•  Pengajar ti ngenakutka ati

•  Chara napi

•  Chara berandau manah enggau pengajar nuan

•  Nama ku nembiak serambau nuan

 Nyauka tiap iku pemelajar bisi tekenaka pengajar ti bechiping, kelalu control, tauka kasar.

•   Luis, ke beumur 21 taun madah: “Suba, aku bisi seiku pengajar indu ke selalu ngena jaku ti ngasuh ati enda nyamai ninga. Iya enda bebasaka bala pemelajar iya. Laban iya ngasaika diri nyauka pinchin, nya kebuah iya berunding, iya sigi enda dibuai kereja taja pan ulah iya baka nya.”

•   Melanie, ke beumur 25 taun, ngenang baru chara pengajar iya ke bechiping. “Pengajar nya madah, iya enda manah enggau aku laban pengarap aku enda sama enggau pengarap pemelajar ke bukai. Nyadi aku patut nelebaka diri enti orang enda manah enggau aku.”

 Enti nuan bisi tetemuka pengajar ke baka nya, bisi utai ke ulih digaga nuan, ngambika nuan ulih gaga ati lebuh datai sekula. Uji meh sekeda chara tu.

•   Nelebaka diri. Tiap iku pengajar enda sama. Nyadi, sida pan ngarapka utai ti enda sama ari pemelajar sida. Uji giga nama utai ke dikearapka pengajar ari nuan, udah nya uji titihka utai kedeka iya nya.

   Prinsip Bup Kudus: “Jaku-dalam tu tau nambahka penemu orang ke endang bepenemu-dalam.”—Jaku Dalam 1:5.

   “Aku nemu, aku patut nitihka chara pengajar aku. Nyadi, aku enggau naka ulih nembuka kereja sekula baka kedeka iya. Tu ngasuh kaul kami manah agi.”—Christopher.

•   Ayanka basa. Ayanka basa lebuh nuan bejaku enggau pengajar. Anang mantah jaku sida, taja pan nuan ngasaika ulah sida enda patut dipebasa. Kingatka, ba runding sida, nuan semina pemelajar, ukai orang ke serambau sida.

   Prinsip Bup Kudus: “Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang.”—Kolosi 4:6.

   “Suah iya, pengajar selalu enda dipebasaka bala pemelajar. Enti nuan ngayanka basa, nya tentu narit ati sida.”—Ciara.

•   Uji meretika utai ke diasaika sida. Pengajar mega mensia. Baka semua orang, sida pan berasai ditekan sereta bisi pengirau. Nyadi, anang beguai nyimpulka, “Pengajar aku jai” tauka “Pengajar begedika aku.”

   Prinsip Bup Kudus: “Semua kitai bela ngereja mayuh macham penyalah.”—James 3:2.

   “Nyadi pengajar enda senang. Aku enda ulih ngambarka pemedis ngasuh bala pemelajar duduk jenuh lalu ngajar sida. Nyadi, aku selalu bisi runding enggai ngenusahka pengajar aku, lalu nambahka stres iya.”—Alexis.

•    Padahka ngagai apai indai. Apai indai orang ke pemadu manah ke meri sukung ngagai nuan. Sida deka nuan mujur ba sekula. Lalau sida nulung nuan mutarka penanggul, enti bisi pengajar enda manah enggau nuan.

   Prinsip Bup Kudus: “Enti nuan nadai bulih jaku lalau, pengawa nuan deka puntan.”—Jaku Dalam 15:22.

   “Apai indai mayuh peneleba chara mutarka penanggul. Dingaka meh lalau sida. Enggau chara nya, nuan ulih mujur.”—Olivia.

 Ba sekeda pekara, nuan engka ulih berandau enggau pengajar pasal penanggul ke ditapi seduai. Anang irau, nya ukai reti iya nuan deka belaya enggau iya. Tang nuan semina deka berandau enggau iya. Dini nemu, tu chara ti manah ke seduai.

 Prinisp Bup Kudus: “Aram kitai ngereja utai ti mai pemaik.”—Rome 14:19.

 “Enti pengajar semina enggai meda nuan, tanya meh iya, kati bisi utai ke dikereja nuan ti ngasuh iya ringat? Saut ari iya engka nulung nuan berubah.”—Juliana.

 “Enti bisi utai ke deka dipadahka nuan ngagai pengajar pasal sesiti penanggul, manah agi betemu enggau iya seiku aja, pengudah tauka sebedau kelas belabuh. Kereja nya enggau chara ti nelap. Enggau chara tu, pengajar nuan engka senang agi nerima sereta bebasaka chara nuan.”—Benjamin.

 CHERITA AMAT

 “Peresa aku amat enda manah. Tang pengajar enggai nulung aku. Aku asaika ka badu sekula, laban iya amat ngenusahka pengidup aku.

 “Aku nanya penemu pengajar ke bukai. Iya madah, ‘Pengajar nya bedau amat ngelala nuan, lalu nuan pan bedau amat ngelala iya. Nuan ulih madahka iya, nuan bisi penanggul. Enti nuan dulu ngereja tu, engka nuan nulung pemelajar ke bukai mega, ke sama takut bejaku enggau iya.’

 “Enti ulih, aku enggai ngereja tu. Tang pengudah berunding enggau dalam, amat ga utai ku pengajar nya. Aku patut ngereja sesiti pengawa enti deka mutarka utai ke nyadi.

 “Ba hari siti, aku betemu enggau pengajar aku. Enggau basa aku madah, aku amat beterima kasihka ajar iya ba kelas, lalu aku deka belajar mayuh agi ari iya. Tang aku ngasaika nya tusah, lalu enda nemu nama patut digaga. Iya meri aku sekeda penemu, lalu indah iya madahka diri deka nulung aku pengudah kelas tauka nengah email.

 “Aku amat tekenyit! Pengudah randau nya, kaul kami duai majak manah. Diatu, aku enda berasai tusah agi deka datai sekula.”—Maria.

 Chara: Enti nuan bisi penanggul enggau pengajar, kena meh peluang nya nyediaka diri nuju ngagai jeman orang besai tuai. Katie, ke beumur 22 taun madah: “Pengudah abis sekula, nuan engka gawa enggau orang ke tinggi pangkat ari nuan. Sida pan engka enda manah enggau nuan. Enti nuan udah nemu chara mutarka nya maya begulai enggau pengajar ba sekula, nuan tentu ulih mutarka penanggul ke nyauka sama dudi hari.”