Baka Ni Enti Apai Indai Aku Sarak?

TEBAH

Utai ke ulih digaga nuan

Pansutka asai ati nuan. Padahka ngagai apai indai pasal penusah ati sereta pengirau nuan. Engka sida ulih nerangka utai ke nyadi lalu ngurangka pengirau nuan.

Enti apai indai enda meri bantu ke diguna nuan, bejaku meh enggau seiku kaban ti ulih dikearapka.—Jaku Dalam 17:17.

Utai ke berat agi, kitai nemu Apai kitai ba serega deka ninga asai ati nuan. (Masmur 65:2) Pansutka meh asai ati nuan ngagai Iya, “laban Iya ngibun” nuan.—1 Peter 5:7.

Utai ti enda ulih digaga nuan

Ati ti telih ketegal apai indai sarak sempama patah lengan. Enda senang ngubat nya, tang nuan tentu ulih gerai

Anang bedendam. Apai indai Daniel sarak maya iya beumur 7 taun. Daniel madahka, “Apai indai aku semina berundingka diri empu. Sida enda berunding pasal kami, tauka nama nyadi ngagai kami ketegal pemutus sida.”

Nama ulih nyadi enti Daniel enda nagang pengeringat diri lalu majak bedendam?—Chara: Bacha Jaku Dalam 29:22.

Nama kebuah Daniel patut ngampunka apai indai iya taja pan sida ulih ngemediska ati iya?—Chara: Bacha Epesus 4:31, 32.

Seliahka pengawa ti ngemedis diri. “Pengudah apai indai sarak, aku berasai balat tusah ati enggau depress. Aku mayuh penanggul ba sekula. Peresa aku enda mujur, lalu ngujungka aku enda ulih niki ngagai peringkat ke nangkanka nya. Aku selalu ngemelika diri sereta belaya enggau orang,” ku Denny.

Ba runding nuan, kati Denny selalu ngemelika diri sereta belaya enggau orang?

Baka ni prinsip ba Galatia 6:7 ulih nulung orang ke baka Denny, nyeliahka pengawa ti ngemedis diri?

Ati ti telih begunaka awak. Lebuh nuan belubah-lubah pulai baru ngagai utai ke selalu dikereja nuan, nuan ulih napi asai ati tauka penanggul nya.