tswelela ke boga ka ntlha ya ga Keresete. Ke boga jaana gore mmele wa ga Keresete,+ o e leng phuthego,+ o solegelwe molemo.
25 Ke ne ka nna modiredi mo phuthegong eno go ya ka maikarabelo+ a Modimo a nneileng one gore lo solegelwe molemo ke lefoko la Modimo le ke le rerang ka botlalo,
26 e leng sephiri se se boitshepo+ se se neng se fitlhilwe go tswa bogologolong*+ le go tswa kwa dikokomaneng tse di fetileng. Mme gone jaanong se senoletswe batlhanka ba gagwe ba ba boitshepo.+
27 Modimo o ne a itsise ditšhaba tse dingwe sephiri seno se se boitshepo se se nang le dikhumo tse dintsi tse di galalelang. Sephiri seno se se boitshepo+ ke Keresete yo o seoposengwe le lona, mo go rayang gore lo na le tsholofelo ya go galalediwa le ene.+
28 Ke ene yo re itsiseng mongwe le mongwe ka ene, re tlhagisang mongwe le mongwe ka ene e bile re rutang mongwe le mongwe botlhale jwa boammaaruri ka ene, gore mongwe le mongwe a tle a eme fa pele ga Modimo e le molatedi yo o godileng sentle wa ga Keresete.+
29 Eleruri ke dira bojotlhe gore ke dire seno, ke leka ka natla ke thusiwa ke maatla a gagwe a a dirang mo go nna.+
Dintlha Tse di Kwa Tlase
^ Bona Ditlhaloso Tsa Mafoko.
^ Kgotsa “ka lorato lwa lona lo lo tlhotlhelediwang ke moya wa Modimo.”
^ Seger., “Lo tsamaye ka fa go tshwanetseng.”
^ Bona Dintlha A5.
^ Kgotsa “batho ba ba boitshepo.”
^ Seger., “a re golola mo taolong ya lefifi.”
^ Seger., “letlane.”
^ Go tewa Modimo.
^ Bona Ditlhaloso Tsa Mafoko.
^ Seger., “mo popong yotlhe e e ka fa tlase ga legodimo.”
^ Seger., “go simologa kwa ditsamaisong tse di fetileng tsa dilo.” Bona Ditlhaloso Tsa Mafoko.
