“Pengudah tua pangan aku putus, ati aku balat tusah. Sepemanjai idup aku, nadai kala aku ngasaika penusah ati nya,” ku Steven.

 Kala nuan ngasaika utai baka tu? Artikel tu ulih nulung nuan.

•  Asai putus pengerindu

•  Utai ke ulih digaga nuan

 Putus pengerindu ulih ngasuh seduai iya bela pedis ati.

•  Enti nuan ke mutuska kaul seduai nya, nuan engka ngasaika utai ti diasaika Jasmine: “Aku udah ngemediska ati orang ke kala dikesayauka aku. Tu ngasuh aku berasai besalah. Aku arapka, utai tu badu nyadi ba aku agi.”

•  Baka ni enti orang ke mutuska kaul seduai nya ukai nuan? Engka nuan ulih nemu asai ati sekeda orang ke ngumbai, nya baka ke lenyau orang ke dikesayauka. Janet madah, “Aku baka ke ngulit. Keterubah, tusah aku deka nerima utai ke nyadi. Aku agi ngarapka kaul kami ulih diaduka baru. Aku mega berasai ringat sereta asa. Pengudah setaun, baru meh aku ulih nerima utai ke nyadi.”

 Iya ke bendar: Pengudah putus pengerindu, nuan berasai lemi sereta balat tusah ati. Seiku penulis Bup Kudus madah, “Tang ati ti tusah ngasuh pengering lenyau.”—Jaku Dalam 17:22, NWT.

•  Bejaku ngagai orang ke bepenemu-dalam. Bup Kudus madah, “Pangan endang seruran ngayanka pengerindu sida.” (Jaku Dalam 17:17) Padahka asai ati nuan ngagai apai indai tauka kaban ti bepenemu-dalam. Sida ulih nulung nuan ngembuan runding ti betul pasal utai ke nyadi.

   “Pengelama bebulan-bulan aku ngenyauhka diri ari orang bukai. Aku nadai madahka sesapa pasal asai ati aku. Tang, kaban ti bendar ulih ngubat ati ti telih. Pengudah aku mansutka asai ati, baru meh aku berasai nyamai agi.”—Janet.

•  Belajar ari utai ke nyadi. Bup Kudus mega ngajar, “Giga penemu-dalam enggau runding ti dalam!” (Jaku Dalam 4:5) Peneleba ti enda manah ulih nulung kitai nemu sapa kitai ti bendar, lalu napi asai ati ti asa nya dalam pengidup.

   “Pengudah putus, seiku kaban nanya aku pasal nama dipelajarka aku ari utai ke nyadi nya, lalu baka ni nya nulung aku maya aku deka bepangan baru dudi hari.”—Steven.

•  Sampi. Bup Kudus madahka, ‘Serahka penusah nuan ngagai Jehovah, lalu Iya deka nyaga nuan.’ (Masmur 55:22) Sampi ulih nulung nuan napi penusah ati ketegal putus pengerindu, lalu nulung nuan ngembuan runding ti betul.

   “Seruran besampi. Jehovah nemu penusah ati sereta utai ke nyadi ba kitai lebih ari kitai empu.”—Marcia.

•  Nulung orang bukai. Bup Kudus madah, “Anang semina berundingka diri empu aja, tang berunding mega ke orang bukai.” (Pilipi 2:4) Mayuh agi nuan nulung orang bukai, jampat agi nuan bulih runding ti betul.

   “Lebuh putus pengerindu, aku ngumbai nya meh ujung semua utai. Ati ti telih jauh pedis ari tubuh ke telih. Tang, nyau kelama aku ngasaika diri majak baik. Aku begunaka awak kena ngubat asai ati ke ditapi aku nya.”—Evelyn.