Satu Timoti 2:1-15
2 Keterubah, aku meransang semua orang ngambika bebendar besampi, madahka peminta ngagai Petara ngarika orang bukai, sereta meri terima kasih ngagai Iya ke semua macham orang,
2 bala raja, enggau semua sida ke tinggi pangkat, ngambika kitai ulih terus idup lantang sereta nadai pengirau, lalu kitai ulih nyembah Petara enggau ati ti enda bebagi sereta enggau pengabis ati.*
3 Utai tu manah sereta ngelantangka ati Petara ti Penyelamat kitai.
4 Iya dekaka semua macham orang diselamatka sereta bulih penemu ti betul pasal pemendar.
5 Bisi siku Petara, lalu bisi siku orang tengah entara Petara enggau mensia, iya nya Jesus Kristus. Iya meh orang
6 ke nyerahka diri nyadika tebus ti setipak ke semua orang.* Orang deka meri saksi pasal utai tu ba maya ti ditetapka.
7 Aku dipilih nyadi penginjil sereta rasul ngambika meri saksi pasal utai tu. Aku nyadi pengajar ke bansa bukai ngambika nulung sida arap sereta nemu pasal pemendar. Utai ke disebut aku nya amat lalu aku enda bula.
8 Nya alai, aku dekaka sida ke lelaki ba tiap iti endur majak besampi. Lebuh sida ngangkatka jari maya besampi, sida patut ngereja nya enggau tetap ati lalu sida enda patut pedis ati sereta bekelikuh.
9 Pia mega, maya sida ke indu ngias diri, sida patut berunding enggau manah, ngias diri enggau pengumbas iya, sereta ngena gari ti patut.* Sida enda patut ngaga buk ngena mayuh macham gaya ti kelalu, tauka ngena emas, mutiara, tauka gari ti kelalu mar.
10 Tang sida patut ngias diri ngena pengawa ti manah, ke ngena enggau sida ti indu ke ngaku diri nyembah Petara.
11 Maya belajar, sida ke indu enda patut bemunyi.* Sida patut nunduk ngagai sida ke lelaki.
12 Aku enda ngemendarka sida ke indu ngajar tauka bekuasa atas sida ke lelaki. Sida patut mengkang enda bemunyi.*
13 Tu ketegal Adam ke dulu digaga, udah nya baru Awa.
14 Nambahka nya, ukai Adam ke kena tipu tang indu nya ke amat-amat kena tipu lalu ngelanggar pesan Petara.
15 Taja pia, sida ke indu deka dijaga* enti sida ngadaka anak, asal aja sida terus ngayanka diri arap, ngembuan pengerindu, kudus, sereta berunding enggau manah.
Nota Kaki
^ Tauka “serius.”
^ Tauka “semua macham orang.”
^ Tauka “ti nunjukka basa.”
^ Tauka “irau.”
^ Tauka “irau.”
^ Sida ke indu dilalau ngambika ngintu ruang bilik sereta ngelatih bala anak, awakka sida enda malas tauka dipanjuk ulah ti jai.
