•  Nama kebuah deka bepantang?

•  Nama tanya ke patut diperundingka nuan?

•  Nama prinsip Bup Kudus ke patut dititihka?

 “Seiku nembiak lelaki ke benama Ryan madah, “Aku ngasaika bepantang nya baka seni lukis ti amat ngerinduka ati.”

 Nuan mega engka deka bepantang pengudah nuan ninga runding orang bukai pasal pantang. Ngambika chunto, seiku nembiak indu ke benama Jilian madah, “Maya aku agi sekula, indai seiku ari kaban aku nadai maya iya agi mit. Maya iya agi biak, iya ngaga pantang nama indai iya ba belakang pegu. Aku ngasaika pengawa iya nya amat nyinuka ati.”

 Pantang enda ulih dibuai! Nya alai, enda ngira nama kebuah iya, berunding meh enggau dalam sebedau ngaga pemutus nya. Nama tanya ke patut diperundingka nuan sebedau ngaga pantang? Nama prinsip Bup Kudus ke ulih nulung nuan ngaga pemutus ti manah?

 Kati pantang ulih ngachau pengerai aku? Siti artikel ba laman web Mayo Clinic nerangka, “Pantang ulih ngerusak kulit. Nuan engka senang dirampit penyakit kulit tauka penanggul bukai. Kekadang, bisi lita ke nyerumbu ti dikumbai granuloma pansut ngelingi pantang nya. Nambahka nya, pantang mega ulih ngujungka keloid. Keloid nya nyadi ketegal mayuh mansutka tisu tubuh ba endur ke telih tauka abi ke benung deka ngeraika diri.” Laman web nya mega nerangka, “Enti perengka ke dikena nya ngembuan darah orang ke sakit, nuan mega senang kena rampit ari darah ke udah kamah nya.”

 Nama runding orang, enti nuan bepantang? Endang enda ulih diseliahka, orang deka ngakim nuan ari chara nuan ngintu diri. Nuan engka dikumbai orang ke nemu berunding tauka ulih dipechaya. Pia mega, orang pan engka bisi runding enda manah pasal nuan. Seiku nembiak ke benama Samantha madah, “Ninting kali aku meda orang ke bepantang, aku ngumbai sida tu orang ke selalu mabuk sereta selalu beparti.”

 Melanie ke beumur 18 taun madah, “Ba aku, pantang nya nutup pemanah ke dikembuan kitai. Enti nuan bepantang, nuan baka ke ngelalaika sapa diri empu ba belakang pantang nya, ngambi orang enda nemu sapa nuan.”

 Kati gamal pantang nya seruran utai ke dikedekaka nuan? Lebuh berat tubuh seseiku orang majak nambah, tauka mansang tuai, gamal pantang ba kulit nya mega berubah. Seiku nembiak lelaki ke benama Joseph madah, “Aku kala meda pantang seseiku orang ke udah bepuluh taun digaga iya, lalu diatu pantang nya nyau enda manah dipeda.”

 “Nitihka pemansang dunya, gamal pantang ke digaga kitai nya enda semanah maya pun kitai ngaga iya suba. Diatu, nuan engka ngumbai pantang nya amat beguna. Beberapa taun udah nya, runding nuan engka berubah,” ku Allen ke beumur 21 taun.

 Amat munyi ku Allen. Seraya umur mansang tuai, runding, utai ke dikedekaka, sereta hobi seseiku orang ulih berubah, tang pantang enda ulih. Seiku nembiak indu ke benama Teresa madah, “Enti aku bisi pantang ba tubuh, aku tentu deka ngingatka pemeli diri. Aku enggai ngereja utai ke ngasuh diri empu nesal dudi hari.”

 Orang ke bepenemu-dalam deka berunding dulu sebedau ngaga pemutus. (Jaku Dalam 21:5; Hebrew 5:14) Nya alai, sebedau ngaga pantang, perundingka dulu prinsip tu:

•  Kolosi 3:20: ‘Kita ke anak, ngasika apai indai kita dalam semua utai, laban nya ngerinduka ati Petara.’

    Kati nuan agi diau serumah enggau apai indai? Enti au, nama deka nyadi enti nuan enda ngasika sida?

•  1 Peter 3:3, 4: ‘Pemajik kitai ukai datai ari utai ti ulih dipeda, baka jalai kita ngaduka buk kita, tauka bekenaka perengka emas, tauka gari, tang awakka pemajik kita datai ari ati kita ti bendar, ti enda nemu luya, ti nelap sereta imun, ti pemadu berega di mua Petara.’

    Ba runding nuan, nama kebuah ajar Bup Kudus beberatka agi pemajik ari dalam, ukai ari luar?

•  1 Timoti 2:9: “Indu begari penumbas iya sereta menyana, ngena gari ti patut.”

    Nama reti “penumbas iya”? Seraya kitai nitihka pemansang dunya, nama kebuah penumbas iya nya manah agi ari ke ngaga pantang?

•  Rome 12:1: ‘Serahka tubuh kita nyadi piring ti idup, ti kudus, ti dikerinduka Petara. Nya meh jalai kita patut nyembah Iya.’

    Nama kebuah sebarang pengawa ke digaga kitai ngagai tubuh diri nya bisi kaul enggau Petara?

 Mayuh orang enda nyadi bepantang pengudah sida berundingka sekeda penerang tu. Sida nemu bisi utai bukai ke beguna agi ari bepantang. Teresa, ke disebut tadi madahka, “Enti nuan ngasaika bisi leka jaku ti amat berega ba nuan, titihka nya dalam pengidup. Enti nuan sayauka seseiku orang, padahka meh ngagai iya. Kereja utai ke patut dikereja nuan, ukai ngelukis nya nengah pantang.”