•  Uji diri empu

•  Nama kebuah aku patut ningaka jaku orang?

•  Baka ni chara aku patut nerima jaku orang?

•  Nama ku nembiak serambau nuan

 Mayuh orang berunding, jaku orang nya tentu utai ti enda manah. Tang iya ke bendar, bisi sekeda jaku orang nya utai ti manah. Kekadang jaku nya nulung kitai ngemansangka kualiti ti manah tauka ngaga pengawa kitai enggau manah agi. Aram kitai meda utai ke nyadi tu.

1.  ● Empai lama ti udah, cikgu madahka kereja sekula nuan enda tentu manah. Iya madah, “Nuan patut ngaga mayuh agi pansik.”

    Nama digaga nuan maya ninga jaku nya?

   1.   Enda peduli. (‘Cikgu nya endang enda rinduka kereja sekula aku.’)

   2.   Nerima enggau manah. (‘Maya bukai, aku deka ngereja kereja sekula aku enggau manah agi.’)

2.  ● Taja pan nuan udah ngaduka bilik, tang indai agi ngumbai bilik nuan nya merebak.

    Nama digaga nuan maya ninga jaku nya?

   1.   Enda peduli. (‘Indai sigi enda kala puas ati.’)

   2.   Nerima enggau manah. (‘Amat nya, aku bedau ngaduka bilik nya enggau manah.’)

3.  ● Menyadi biak nuan madahka, iya enda rindu enggau ulah nuan ke selalu ngasuh iya ngereja sesiti utai.

    Nama digaga nuan maya ninga jaku nya?

   1.   Enda peduli. (‘Ngumba kediri ngerara aku. Iya pan sama meh!’)

   2.   Nerima enggau manah. (‘Amat ga nya. Engka aku patut madahka iya enggau chara ti ngena agi.’)

 Sempama kacha, bala nembiak mega senang belah. Mimit aja ninga jaku orang, senang amat berasai tusah ati enggau asa. Kati nuan mega baka nya? Enti au, nya tentu tusah ke nuan. Nama kebuah? Laban, enti nuan ulih nerima jaku orang, nya ulih ngemansangka pemanah ba nuan empu ke diatu tauka maya nuan mansang besai dudi hari.

•   Laban kitai enda sempurna. Bup Kudus madah: “Semua kitai bela ngereja mayuh macham penyalah.” (James 3:2) Nya kebuah, semua kitai begunaka jaku lalau ari pangan diri.

   “Aku selalu ngingatka diri, mensia enda sempurna sereta seruran ngereja penyalah. Nya alai lebuh aku ninga jaku orang, aku nguji berubah lalu nyeliahka diri ari ngereja penyalah ti sama.”—David.

•   Kitai ulih nyadi manah agi. Bup Kudus madah: “Enti nuan ngajar orang ke bepenemu-dalam, iya deka lebih agi bepenemu-dalam.” (Jaku Dalam 9:9) Enti nuan deka ninga jaku lalau tauka nerima jaku orang, nuan ulih nyadi orang ke bepenemu-dalam.

   “Aku enda rindu ninga jaku orang. Aku ngasaika nya baka orang beli. Tang diatu, aku deka nerima jaku orang, indah aku deka minta penemu ari sida. Aku deka nemu nama agi utai ke patut diubah aku.”—Selena.

 Amat, enti kitai minta penemu ari orang bukai, senang kitai nerima. Tang baka ni enti jaku lalau nya ukai utai ke dipinta kitai? Nya tentu enda senang. Natalie kala ngasaika nya. Iya madah, “Aku amat tekenyit sereta tusah ati. Aku udah bebendar gawa tang agi ga diberi jaku!”

 Kala nuan ngasaika utai ti sama baka Natalie? Enti kala, baka ni nuan nerima jaku orang?

•   Dinga enggau manah.

   Bup Kudus madah: “Orang ke mereti, enda seruran kutap-kutap. Orang ke enda bemunyi nya orang ke bepenemu-dalam.” (Jaku Dalam 17:27) Enti bisi orang ngelalau nuan, anang nyelepak maya iya benung bejaku. Pia mega, anang beguai nyimpulka utai ti disebut iya. Enggau nya, nuan enda nyebut utai ke ngasuh nuan nesal ati dudi hari.

   “Maya aku ninga jaku orang, aku jampat deka ngetanka diri. Iya ke bendar, aku patut belajar ari jaku nya, lalu nguji ngubah diri enggau manah agi maya bukai.”—Sara.

•   Beratika jaku lalau nya, ukai beratika orang ke meri.

   Kekadang nuan mega deka nyebut pengelemi orang ke meri nuan jaku. Tang, jauh manah agi enti nuan nitihka lalau ari Bup Kudus ke madah, “Enda tau enda jampat mending, lubah mansutka jaku, lubah ringat.” (James 1:19) Kesuah iya, jaku lalau ke diberi nya bisi utai ke betul. Nya kebuah nuan begunaka jaku lalau nya. Tang, enti nuan enda nerima, nuan empu ke rugi.

   “Enti apai indai meri aku lalau, aku jampat ringat lalu madah, ‘Au, nemu aku!’ Tang, enti aku sabar lalu nitihka lalau sida, aku nemu senentang ni aku patut berubah.”—Edward.

•   Nemu sapa diri empu.

   Enti nuan diberi jaku, ukai reti iya nuan nya orang ke enda beguna. Nya utai ti biasa, laban semua orang endang bisi pengelemi. Indah orang ke meri nuan jaku, mega begunaka jaku ari orang bukai. Bup Kudus pan madah, “Nadai orang di dunya tu ti nadai kala ngereja utai ti salah.”—Pengajar 7:20.

   “Kaban kala meri aku jaku. Aku ngasaika jaku iya nya enda ngam enggau aku. Tang aku tetap madahka terima kasih, laban iya beterus terang enggau aku. Enda lama udah nya, baru meh aku nemu, utai ke disebut iya nya amat. Aku nemu nama patut diubah. Enti nadai kaban aku madah, aku engka enda nemu diri.”—Sophia.

•   Deka ngubah diri.

   Bup Kudus madah, “Nuan bepenemu-dalam enti nuan nerima jaku rara enggau ajar.” (Jaku Dalam 15:5) Maya nuan diberi jaku, nuan engka berasai pedis ati. Tang enti nuan deka nerima jaku nya, nuan enda pedis ati agi lalu deka berubah. Tuliska utai ke patut diubah nuan. Udah nya, dalam beberapa bulan, tuliska mega pemujur ke udah digaga nuan.

   “Orang ke deka nerima jaku lalau, orang ke lurus. Kitai enda patut nipu diri. Enggau nya, baru meh kitai ulih ngaku penyalah diri, minta ampun, lalu belajar ari penyalah nya.”—Emma.

 Batang ajar: Bup Kudus madah, “Orang belajar ari pangan diri nya baka besi ti ngansah besi.” (Jaku Dalam 27:17) Jaku lalau ti manah ulih meri penguntung ngagai nuan. Reti iya, nya ulih ngemansangka agi pemanah kualiti nuan, ukai semina diatu, tang pia mega maya nuan mansang besai dudi hari.