•   Nuan nya orang ke spontan; tang kaling nuan dekaka semua utai diatur enggau manah.

•   Nuan nya pemalu sereta enda mayuh bejaku, tang kaling nuan nadai nemu malu sereta senang begulai enggau mayuh orang.

 Kati ulah kaling nuan ngasuh nuan berasai gidan? Enti nuan bisi runding ke baka tu, tikah seduai ulih bisi penanggul. Bup Kudus bisi madahka, “Enti nuan seruran ingatka penyalah sida, kaul entara kita deka rusak.”—Jaku Dalam 17:9.

 Ngambika ulah ke ngasuh nuan gidan tu enda ngerusak kaul seduai, engka nuan patut bebendar agi beratika pemanah ke dikumbai nuan ngemediska ati tu.

Artikel tu deka berandauka:

•  Pemanah ari ulah ti ngasuh nuan gidan

•  Nama ku laki bini ke bukai

•  Utai ke ulih dikerandauka

 Ulah ke dikumbai nuan ngidanka ati, engka siti ari ulah ke ngasuh nuan tekait ati ngagai iya. Peratika tiga chunto tu:

 “Laki aku amat lubah. Enti deka ngereja sesiti utai tauka maya ka kini-kini, iya begunaka awak ti panjai alai tembu. Tang, iya baka nya laban iya orang ke amat sabar, nyengkaum ngagai aku. Nya meh siti ari kebuah aku sayauka iya.”—Chelsea.

 “Bini aku seruran nentuka semua utai nya bisi pelan lalu diatur enggau manah. Kekadang, tu ngasuh aku gidan. Tang pemanah iya, ketegal iya bisi ulah ke baka nya, iya ulih dikeandalka.”—Christopher.

 “Kekadang laki aku baka ke enggai ngereja nama-nama lebih agi maya iya stres. Tang iya ke amat, iya enda berumban baban. Tu meh siti ari ulah iya ke ngasuh aku tekait ati suba. Aku amat alit ati meda iya, laban iya enda jampat kesal lebuh bisi penanggul.”—Danielle.

 Baka Chelsea, Christopher, enggau Danielle, pemanah sereta pengelemi kaling kitai bisi kaul. Nya baka suit siling ke bisi dua iti mua. Kitai enda ulih ngarapka kaling kitai mina ngayanka pemanah iya aja, tang enggai meda pengelemi iya.

 Amat, bisi ga pengelemi ke nadai ulih dipeda pemanah iya. Chunto, dalam Bup Kudus bisi madahka orang ke “lengkar.” (Jaku Dalam 29:22) Enti seseiku orang ngembuan ulah ke baka tu, iya patut naka ulih muai ulah nya. Bup Kudus ngelalau kitai, “Buai semua dengki, tebiat ngeransi, pengeringat, jaku laya, tebiat bejakuka orang.” a—Epesus 4:31.

 Tang, enti ulah ke ngasuh kitai gidan nya ukai ulah ke jai baka ti dipadahka ba ayat tadi, uji titihka lalau Bup Kudus tu: “Sabar enggau pangan diri . . . enti kita bisi enda nyamai ati ngagai pangan diri.”—Kolosi 3:13.

 Kelimpah ari nya, uji peda nama pemanah ke ulih dipeda nuan ari ulah iya ke dikumbai nuan ngidanka ati nya. Engka nya meh ulah iya ke ngasuh nuan tekait ati suba. Seiku lelaki ke benama Joseph madah, “Enti kitai kelalu beratika ulah ti ngidanka ati pasal kaling, nya baka kitai semina meda utai ke tajam ba tisi-tisi belian, tang enda meda pengelawa belian nya.”

 Bisi beberapa iti tanya ba baruh. Keterubah, nuan empu ulih nyaut nya kediri. Udah nya, kerandauka saut nya begulai enggau kaling nuan.

•   Kati kaling nuan bisi ulah ke ngasuh nuan berasai gidan, lalu nuan nyangka tu ulih ngerusah tikah seduai? Enti bisi, nama ulah nya?

•   Kati ulah nya amat jai tauka semina ngidanka ati aja?

•   Kati ulah nya bangat nadai pemanah? Enti bisi, nama pemanah iya? Nama kebuah nuan tekait ati ke ulah nya?