Nuan udah berengkah dating ba sesiti timpuh, tang udah nya nuan berengkah berasai kakang. Kati nuan patut neruska hubungan tu tauka putus? Artikel tu digaga kena nulung nuan ngaga pemutus.

Ba artikel tu

•  Lebuh nuan berasai kakang

•  Ngaga pemutus

•  Enti nuan deka putus

 Pengudah dating dalam sesiti timpuh, siku lelaki enggau siku indu engka ngasaika sida bebida ari pangan diri. Ngambika chunto:

•   Siku nya rindu ke pantai; siku da agi rindu niki bukit.

•   Siku nya rindu begulai enggau orang; siku da agi rindu kediri.

•   Siku nya suah bula; siku da agi selalu jujur.

 Tiap iti situasi tu bebida. Keterubah nya, pasal enda sebaka ba hobi. Kedua, enda sebaka ba perangai. Lalu ketiga, enda sebaka ba runding.

 Perundingka: Ni bagi tiga iti situasi tu ke pemadu tusah ba nuan, enti seduai udah kawin? Ba ketiga-tiga situasi tu, ni bagi situasi seduai ulih ngalahka diri?

 Laki enggau bini ulih bebida ba hobi tauka perangai, tang sida agi ulih ngembuan tikah ti lantang. Taja pan laki bini amat ngam enggau pangan diri, tang ukai reti iya seduai seratus peratus sebaka. Ba sekeda pekara, laki bini belajar rinduka hobi kaling sida, tauka bulih penguntung ari perangai pangan diri. a

 Taja pia, endang patut orang ke enggau nuan jadi ngembuan runding ti sebaka enggau nuan. Chunto iya, pasal pengarap, standard moral, sereta pasal utai ti betul enggau salah. Enti iya bebida ba pekara tu, tu tanda nuan engka patut mutuska hubungan seduai.

 Ngambika chunto, agama ti bebida. Bup Fighting for Your Marriage nuliska: “Selalu iya, pansik nunjukka laki enggau bini ke enda sama agama senang agi sarak.”

 Prinsip Bup Kudus: “Anang ngesan tangkun enggau orang ke enda arap, laban tangkun ke baka nya deka nyadi berat sepiak.”—2 Korint 6:14.

 Bup Kudus madahka, orang ke kawin “deka napi mayuh penusah.” (1 Korint 7:28) Nya alai, enda iran enti nuan napi tu maya nuan benung dating.

 Kekadang, seduai engka bisi utai ke enda disetuju, tang ukai reti iya hubungan seduai nya enda mujur. Utai ke penting nya, kati seduai ulih mutarka laya nya enggau chara ti manah? Seduai patut nemu chara mutarka tu enti seduai ka kawin.

 Prinsip Bup Kudus: “Kita patut manah ati sereta siru enggau pangan diri. Ampunka pangan diri ari ati.”—Epesus 4:32.

 Pia mega, enti seduai suah belaya tauka enda besetuju, tu engka nunjukka seduai enda sesuai ke pangan diri. Enti tu nyadi ba seduai, manah agi seduai nemu tu diatu ari ke pengudah seduai kawin.

 Iya ke amat: Enti nuan balat kakang ati pasal orang ke enggau nuan dating, tauka kakang kati nuan sedia deka kawin, anang enda pedulika asai ati tu!

 Prinsip Bup Kudus: “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.”—Jaku-Dalam 22:3.

 Putus pengerindu endang amat pedis. Enti nuan tauka seduai sama bela enda ngetu-ngetu kakang ati pasal hubungan seduai, engka nya manah agi seduai putus.

 Baka ni chara nuan ngereja nya? Enti nadai kebuah ti besai, anang meh mutuska hubungan seduai nengah mesej tauka email. Tang, pilih meh maya sereta endur ti ngena berandauka pekara tu begulai.

 Prinsip Bup Kudus: “Sebut utai ti bendar ngagai pangan diri.”—Sekariah 8:16.

 Kati putus pengerindu mai reti nuan siku orang ke enda mujur? Enda sekali-kali. Kingatka, maya dating nya meh maya nuan ngaga pemutus, sekalika nuan deka jadi enggau orang nya tauka enda. Taja nuan putus pengerindu, nuan agi ulih belajarka mayuh utai ti beguna ari pengalaman tu.

 Tanya diri empu: ‘Nama utai ke ditemu aku pasal diri empu ari hubungan tu? Kati pengalaman tu ngajar aku pasal utai ke patut diubah tauka dikemansangka aku sebedau aku besedia deka kawin? Enti aku dating baru, nama ubah ke patut digaga aku ke enda sama baka suba?’