Kebuah nuan milih chara tu: Nuan engka deka nunjukka diri, nuan nemu ni bagi utai ke deka digaga nuan, nya kebuah nuan empu ulih ngaga pemutus, enda ibuh nanya sapa-sapa. Engka nuan ngasaika diri pintar agi ari apai indai, tauka enda tentu bebasaka penemu sida.—Jaku Dalam 14:18.

 Asil iya: Bala kaban engka ngasaika best amat pengidup nuan. Taja pia, sida mega ulih beratika siti utai ba nuan, iya nya nuan enda lurus. Enti nuan sanggup ngemulaka apai indai, nuan mega tentu kempang ati ngemulaka bala kaban nuan. Enti apai indai nemu ulah nuan, sida tentu berasai pedis ati sereta asa enggau nuan. Nuan engka ditagang pansut ari rumah.—Jaku Dalam 12:15.

 Kebuah nuan milih chara tu: Nuan engka enda tentu rinduka parti nya, tauka orang ke datai ukai orang ke manah enggau begulai. (1 Korint 15:33; Pilipi 4:8) Tauka, nuan endang amat bisi ati deka datai, tang takut nanya apai indai.

 Asil iya: Enti nuan enggai enggau lalu ngasaika nya meh pemutus ti pemadu manah, nuan ulih nulak kangau nya enggau ati ti andal. Tang enti nuan enda enggau ketegal nuan takut minta pemendar ari apai indai, nuan engka berasai ringat ba rumah, lalu selebubu ngapa ngumbai diri enda dikemendarka enggau orang mayuh main.

 Kebuah nuan milih chara tu: Nuan amat bebasaka penemu sereta nemu tanggungjawap apai indai nuan. (Kolosi 3:20) Nuan rinduka sida lalu enggai ngemediska ati sida, ketegal pengawa nuan ti enda ditemu sida. (Jaku Dalam 10:1) Kelimpah ari nya, nuan ulih nerangka kebuah nuan deka enggau parti nya.

 Asil iya: Apai indai ulih ngasaika nuan rindu sereta bebasaka sida. Enti utai ke dipinta nuan nya enda salah, sida engka meri nuan pemendar.

 Perundingka sempama tu: Enti nuan diasuh milih, nuan engka milih deka nyemerai ba pantai ke bisi orang ngemata. Nama kebuah? Laban maya nuan benung nyemerai ba pantai, tusah deka meda utai ke ngelilingi nuan. Tang, orang ke ngemata nya ulih meda semua endur ke ngelingi nya, lalu ulih meda utai ke engka ulih ngemedis nuan. Sama mega enggau apai indai nuan. Sida bisi mayuh penemu sereta peneleba. Nya kebuah, sida ulih meda utai ke ulih ngemedis ti enda ulih dipeda nuan. Baka orang ke ngemata, apai indai deka nyaga nuan ari utai ke ulih ngemedis. Tang ukai ketegal sida sengaja nagang nuan ari mayuh main. Sida deka meda nuan gaga ati ba pengidup.

 Kebuah ke siti da, apai indai deka nyaga nuan. Maya nuan minta pemendar deka ngereja sesiti utai, sida begunaka awak berundingka nama penyadi ngagai pemutus ke digaga sida ke nuan. Ketegal pengerindu, tentu bisi kebuah sida kekadang meri pemendar tauka kekadang enda ngemendarka nuan ngereja sesiti utai. Enti sida madahka “ulih” ngagai utai ke dipinta nuan, tentu meh sida udah berunding enggau dalam, lalu amat pechaya utai ke dipinta nuan nya enda ulih ngemedis nuan.

Utai ke ulih digaga nuan

 Anang bula: Tanya diri empu, “Nama kebuah aku deka enggau? Kati aku rinduka main ke deka diatur nya? Tauka aku semina deka begulai enggau bala kaban aku? Tauka aku bisi ati ngagai seseiku orang ke deka datai?” Padahka meh semua nya enggau terang ngagai apai indai nuan. Sida mega kala ngasaika diri maya nembiak, sida nemu utai ke diasaika nuan. Enti nuan enda ngemulaka sida, sida tentu gaga ati lalu nuan empu mega bulih penguntung ari penemu manah sida. (Jaku Dalam 7:1, 2) Tang enti nuan bula, sida tusah deka pechayaka nuan agi, lalu engka enda ngemendarka nuan enggau.

 Meri awak: Anang nanya maya sida agi benung kisuk tauka baru datai kereja. Tanya meh sida maya sida nadai tentu mayuh pengawa. Tang anang ga kelalu laun nanya, lalu mejal sida meri saut ngagai nuan enggau jampat. Sida begunaka awak endur berunding, lalu enda beguai-guai ngaga pemutus. Nya alai, tanya meh sida tumu agi lalu beri awak alai sida berunding.

 Saut enggau terang: Anang bebelit jaku maya nyaut. Padahka meh ngagai sida nama deka dikereja nuan. Apai indai tusah deka pechaya enti anak nyaut, “Enda nemu,” maya sida nanya utai baka: “Sapa orang ke datai?” “Kati bisi orang ke besai tuai enggau kita?” tauka “Pukul berapa nuan pulai?”

 Ulah ti manah: Apai indai ukai munsuh, tang sida kaban nuan. Iya ke bendar, sida setim enggau nuan, ti seruran enggau sereta nyaga nuan. Enti nuan bisi runding ti manah pasal sida, sida mega senang agi deka bekerejasama enggau nuan. Nuan mega nadai ati deka ngelaban jaku sida.

 Tunjukka ngagai apai indai, nuan udah chukup penemu nerima sereta bebasaka pemutus sida. Enggau chara nya, sida mega deka bebasaka nuan. Dudi hari, sida engka meri nuan pemendar enti nuan minta ari sida.