Seiku nembiak ke benama Elaine madah: “Lebuh aku meda bala kaban aku bisi beratus iku follower, aku berunding, ‘Lawa mat . . . , sida amat tebilang!’ Tu ngasuh aku berasai mimit chemburu.

 Kala nuan ngasaika nya? Enti kala, artikel tu nulung nuan nyeliahka diri ari pengingin deka nyadi tebilang ba media sosial.

•  Nama pemedis iya?

•  “Ngambarka utai ti pelesu”

•  Kati likes sereta follower nya amat beguna?

•  Seliahka ulah ti pepura baruh ati

 Jaku Dalam 22:1 nyebut: “Pilih pemanah nama, ukai milih pengaya.” Nyadi, ngembuan nama ti manah tauka dekaka orang bukai rinduka nuan, ukai utai ti salah.

 Tang, iya ke ilap nya, lebuh pengingin tu deka nyadi tebilang. Nama kebuah kitai tau ngumbai tu ulih ngemedis? Onya, ke beumur 16 taun madahka kebuah iya:

 “Aku kala meda orang ngereja pengawa ti amat gila. Bisi seiku pemelajar sanggup engkechit ari tingkat dua bengunan sekula, ketegal deka nyadi tebilang.”

 Ngambi orang beratika pengawa sida, bisi orang ngerikut pengawa nya lalu post ba internet. Chunto iya, bisi beberapa iku nembiak makai sabun kena nuchi baju, lalu ngepos nya ba media sosial. Semua ulah sida tu amat ulih ngemedis diri, lalu enda patut dikereja laban sabun nya berachun!

 Ajar Bup Kudus: “Anang ngereja utai . . . ti deka ngenyumbungka diri.”—Pilipi 2:3.

 Berunding enggau dalam:

•   Ba nuan, kati tebilang ba media sosial nya amat beguna?

•   Kati nuan sanggup ngerusak pengerai diri tauka nyawa diri, ketegal minta peda bala kaban lalu dikerinduka sida?

 Tang ukai semua orang ngereja utai ti tau ngemedis, ngambi ulih tebilang. Erica, ke beumur 22 taun madahka sekeda pengawa ke dikereja orang:

 “Sida deka ngepos mayuh gambar, ngambi orang bukai ngumbai sida mayuh kaban. Tu semina ngasuh kitai ngambarka utai ti pelesu, lalu ngumbai sida amat tebilang.”

 Cara, ke beumur 15 taun madahka sekeda orang semina nipu:

 “Aku meda, bisi orang ngambi gambar diri baka ke benung beparti. Tang iya ke bendar, sida ba rumah aja.”

 Matthew, ke beumur 22 taun pan ngaku, iya kala baka nya:

 “Aku ngepos gambar, lalu ‘tag’ madahka diri ba Gunung Everest. Tang, aku enda kala ngagai Asia!”

 Ajar Bup Kudus: Kitai “deka ngereja utai ti badas berari.”—Hebrew 13:18.

 Berunding enggau dalam:

•   Enti nuan ngena media sosial, kala nuan ngepos utai ti bula, ngambi ulih tebilang?

•    Kati gambar tauka komen ke dipos nuan nya, nunjukka sapa nuan ti bendar, sereta gayanka ulah nuan?

 Ba runding mayuh orang, enti sida deka nyadi tebilang, sida patut ngembuan mayuh follower sereta mayuh orang likes. Matthew ke disebut tadi, pan ngaku diri kala baka nya:

 “Aku selalu nanya orang, ‘Berapa iku “follower” nuan?’ tauka ‘Berapa iku orang “likes” nuan?’ Kena nambahka follower, aku selalu ‘follow’ orang ke enda dikelala, lalu ngarapka sida ‘follow’ aku baru. Aku majak balat deka nyadi orang ke tebilang, lalu media sosial ngasuh pengingin tu majak nyadi.”

 Maria, ke beumur 25 taun mega berati, sekeda orang nentuka diri nya tebilang ari penyampau follower enggau likes sida. Ku iya:

 “Enti seiku indu ‘post’ gambar ‘selfie,’ tang mimit aja orang ‘likes’, iya deka ngumbai diri enda bajik. Runding ke baka tu amat salah, tang tu meh utai ke selalu diperundingka orang. Sida baka ke ngemedis diri empu.”

 Ajar Bup Kudus: “Anang sumbung; anang nyemekih pangan diri; anang ngining pangan diri.”—Galatia 5:26.

 Berunding enggau dalam:

•   Kati media sosial ngasuh nuan mandingka diri enggau orang bukai?

•    Kati nuan beberatka penyampau follower ari ke ngiga kaban ti bendar?